Vakansietyd is speeltyd

Vakansietyd vir die kinders op Tsumeb beteken dat hulle langer buite kan speel. Dié sewe knapies het met hul selfgeboude draadkarre te lekker ’n reisies in die straat gehou. Andreas Shivute (11) sê elkeen het sy eie karretjie gebou en dat dit bakkies, lorries of selfs ’n BMW kan wees. Hy het die kuns by sy ouer broer geleer. Onder hulle is ook ’n “werktuigkundige” wat altyd sy tang byderhand het, sou iets fout gaan met een van die karretjies. Dan spring hy in en maak dit daar en dan reg. “Dit is maklik om die karre te bou. Jy het net bietjie draad, koeldrankblikkies of plastiekwiele, ’n tang en verbeelding nodig,” sê Shivute. Van links is Martin Shivute (12), die werktuigkundige Joel Nashiku (11), Absalom Absalom (11), Andreas Shivute (11), Paulus Indonga (10), Pauli Sakeus (7) en Kamati Isaak (11), elkeen met ’n draadkar wat hy self gebou het. Foto Tanja Bause