Twee gesinne in rou gedompel

Tragedie tref Rehoboth

17 August 2018 | Ongelukke
Denver Kisting - Minder as twee weke nadat 'n eenjarige kind op Walvisbaai onder 'n motor beland het en doodgery is, het 'n soortgelyke tragedie Rehoboth getref.

Eldine Claasen, wat een jaar en een maand oud was, was eergistermiddag in haar pa se sorg by die motorwassery waar hy werk.

Omstreeks 17:00 het 'n 24-jarige vrou 'n boks vleis by die wassery gaan oplaai.

Terwyl dié vrou die vleis in haar motor gelaai het, het Eldine ongemerk onder die voertuig ingekruip.

Adj.komm. Eric Clay, polisiekoördineerder van die Hardapstreek, het gister gesê die vrou het begin ry en só per ongeluk oor Eldine gery.

Personeel van die wassery het haar gestop net voor sy deur die hek gery het om haar in te lig oor wat gebeur het.

Sy en die baba se pa het die baba opgetel en met haar hospitaal toe gejaag.

Clay sê die baba is egter met haar aankoms by die staatshospitaal op Rehoboth dood verklaar.

Die polisie ondersoek 'n saak van strafbare manslag, het die senior polisiebeampte gesê.

Republikein verneem die vrou se eie baba is so oud soos die ontslape baba.

Op Vrydag 3 Augustus is 'n ander peuter, ook een jaar oud, voor 'n huis in Kuisebmond op Walvisbaai doodgery.

Hoofinsp. Kauna Shikwambi, 'n polisiewoordvoerder, het vroeër dié voorval bevestig.

Volgens haar het dié kind ook ongemerk onder 'n voertuig beland.

Dié motor was omstreeks 13:15 op daardie dag voor die huis geparkeer.

Toe die 32-jarige bestuurder die voertuig aanskakel en ry, is die baba noodlottig getref.

Shikwambi het gister by navraag na dié voorvalle as tragies verwys.

“Dit is baie hartseer.”

Intussen sê die Windhoekse kliniese sielkundige, dr. Shaun Whittaker: “Die dood van 'n kind tref altyd die hardste.”

Hy het benadruk dat iemand agter die stuurwiel tydens só 'n tragedie en diegene wat dit aanskou, vir maande aan skok kan ly.

“Dit moet emosioneel baie pynlik wees.”

Volgens hom word iemand met wie dít gebeur, deur skuldgevoelens gekasty. “Hulle moet deur geweldige emosionele wroeging gaan.”

Whittaker sê 'n mens se hart gaan ook uit na die naasbestaandes van die peuters. “Dit vat baie lank om so iets te verwerk. 'n Mens moet aanvaar die rouproses is ongelukkig 'n baie lang proses en almal sê die (verwerking van die) dood van 'n kind is 'n selfs meer ingewikkelde proses.”

Sy raad is dat mens aktief met jou roureis moet omgaan.

“Mens hoop dat hulle hulself uiteindelik sal vergewe en kan aanbeweeg.”

Soortgelyk

 

Polisie konfiskeer kerk se luidsprekers in Oshakati

22 ure gelede | Plaaslik

Die polisie het luidsprekers wat aan die New Jerusalem Ministry in Oshakati se informele nedersetting Oneshila behoort, vandeesweek ná klagtes van rusverstoring gekonfiskeer.Volgens inspekteur Thomas...

Olifante beskadig optiese kabels naby Khorixas

23 ure gelede | Plaaslik

‘n Trop olifante het inwoners in die Noorde van die land sonder landlyn- en selfoonverbinding gelaat, nadat die optiese kabel tussen Omatjete en Khorixas Donderdagmiddag...

Skietklub lê weer aan

1 dag gelede | Howe

Denver Kisting - Mnr. Norman Tjombe, die regsverteenwoordiger van die Rehoboth-skietklub, het vanoggend (Vrydag) bevestig sake is terug na normaal.Dít kom nadat die Namibiese weermag...

'Boere se veglus verdwyn'

1 dag gelede | Landbou

Ronelle Rademeyer en Elvira Hattingh - Twee bekende boere van die Suide sê die droogte het boere op hul knieë.“Ek was gister by ’n veiling...

Egpaar herontdek skaars plantjie

1 dag gelede | Omgewing

Denver Kisting – ’n Dekaan by die Namibië Universiteit van Wetenskap en Tegnologie (Nust), dr. Rolf Becker, en sy vrou, me. Alma Moller, het verlede...

Kalender 18 Januarie

1 dag gelede | Kuns en vermaak

Nou aan die gang» Die Nasionale Kunsgalery van Namibië (NAGN) bied met trots Unam se beeldende kunste-uitstalling vir 2018 aan. Dié uitstalling is tans...

'DRK maak staat op ons'

1 dag gelede | Politiek

Inwoners van die Demokratiese Republiek van die Kongo (DRK) maak staat op lande deel van die Suider-Afrikaanse Ontwikkelingsgemeenskap (SADC) om die land weer op die...

Operasie Hornkranz: Meer misdaad aangemeld

1 dag gelede | Misdaad

Augetto Graig Die Namibiese polisie het Woensdag by die Israel Patrick Iyambo-polisiekollege in Olympia terugvoering gegee aan die visepresident, mnr. Nangolo Mbumba, en die...

Weer vir 18 Januarie

1 dag gelede | Weer

BINNELAND: Sonnig en warm tot baie warm in die //Kharasstreek, andersins gedeeltelik bewolk en baie tot bloedig warm met 'n paar tot geïsoleerde donderbuie in...