Vanjaar reeds 63 malariasterftes

Estelle de Bruyn - Sedert die begin van die jaar is altesaam 63 mense reeds aan malaria dood en 38 243 gevalle is in die 14 streke van die land aangemeld.
Dit is 'n afname van 51% in sterftes in vergelyking met die ooreenstemmende tyd verlede jaar.
Malaria-uitbrekings is in die begin van die jaar in Kavango-Oos, Kavango-­Wes, Zambezi en Ohangwena aangemeld.
In reaksie op dié uitbreking het die ministerie van gesondheid en maat­skaplike dienste met 'n veldtog begin deur grootskaalse toetse uit te voer en behandeling toe te dien. Huise is ook met gif teen muskiete bespuit.
Altesaam 181 373 mense is as deel van die veldtog getoets. Sowat 13 080 het positief getoets en is behandel.
Malariaparasiete wat die land vanuit Angola binnegekom het, het volgens die adjunkminister van gesondheid en maatskaplike dienste, me. Juliet Kavetuna, grootliks tot die epidemie bygedra.
Gevolglik het die ministerie begin om betrekkinge met hul eweknieë in Angola te versterk.
Kavetuna het Woensdag in 'n ministeriële verklaring in die ­Nasionale Vergadering (NV) meer besonder­hede oor die voorkoms van malaria verstrek.
Sy het vergaderings met die Angolese ministerie van gesondheid belê en die twee lande het Malariadag gesamentlik aan weerskante van die grens gevier.
'n Konsepmemorandum van begrip is gereed vir voorlegging aan die kantoor van die prokureur-generaal, en ontwikkelingsvennote sal bewus gemaak word van die noodsaaklikheid om steun aan Angola te verleen om doeltreffende malariabestrydingsprogramme te implementeer.
Volgens Kavetuna begin die oordrag van malaria in Namibië in Desember en dit bereik vroeg in April 'n hoogtepunt, waarna oordragvlakke afneem.
Redes vir die wye verspreiding van malaria is onder meer voorkomingsmaatreëls wat nie heeltemal doeltreffend uitgevoer word nie.
Dit is deels weens die gebrek aan menslike- en finansiële hulpbronne vir die bespuiting van die binnekant van huise.
Die teikens van bespuiting is nie voldoende geprioritiseer nie en te min toesig is gehou oor spanne wat uitgestuur is om die spuitwerk te doen.
Daar was ook 'n gebrek aan die mobilisering van die gemeenskap, wat meegebring het dat spuitspanne nie geredelik toegang tot woonplekke gehad het nie. Heelwat huise kon gevolglik nie bespuit word nie.
“Die 2017-uitbreking het benadruk dat veral die bespuiting van woonplekke jaarliks voldoende gefinansier moet word om hoë dekking te verseker.
“Ek het die kabinet reeds ingelig dat 'n bykomende N$12,3 miljoen vir doeltreffende malariabeheer in 2017-'18 benodig word,” het Kavetuna gesê.
Operateurs wat huise moet bespuit, sal van 1 September vanjaar af begin met opleiding, en bespuiting moet teen 30 November afgehandel wees om die maksimum beskerming in die oordragseisoen te bied.
Logistieke reëlings is reeds getref, wat die aanskaf van insekdoders en toerusting insluit.
Strukture is ook beskikbaar om die bespuiting te implementeer en te monitor, het sy gesê.
“Gemeenskapsmobilisering en ondersteuning deur die private sektor is noodsaaklik vir goeie resultate. Vanjaar het die private sektor positief gereageer met skenkings van onder meer kontant.
“'n Meer gekoördineerde benadering om bystand en betrokkenheid van die private sektor te kry, sal gevolg word. Die regering het 'n bykomende N$2 miljoen deur die kantoor van die eerste minister beskikbaar gestel en met ontwikkelingsvennote soos die Globale Fonds en Elimination 8 is verdere bydraes van nagenoeg N$1,7 miljoen bekom,” het Kavetuna gesê.