Troukoors loop hoog ­ondanks pandemie

20 November 2020 | Byvoegsels
Vanjaar is sowat 120 inskrywings vir Republikein se Bruidspaar van die Jaar-kompetisie ontvang.

Uit die 120 paartjies het Joel en Rebecca Eelu uiteindelik die meeste harte gesteel en dié egpaar is by vanjaar se Namibië Toerisme Ekspo (NTE) as 2020 se gunsteling-bruidspaar aangewys.

Vir Joel en Rebecca, wat redelike privaat is, was dit 'n uitdaging én 'n mylpaal om vir die kompetisie in te skryf. Sedert hulle ontmoeting in 2014 is hul liefde op die sterk fondasie van vriendskap gebou.

Hulle het deur 'n gemeenskaplike kennis ontmoet – Lydia, Joel se suster en Rebecca se beste vriendin.

Aanvanklik was die paartjie se verhouding ook soos dié van 'n broer en suster, maar dit het mettertyd in iets meer ontwikkel. Kort voor lank het dié twee net oë vir mekaar gehad.

Die avontuurlustige paartjie geniet dit om saam rond te rits. Hulle gaan gereeld op kampuitstappies en was gelukkig om al na Johannesburg, Kaapstad, Durban, Parys, Amsterdam en Brugge te reis.

“Ek en Joel is bekend vir ons opregte lag,” vertel Rebecca. “Met die verloop van tyd het ons mekaar leer ken oor reise, speletjies-aande en etes. Ek het op Joel se energie, sy grappies en entoesiasme, verlief geraak.”

Hy sê weer hy het verlief geraak op haar glimlag, vreugde, vrygewigheid en veral haar kookkuns.

Die twee is op 5 Julie verlede jaar getroud. “Ons troudag was tradisioneel in die Ruacana ELCIN-kerk voor familie en vriende. Ons het twee onthale aangebied, die eerste op Ruacana, waar ek grootgeword het, en die tweede by Joel se familie op Elim. Ons het ons eie troubeloftes geskryf, hartlike toesprake van vriende en familie gehad en 'n paar speletjies gespeel as deel van die onthaal. Die belangrikste is dat ons ons voete seer gedans het!”

Dit is 'n Oshiwambo-tradisie om meer as een onthaal te hou en selfs tot 'n weeklange bruilofsfees te hou.

Joel se gesin was meer as gewillig om na die huweliksreëlings om te sien en hulle was opgewonde om Rebecca amptelik in die gesin te verwelkom.

“Dit was voorwaar 'n stresvrye dag. As 'n bakker kon ek help om die troukoek van my drome te laat verwesenlik, en 'n vriend het dit gebak. Ek en Joel bedryf albei besighede saam met ons beroepe en ons hoop dié passies sal ons toelaat om af te tree op 'n plaas naby Windhoek, natuurlik terwyl ons nog af en toe reis,” het Rebecca gesê.

Toe die twee aan die begin van die jaar vir die kompetisie ingeskryf het, het hulle gesê hulle “neem dit stadig en geniet die getroude lewe voor hulle besluit om kinders te hê.” Maar dit was inderdaad 'n jaar vol verrassings en hulle het twee maande gelede 'n babadogtertjie verwelkom.

Hulle beskryf 2020 as 'n “dol, maar ongelooflike” jaar. Behalwe vir die Eelu-gesin wat nou een ryker is, het hulle as die wenners van die bruidspaar-kompetisie weggestap met benydenswaardige pryse. Die paartjie sê hulle is innig dankbaar vir almal wat vir hulle gestem het. Hulle beplan reeds 'n reis na Shipwreck Lodge in Januarie volgende jaar, as deel van die wenpakket.

Intussen sien hulle net uit na nog reise, en gehaltetyd met vriende en familie. Die twee sal volgende jaar die spesiale beoordelaars van die 2021 Bruidspaar van die Jaar-kompetisie wees.

Hul raad vir paartjies wat in die toekoms wil inskryf: Geniet dit! Moenie te veel dink nie, probeer van die kamera vergeet. “Getroude paartjies vergeet dikwels om pret saam te hê. Dit sal nie gebeur as julle mekaar se beste vriende is nie.”

Joel en Rebecca sien uit om saam as 'n getroude paar en as gesin te groei, en sê hulle kan nie wag om mekaar nóg beter te leer ken nie.



REPUBLIKEIN SE BRUIDSPAAR VAN DIE JAAR-KOMPETISIE 2021

Die proses:

Paartjies wat vanaf April 2020 tot einde Maart 2021 getrou het, is welkom om in te skryf. Die afgelope twee jaar is 'n gemiddeld van 130 inskrywings ontvang van paartjies van oraloor die land. Daarna is daar 'n beoordelingspaneel (wat gewoonlik bestaan uit 'n fotograaf, skoonheidstegnoloog en iemand in die troubedryf) wat 30 semifinalispaartjies kies. Die top-10 word deur die publiek bepaal wat via SMS vir hul gunstelingpaartjies stem. Die finale wenners word tydens die NTE deur 'n tweede beoordelingspaneel gekies.



Pryse:

Hierdie jaar was meer as N$240 000 se pryse op die spel te danke aan ver­skeie borge soos Trip Travel wat van die begin af by die kompetisie betrokke is.

“Hierdie jaar was veral vir almal moeilik, so ons is werklik dankbaar vir alle ondersteuning wat borge gegee het. Ons hoop om nog 'n lang pad saam met hulle te stap!“ sê Gerine Hoff, die organiseerder van die kompetisie.

Raad vir paartjies wat wil inskryf:

Maak seker julle foto's is “wow“! Die brief wat julle saamstuur, is ewe belangrik. Dit gee die beoordelaars insae in julle verhouding!



Toekomsplanne:

Volgende jaar is 'n groot jaar, want die kompetisie is dan 'n dekade oud! En dit bly so gewild soos altyd! Republikein probeer elke jaar (veral vir die finaal) iets nuuts uitdink om die finaliste uit te daag en uit hulle gemaksones te kry; maar die basis bly altyd dieselfde, naamlik dat dit lekker en pret moet wees!

Volgende jaar se finaal is in hierdie stadium vir 6 November (weer tydens die NTE) geskeduleer. Nog inligting sal mettertyd bekend gemaak word oor wanneer die inskrywings open.

Soortgelyk

 

Gesondheidswerkers, leerlinge en onderwysers deel van 343 nuwe gevalle

1 uur gelede | Gesondheid

Sewe Covid-19-verwante sterftes is vandag aangekondig en wel vier in Windhoek, twee in Swakopmund en een in Grootfontein. Die sterftes in Windhoek sluit 'n 63-jarige...

Moller, Hatuikulipi se belange onder vergrootglas

16 ure gelede | Misdaad

Hoofredaksie – Een van die transaksies wat deur die Teenkorrupsie-kommissie (ACC) as deel van die Fishrot-ondersoek gefynkam word, is 'n bedrag van N$8 miljoen wat...

Rekening van N$151 000 bly toe 'jakkals' gly

16 ure gelede | Misdaad

Francoise Steynberg – 'n Vermeende glyjakkals wat vir 'n maand saam met sy gesin in 'n gastehuis op Swakopmund gebly en glo nie betaal het...

Mans vas oor vervalsing van Covid-19-toetsuitslae

16 ure gelede | Misdaad

Kristien KrugerTwee Zimbabwiese mans is Saterdag omstreeks 12:00 op Katima Mulilo in hegtenis geneem vir die besit was vervalste Covid-19 laboratoriumtoetsverslae van PathCare Namibië.Die mans...

Reënweer bring groot skade

16 ure gelede | Weer

Kristien Kruger – Terwyl Namibië die derde week van swaar neerslae binnegaan, is groot skade reeds aan paaie, landerye en ander infrastruktuur aangerig. Windhoekers is...

Weer vir 11 Januarie 2021

16 ure gelede | Weer

BINNELAND: Gedeeltelik bewolk en baie warm in die Noordweste, verre Weste en dele van die //Kharasstreek. Elders sal dit bewolk en warm tot baie...

Regering slaan toe op klaringsagente

16 ure gelede | Regering

Phillepus Uusiku – Die regering is in die finale fase van die instelling van strenger maatreëls vir die lisensiëring van klaringsagente.Die instellings beoog om die...

Nafau wen in hof teen Shoprite

16 ure gelede | Arbeid

Kristien Kruger en Adolf Kaure – Stakende Shoprite-werknemers was Vrydagmiddag verjuig toe die hoërhof in Windhoek beslis het dat ’n interdik teen die Shoprite-winkelgroep uitgereik...

Op die spoor van Hardapdam se opvangsgebiede

16 ure gelede | Infrastruktuur

Kallie Pauw (gasskrywer)Die onlangse wonderlike reën in groot dele van Namibië en verslae daaroor en foto's van vol riviere en dansende boere het mense (soos...