Veel groter Uis wag op die teerpad
Des Erasmus - Die sluimerende Uis kan soos 'n paddastoel opskiet wanneer die nuwe teerpad van Walvisbaai oor Hentiesbaai die huidige vesting van toerisme gaan bereik.
Op die dorp word reeds gewerk aan 'n nuwe uitbreiding op 60 hektaar grond waar die Daureb Isib-woonbuurt gaan kom. Die lap aarde is groter as die bestaande Uis met sy bo- en onderdorp.
Met die bou van 'n teerpad word reeds tussen Swakopmund en Hentiesbaai gevorder. Daarna gaan die teerpad tussen Hentiesbaai en Uis kom om uiteindelik oor Khorixas die weg van 'n nuwe korridor vir vrag uit die Walvisbaaise hawe tot in Angola te word.
Die man aan die spits van die ontwikkeling van die Daureb Isib-woonbuurt is mnr. Mike van der Meer, in sy loopbaan die hawekaptein van Walvisbaai en nou 'n sakeman van Uis met uitgebreide belange. Die terrein waar die ontwikkeling kom, is die ou gholfbaan wat deur Van der Meer gekoop is en nou ontwikkel word.
Op die terrein word 145 woonerwe ontwikkel, maar voorsiening word ook vir besigheiderwe en selfs 'n herberg gemaak. Die opmeting van die gebied is reeds klaar. 'n Volgende stap is die ontwikkeling van die waternetwerk, 'n duur en tydsame proses. Om vir finansiering saam met die ontwikkeling voorsiening te maak, word die eerste 20 erwe nou teen 'n spesiale afslagprys van N$120 000 elk bemark. As alles volgens plan verloop, sal bouwerk teen die einde van die jaar begin.
Die ganse projek is reeds voorwaardelik goedgekeur. Al versekering wat gegee moet word, is dat daar water gaan wees. Op die stuk grond is 'n boorgat. Van der Meer meen die beskikbaarheid van water is nie die groot probleem van 'n dorstige Uis nie. Volgens hom is die water daar, maar is die infrastruktuur vir lewering aan die dorp verouderd en moet dit opgeknap en in stand gehou word.
Krag behoort nie 'n probleem te wees nie. Die ganse ontwikkeling gaan op sonkrag ingestel wees met Uis wat dwarsdeur die jaar helder sonskyn geniet.
Van die erwe is groot. Kleiner erwe beslaan 1 200 vierkante meter, maar persele van tot 3 000 vierkante meter gaan ook beskikbaar wees. 'n Prysklas van N$160 per vierkante meter is neergelê, maar die eerste 20 erwe word teen 'n afslagprys van N$110 per vierkante meter aangebied. Die kleiner erwe skep 'n geleentheid vir Namibiërs wat 'n aftreeouderdom bereik het, maar die groter persele bied aan ondernemende belangstellendes 'n geleentheid om hul ding te doen.
Volgens hom is die lewenskoste in so 'n buitestedelike gebied ook aansienlik goedkoper as op die groter dorpe en in die stede.
En die naam Daureb Isib? Dit beteken “Aansig van die Brandberg”.
Op die dorp word reeds gewerk aan 'n nuwe uitbreiding op 60 hektaar grond waar die Daureb Isib-woonbuurt gaan kom. Die lap aarde is groter as die bestaande Uis met sy bo- en onderdorp.
Met die bou van 'n teerpad word reeds tussen Swakopmund en Hentiesbaai gevorder. Daarna gaan die teerpad tussen Hentiesbaai en Uis kom om uiteindelik oor Khorixas die weg van 'n nuwe korridor vir vrag uit die Walvisbaaise hawe tot in Angola te word.
Die man aan die spits van die ontwikkeling van die Daureb Isib-woonbuurt is mnr. Mike van der Meer, in sy loopbaan die hawekaptein van Walvisbaai en nou 'n sakeman van Uis met uitgebreide belange. Die terrein waar die ontwikkeling kom, is die ou gholfbaan wat deur Van der Meer gekoop is en nou ontwikkel word.
Op die terrein word 145 woonerwe ontwikkel, maar voorsiening word ook vir besigheiderwe en selfs 'n herberg gemaak. Die opmeting van die gebied is reeds klaar. 'n Volgende stap is die ontwikkeling van die waternetwerk, 'n duur en tydsame proses. Om vir finansiering saam met die ontwikkeling voorsiening te maak, word die eerste 20 erwe nou teen 'n spesiale afslagprys van N$120 000 elk bemark. As alles volgens plan verloop, sal bouwerk teen die einde van die jaar begin.
Die ganse projek is reeds voorwaardelik goedgekeur. Al versekering wat gegee moet word, is dat daar water gaan wees. Op die stuk grond is 'n boorgat. Van der Meer meen die beskikbaarheid van water is nie die groot probleem van 'n dorstige Uis nie. Volgens hom is die water daar, maar is die infrastruktuur vir lewering aan die dorp verouderd en moet dit opgeknap en in stand gehou word.
Krag behoort nie 'n probleem te wees nie. Die ganse ontwikkeling gaan op sonkrag ingestel wees met Uis wat dwarsdeur die jaar helder sonskyn geniet.
Van die erwe is groot. Kleiner erwe beslaan 1 200 vierkante meter, maar persele van tot 3 000 vierkante meter gaan ook beskikbaar wees. 'n Prysklas van N$160 per vierkante meter is neergelê, maar die eerste 20 erwe word teen 'n afslagprys van N$110 per vierkante meter aangebied. Die kleiner erwe skep 'n geleentheid vir Namibiërs wat 'n aftreeouderdom bereik het, maar die groter persele bied aan ondernemende belangstellendes 'n geleentheid om hul ding te doen.
Volgens hom is die lewenskoste in so 'n buitestedelike gebied ook aansienlik goedkoper as op die groter dorpe en in die stede.
En die naam Daureb Isib? Dit beteken “Aansig van die Brandberg”.
Kommentaar
Republikein
Geen kommentaar is op hierdie artikel gelaat nie