Unam draai krane oop teen Falcon
Die wenspan se afrigter, Johan Diergaardt, sê dit was 'n waardevolle oefenlopie vir komende Saterdag se semifinaal.
Andrew Poolman - 'n Voorspelbare wegholoorwinning vir FNB Universiteit van Namibië het hul eindposisie aan die toppunt van die puntelys van die Namibië Rugby-unie (NRU) se premierliga verseker.
Die ope geheim van die samestelling vir komende naweek se lank verwagte semifinale is hiermee ook bevestig, naamlik dat Unam teen die vierde geplaaste Rehoboth-rugbyklub sal speel, terwyl die spanne in die tweede en derde posisie, FNB Wanderers en Trustco United, dit sal uitspook om die ander finalis te wees.
Die studentespan het Saterdag die sukkelende Reho Falcon, wat hom aan die onderpunt van die sewe klubs bevind, op Rehoboth met 96-20 afgeransel in die finale wedstryd van die ligaseisoen.
Vreemd genoeg het bestuurslede van die verloorspan agterna aangevoer dat die ware eindtelling 108-20 was, maar op Unam se puntelys word aangedui dat die besoekers 14 drieë gedruk en 13 verdoel het.
Die heelagter Lorenzo Louis was die groot puntemasjien met 12 doelskoppe en twee drieë, wat sy oes vir die dag op 34 punte te staan bring.
Die vleuels Shareave Titus en Romario van Wyk, asook die haker Bigman Kaura, het elkeen twee drieë gedruk, terwyl Unam se ander driedrukkers die senterpaar Camlo Martin en Johannes Mwenyo, skrumskakel Sunday Haitembu (ook een doelskop), slot Simon Haitembu en die plaasvervangers Mbapewa Kauuova en Kami Mieze was.
Aan die kant van Reho Falcon is 'n strafdrie toegeken, terwyl skrumskakel Genivo Brendell ook 'n drie gedruk het. Losskakel Franklin Busch het met 'n doelskop en twee strafdoele geslaag.
“Daar was baie goeie rugby gespeel, al was die telling so hoog. Ons is bly ons kon die rugbyjaar klaarmaak. Sterkte vir die spanne in die semifinaal,” sê Deon Mouton, spanbestuurder van Reho Falcon.
Die swart truie van Reho Falcon het 'n trotse geskiedenis as 'n span wat tot uitstekende rugby in staat is, maar die afgelope seisoen is deur 'n gebrek aan ervare spelers gekenmerk en die klub moes gereeld sy eerste en tweede spanne, of soms albei, onttrek.
'n Betekenisvolle belegging van geld en ander hulpbronne sal nodig wees om Reho Falcon (die land se kampioenklub in 2007 en 2011) terug op 'n gesonde pad te plaas.
'BAIE TROTS OP HULLE'
Unam se afrigter, Johan Diergaardt, sê: “Ek dink dit was ten spyte van die wegholtelling die moeite werd om die wedstryde (met eerste en tweede span) te gaan speel.
“Ons kon 'n paar opsies toets en dit was goeie voorbereiding vir komende naweek se semifinaal. Om 'n wedstryd te speel, is altyd beter voorbereiding as om net te oefen.
“Dan is dit natuurlik weer lekker om boaan die liga te eindig. Ek dink ons spelers het hard gewerk hiervoor en het deur die seisoen baie ontwikkel.
“Met sowat twaalf Unam-spelers gereeld onbeskikbaar weens nasionale verpligtinge, moes die jonger manne opstaan en hard werk. Ek is baie trots op hulle.”
Die premierliga se finale stand ná 14 wedstryde elk: Unam 54, Wanderers 51, United 45, Rehoboth 31, Suburbs 28, Kudus 24, Falcon 1.
Diergaardt se Unam-span is verlede jaar in 'n klipharde semifinaal deur United uitgeskakel, voordat Wanderers die finaal met 30-22 beklink het.
Die vorige drie jare (2015-2017) het Unam 'n opeenvolgende string titels, die eerstes in sy bestaan, beklink.
• In die reserweliga het Unam se tweede span ook Saterdag goed afgesluit deur Reho Falcon met 75-17 deurmekaar te hardloop.
Nogtans eindig Wanderers II boaan die puntelys van die reserweliga en kom dus in sy halfeindstryd teen Western Suburbs se tweede span te staan. Unam II teen Rehoboth II is dus 'n voorgereg vir die premierliga-semifinaal tussen dié twee klubs.
Die ope geheim van die samestelling vir komende naweek se lank verwagte semifinale is hiermee ook bevestig, naamlik dat Unam teen die vierde geplaaste Rehoboth-rugbyklub sal speel, terwyl die spanne in die tweede en derde posisie, FNB Wanderers en Trustco United, dit sal uitspook om die ander finalis te wees.
Die studentespan het Saterdag die sukkelende Reho Falcon, wat hom aan die onderpunt van die sewe klubs bevind, op Rehoboth met 96-20 afgeransel in die finale wedstryd van die ligaseisoen.
Vreemd genoeg het bestuurslede van die verloorspan agterna aangevoer dat die ware eindtelling 108-20 was, maar op Unam se puntelys word aangedui dat die besoekers 14 drieë gedruk en 13 verdoel het.
Die heelagter Lorenzo Louis was die groot puntemasjien met 12 doelskoppe en twee drieë, wat sy oes vir die dag op 34 punte te staan bring.
Die vleuels Shareave Titus en Romario van Wyk, asook die haker Bigman Kaura, het elkeen twee drieë gedruk, terwyl Unam se ander driedrukkers die senterpaar Camlo Martin en Johannes Mwenyo, skrumskakel Sunday Haitembu (ook een doelskop), slot Simon Haitembu en die plaasvervangers Mbapewa Kauuova en Kami Mieze was.
Aan die kant van Reho Falcon is 'n strafdrie toegeken, terwyl skrumskakel Genivo Brendell ook 'n drie gedruk het. Losskakel Franklin Busch het met 'n doelskop en twee strafdoele geslaag.
“Daar was baie goeie rugby gespeel, al was die telling so hoog. Ons is bly ons kon die rugbyjaar klaarmaak. Sterkte vir die spanne in die semifinaal,” sê Deon Mouton, spanbestuurder van Reho Falcon.
Die swart truie van Reho Falcon het 'n trotse geskiedenis as 'n span wat tot uitstekende rugby in staat is, maar die afgelope seisoen is deur 'n gebrek aan ervare spelers gekenmerk en die klub moes gereeld sy eerste en tweede spanne, of soms albei, onttrek.
'n Betekenisvolle belegging van geld en ander hulpbronne sal nodig wees om Reho Falcon (die land se kampioenklub in 2007 en 2011) terug op 'n gesonde pad te plaas.
'BAIE TROTS OP HULLE'
Unam se afrigter, Johan Diergaardt, sê: “Ek dink dit was ten spyte van die wegholtelling die moeite werd om die wedstryde (met eerste en tweede span) te gaan speel.
“Ons kon 'n paar opsies toets en dit was goeie voorbereiding vir komende naweek se semifinaal. Om 'n wedstryd te speel, is altyd beter voorbereiding as om net te oefen.
“Dan is dit natuurlik weer lekker om boaan die liga te eindig. Ek dink ons spelers het hard gewerk hiervoor en het deur die seisoen baie ontwikkel.
“Met sowat twaalf Unam-spelers gereeld onbeskikbaar weens nasionale verpligtinge, moes die jonger manne opstaan en hard werk. Ek is baie trots op hulle.”
Die premierliga se finale stand ná 14 wedstryde elk: Unam 54, Wanderers 51, United 45, Rehoboth 31, Suburbs 28, Kudus 24, Falcon 1.
Diergaardt se Unam-span is verlede jaar in 'n klipharde semifinaal deur United uitgeskakel, voordat Wanderers die finaal met 30-22 beklink het.
Die vorige drie jare (2015-2017) het Unam 'n opeenvolgende string titels, die eerstes in sy bestaan, beklink.
• In die reserweliga het Unam se tweede span ook Saterdag goed afgesluit deur Reho Falcon met 75-17 deurmekaar te hardloop.
Nogtans eindig Wanderers II boaan die puntelys van die reserweliga en kom dus in sy halfeindstryd teen Western Suburbs se tweede span te staan. Unam II teen Rehoboth II is dus 'n voorgereg vir die premierliga-semifinaal tussen dié twee klubs.
Kommentaar
Republikein
Geen kommentaar is op hierdie artikel gelaat nie