'Uitgehonger en aangerand'

Polisiebrutaliteit beweer

08 February 2019 | Misdaad
Catherine Sasman - Die Namibiese polisie ontken dat verhoorafwagtende gevangenes in aanhoudingselle by die Windhoekse polisiekantoor aangerand en uitgehonger word.

'n Bekommerde ma van Port Elizabeth, in Suid-Afrika, wie se 19-jarige seun, mnr. Wesley Welgemoed, die afgelope ses maande in aanhouding is, het verlede maand 'n desperate brief aan die menseregteorganisasie NamRights gerig waarin sy vir hul ingryping pleit.

Welgemoed is op 19 Julie 2018 saam met drie ander mense deur die dwelmeenheid in hegtenis geneem toe dwelms met 'n straatwaarde van N$200 000 glo by ’n huis in Kleine Kuppe in die hoofstad gevind is.

Sy drie medebeskuldigdes is 'n Britse burger wat in Suid-Afrika bly, mnre. Lee Jenkins (19), die Namibiër Buruxa Buru Butkus (30) en sy Duitse verloofde, me. Verena Salzmann (30).

Salzmann is op borgtog van N$30 000 vrygelaat.

Die Namibiër is borgtog geweier en die twee Suid-Afrikaners bly in aanhouding omdat gevrees word hulle is ’n vlugrisiko.

MA SE PLEIDOOI

Die ma, wie se naam weerhou word, het op 11 Januarie beweer die gevangenes het enkele dae “geen kos” ontvang nie.

Dít was glo ook in November en Desember die geval.

“Dit is totaal onaanvaarbaar om iemand aan te hou en hulle nie te voer nie – dis onmenslik!” het die ma geskryf.

“Hulle kry nie eens brood nie, niks nie.”

’n Vriendin van die ma, wat in Windhoek woon en anoniem wil bly, het gesê hulle moes daagliks wegneemkos vir die verhoorafwagtendes neem.

Sy het gesê die verhoorafwagtendes kry dikwels net pap of afgewaterde sop (wanneer beskikbaar) en suikerwater.

’n Polisiebeampte het glo een keer die kos wat die vriendin aangedra het op die vloer gegooi en beveel die gevangenes moet dit van die vloer af optel.

Sy sê hul kos word glo ook dikwels deur ander gevangenes gesteel.

Volgens die vriendin is daar in die winter nie warm water beskikbaar nie, ook nie skoonmaakmiddels of insekweerders teen die kakkerlakke nie, en geen toiletware nie.

Daar is wel glo baie dagga, sê die vriendin.

“Dit lyk of daar dwelms oral is; die daggawalms hang dik in die lug wanneer jy na die aanhoudingselle gaan," sê sy.

Die ma het gesê sy is bekommerd daaroor dat die omstandighede in die selle “te veel” vir haar jong seun word, wat al so lank “sonder enige struktuur, programme, oefening of berading” agter tralies is.

Die vriendin het gesê Welgemoed kla van spierkrampe omdat hy nie aktief is nie en Jenkins het glo al drie keer longinfeksies gehad.

Jenkins is na bewering ook al erg deur selmaats, dikwels geharde misdadigers, aangerand en is glo nie hospitaal toe gevat toe hy ná een van die aanrandings sy bewussyn glo kort-kort verloor het nie.

Dit gaan nou na wat verneem word “beter” met hom.

“Ons moes baklei om Lee by ’n hospitaal te kry. Omdat hy wit is, het een van die bewaarders glo gesê 'Boere' gaan nie dood nie,” het die vriendin gesê.

Dié bewaarder is glo van die aanhoudingselle na die aanklagkantoor oorgeplaas.

Die vriendin beweer verder die manlike beskuldigdes is aangerand toe hulle in Julie in hegtenis geneem is.

Sy het gesê toe die twee Suid-Afrikaners gedwing is om opstote te doen, is hulle glo tussen die bene geskop.

Gewere is na bewering teen hul koppe gehou.

Butkus is glo só erg aangerand omdat hy vermoedelik probeer weghardloop het, dat hy 10 dae lank in die hospitaal was.

‘KOS IS BESKIKBAAR’

Die Khomasstreek se koördineerder van misdaadondersoeke, adj.komm. Abner Agas, het op navraag van NamRights gesê 'n ondersoek is van stapel gestuur oor die beweringe dat daar nie kos is nie.

“Kos is vir alle gevangenes in die Khomasstreek, insluitende Windhoek se aanhoudingselle, beskikbaar. Daar was in die verlede en daar is steeds kos vir elke gevangene in aanhouding,” was Agas se slotsom ná die ondersoek.

’n Woordvoerder van die Namibiese polisie, hoofinsp. Kauna Shikwambi, het by navraag Agas se stelling beaam en gesê daar steek geen waarheid in die gevangenes se beweringe nie.

“Die polisie doen als in hul vermoë om te verseker verhoorafwagtendes landswyd word, soos voorgeskryf, gevoer, en in gevalle waar daar ’n vertraging in aflewerings van verskaffers is, word reëlings getref om te verseker die gevangenes kry kos," het Shikwambi gesê.

Sy het gesê gevangenes word volgens voorgeskrewe internasionale voedingsvereistes van kos voorsien.

Dit sluit in ’n verskeidenheid vrugte, groente, droë kos, vleis, hoender, vark en vis “om net 'n paar te noem”, het sy gesê.

Shikwambi het gesê dit is ongelukkig dat alle gevangenes nie van die spyskaart by die verskillende aanhoudingselle hou nie, maar familie word wel toegelaat om kos vir hulle te neem.

Oor die bewerings van aanranding het Shikwambi gesê sy is “vertroulik” ingelig dat geen verslag oor die aanranding van gevangenes gerapporteer of geregistreer is nie.

Gevangenes kan wel enige klagte van aanranding by die betrokke beamptes aan diens aanmeld.

VIER PLEIT ONSKULDIG

Die vier beskuldigdes het onskuldig op dwelmklagte gepleit en hou vol geen dwelms is in hul besit gevind toe hulle einde Julie 2018 in hegtenis geneem is nie.

Volgens hofdokumente het die polisie die dwelms, wat in die huis in Kleine Kuppe gevind is, eers op 26 Julie verpak en verseël.

Die polisie het na wat verneem word ook nie lasbriewe of toestemming gehad om die huis tydens die nag van die inhegtenisnemings te deursoek nie.

Die saak teen die vier duur op 28 Februarie voort ná dit verskeie kere hangende die ondersoek uitgestel is.

Soortgelyk

 

Operasie Kalahariwoestyn hervat

6th of August 15:56 | Polisie

Die omstrede teenmisdaadoperasie Kalahariwoestyn hervat eerskomende Maandag.Die nasionale polisiewoordvoerder, adj.komm. Edwin Kanguatjivi, het Dinsdagmiddag in Windhoek gesê die veldtog en sy voorganger, Hornkrantz, help om...

Chasing your dream

15 ure gelede | Mense

Ester Kamati Aina Johannes completed her matric at Windhoek High School in 2015 and is currently pursuing her studies in marketing management at the International...

Kinderverkragter: ‘Ek is skuldig’

15 ure gelede | Howe

Francoise Steynberg - Die 50-jarige Jeremia van Wyk het gister skuldig gepleit op die verkragting en ontvoering van ’n vyfjarige meisie. Pas nadat Van Wyk gisteroggend van...

/Khomani wil verskeie Khomas-plase onteien

15 ure gelede | Politiek

Catherine Sasman - Die /Khomani-gemeenskap eis nie net die onteiening van plekke soos Dordabis, Aub en Omitara omdat dit aan hul voorvaders behoort het nie,...

Windhoekers kniediep in die skuld

15 ure gelede | Regering

Denver Kisting – Die Windhoekse stadsraad (CoW) het gister by monde van sy woordvoerder, mnr. Harold Akwenye, bevestig hul debiteure skuld hulle bykans N$900 miljoen...

Weer vir 6 Augustus 2019

15 ure gelede | Weer

BINNELAND: Gedeeltelik bewolk en baie warm in die Noordooste. Elders sal dit sonnig en baie warm wees, maar matig tot warm in die Suide. Dit...

Maltas Club reaches out

15 ure gelede | Onderwys

Ester KamatiIn conjunction with First National Bank (FNB) Namibia, the University Centre for Studies in Namibia (Tucsin) and Dinapama Manufacturing and Supplies, the Maltas Club...

Making science easier

15 ure gelede | Onderwys

Justicia Shipena B2Gold Namibia, in collaboration with the education ministry, officially launched the flagship Little Shop of Physics (LSOP) teacher programme on 2 August...

Embracing differences

15 ure gelede |

Justicia Shipena As a way of bringing together and uniting the different cultural groups within the International University of Management (IUM) community,...