Uruguay straf onervare tuisspan

Andrew Poolman - Die klinies korrekte rugby wat Uruguay vanaf die eerste afskop gespeel het, het die verskil gemaak in die toer­span se oorwinning met 52-36 teen Namibië in die eerste van twee toetse in die Hage Geingob-stadion.

Afrigter Phil Davies en sy Namibiese span wat deur die afwesigheid van minstens nege topspelers uitgedun is, sal in die komende dae aan 'n paar aspekte moet skaaf indien hulle komende Saterdag in die tweede toets die Suid-Amerikaners aarde toe wil bring.

Hul terugvegpoging om vyf drieë te druk, wys dat Namibië selfs groterige agterstande kan jaag, maar die wyse waarop Uruguay se telling bly aangroei het, kon uiteindelik nie bekostig word nie.

Enige foute, klein of groot, aan die Namibiese kant is genadeloos gestraf met die Uruguayane wat vanaf hul eerste strafskop gekies het om 'n lynstaan op die hoekvlag af te dwing.

Die Namibiërs het heeldag hul hande vol gehad om Uruguay se rolmaalbewegings te stuit en toe die stut Mateo Sanguinetti binne vier minute laag dryf en uit sy eweknie AJ de Klerk se greep glip vir die eerste drie, kon 'n mens reeds voorspel waar die meeste aanvalle sou begin.

Die stewiger bou van Uruguay se losskakel Rodrigo Silva het hom danksy besit op die voorvoet gehelp om ondanks die duikvat van sy teenstander Cliven Loubser oor die doellyn te beur.

Uruguay se regtervleuel Federico Favaro het heeldag nie een keer mis na die pale gekorrel nie en danksy sy twee doelskoppe en 'n strafdoel was sy span met 17-0 ná ewe veel minute voor.

Met Namibië se eerste kans vir punte het Loubser die strafdoel oorgeklits. Die volgende afskop kon Ruan Ludick egter nie skoon raakvat nie en vandat Uruguay se voorspelers besit verseker het, het hulle tree vir tree opgetel en gedryf en gestamp totdat agtsteman Alejandro Nieto die doellyn gehaal het (24-3).



TE LAAT BEGIN SPEEL

Dit was tyd vir Namibië se agttal om hul stem dik te maak en 'n lynstaandryf het mooi gevorder as opbou tot die steelkantbeweging vir senter Darryl de la Harpe se drie. Die skuins skop was nie te moeilik vir Cliven Loubser nie (24-10).

'n Onvaste Namibiese skrum is egter gestraf en Uruguay was terug op die aanval, sodat Nieto vir sy tweede drie oorgerolmaal kon word (31-10).

Net voor rustyd het Namibië egter teruggeslaan om binne bereik te bly, toe die beseerde Mahepisa Tjeriko se plaasvervanger Johan Retief en Thomasau Forbes as baldraers gevorder het sodat Rohan Kitshoff van die volgende fase kon deurstorm.

Met Loubser se twee skoppunte was dit rustyd 31-17.

'n Senter-breekslag het vir Uruguay tot die eerste punte ná rustyd gelei toe stut Sanguinetti van naby kon oordryf (38-17).

Haker Niël van Vuuren, opgestuur in Obert Nortjé se plek, se eerste lynstaangooi op die aanval is afgeneem, maar hy is gered toe David Philander die lynskop van Uruguay raakgevat en vinnig ingegooi het. Heelagter Johann Tromp het deur die gaping versnel waarvoor hy altyd op die uitkyk is en De la Harpe en Tromp was die skakels om vir JC Greyling op 'n naelloop vir 'n drie in die regterhoekie te stuur. Die moeilike doelskop was Loubser se enigste flatertjie (38-22).

Theuns Kotzé is in Philander se plek opgestuur met 20 minute oor, met Loubser wat na heelagter en Tromp na vleuel verskuif het. Greyling het Loubser mooi deur 'n gaping gestuur en Uruguay se verdedigers het oortree. Van die strafskop het stut AJ de Klerk vir 'n drie oorgebars.

Met Loubser se doelskop was Namibië terug binne trefafstand (38-29) en daarom was dit 'n verligting toe Uruguay se volgende aanvallende lynstaandryf met elf minute oor gestraf is.

Ná 'n lopie deur Lesley Klim uit sy kwartgebied het hy sy aangee na Cliven Loubser op volle vaart weggekry, wat die dekverdediging met 'n rolskoppie probeer klop het. Die Uruguay-speler is op sy hoekvlag uitgeduik, waar Damian Stevens byderhand was om met 'n vinnige ingooi Johann Tromp se 17de toetsdrie teweeg te bring.

Loubser het verdoel, maar die telling van 36-38 was die naaste wat Namibië sou kom.

'n Aanslaan het vir Uruguay 'n skrum in die middel van die Namibiese kwartgebied besorg, van waar losskakel Silva 'n slim lyn gehardloop het vir sy tweede drie in die duikvatte van Max Katjijeko en De la Harpe (45-36).

Die finale spyker is opnuut met 'n lynstaandryf ingekap met reserwestut Carlos Arboleya die begunstigde van 'n drie. Federico Favaro se laaste doelskop was sy 17de punt vir die dag.

Namibië se 20-jarige losskakel Cliven Loubser is as die speler van die wedstryd bekroon.

Hoewel slot Mahepisa Tjeriko (ontwrigte skouer) waarskynlik buite rekening is, is Tjiuee Uanivi reeds deur sy klub London Scottish vrygestel om vir komende Saterdag se tweede toets in die Windhoek Lager-reeks by Namibië aan te sluit.