Treurspel op pad by Spitzkoppe

05 January 2017 | Ongelukke
Des Erasmus

‘n Agttienjarige meisie, Simoné Gloeditzsch, het vasgepen in die kajuit van ‘n bakkie aanhoudend en lank op die toeter gedruk in ‘n poging om hulp te ontbied na ‘n ongeluk wat uiteindelik die lewe van haar pa, Bennie Gloeditzsch, op die woestynpad tussen Hentiesbaai en Usakos geëis het.

Die ongeluk het Maandagmiddag net voor sesuur gebeur en die dood van Gloeditzsch het Dinsdagmiddag teen die middaguur in ‘n Windhoekse hospitaal ingetree.

In daardie stadium was me. Carla Gloeditzsch en haar twee jonger dogters reeds op pad na Okahandja met die tyding van die ongeluk wat hulle in die omgewing van Wilhelmstal tussen Karibib en Okahandja bereik het. Simoné was aan een van haar bene vasgepen in die wrak van die ligte vragmotor waar dit op die stuk van die pad gerol het wat baie sinkplaat en sleg uitgery was. Van waar Simoné vasgepen was, kon sy sien waar haar pa gelê het nadat hy in die slag van die ongeluk uitgeslinger is. Hy het stil op sy maag gelê.

Die noodlottige ongeluk het ‘n einde gebring aan ‘n vakansieseisoen wat vanjaar in die Erongostreek deur ‘n skerp afname in padongelukke gekenmerk was. Op Swakopmund het dit Dinsdagmiddag ‘n seisoen gebly van baie mense wat by swemplekke in diep water in die moeilikheid beland het. Dinsdagmiddag was dit twee besoekers uit Botswana wat by Myl 4 uit diep water gered moes word. Die enigste verdrinking was op Kersdag toe 'n agtienjarige meisie by Pebble Beach verdrink het.

Volgens beskikbare inligting was lede van die Gloeditzsch-gesin besig om hulle vir ‘n besoek aan Duitsland voor te berei. Terwyl nog op sekere reisdokumente gewag is, het me. Gloeditzsch en die twee jonger dogters vooruit gery. Die eerste hulp op die ongelukstoneel op die pad wat van Hentiesbaai by die Spitzkoppe verby lei, was ‘n konvooi met toeriste. ‘n Insleepdiens van Usakos en paramedici van nooddienste was kort daarna op die toneel.

Simoné en haar pa is in afsonderlike ambulanse na die hospitaal op Usakos gebring, maar as gevolg van die erns van die toestand van veral mnr. Gloeditzsch is hulle na Windhoek oorgeplaas. Ernstige kommer het oor wyle Gloeditzsch se nek- en bobeenbeserings bestaan.

Gloeditzch was in sy dertigerjare. Op skool was hy ‘n bekende rugbyspeler van die Hoërskool Walvisbaai en het die span as flank verteenwoordig toe die Walvisbaaiers die Metropolitan Superliga in 2002 die eerste keer in 28 jaar gewen het. In die kompetisie was hy in die halfeindstryd teen WHS en die eindstryd teen Otjiwarongo een van sy span se driedrukkers.

Op Swakopmund het twee besoekers Dinsdagmiddag by Myl 4 in diep water beland net suid van die plek waar ‘n verdrinking op Kersdag aangemeld is. Dié keer was dit strandgangers wat die swemmers gered het. Personeel van noodbystansdienste met hul voertuie was ook gou op die toneel.

Dit was ‘n vakansieseisoen wat deur swemmers met probleme in diep water gekenmerk was. Dinsdagmiddag moes die twee mense van Botswana uit die water gered word met nog 23 strandgangers wat in verskeie ander voorvalle in nood verkeer het.

Laat gistermiddag is nog ‘n noodlottige ongeluk op die pad tussen Uis en Khorixas bevestig. Die ongeluk het blykbaar al in die Nuwejaarsnaweek gebeur en die oorledene is volgens beskikbare inligting ‘n oorsese toeris. Die besoeker het gesterf toe ‘n dubbelkajuitbakkie sowat 45 km buite Uis op die pad na Khorixas in ‘n drif gerol het. Die oorledene is uit die bakkie geslinger met die rollende wrak wat bo-op hom beland het. Besonderhede oor die ander insittendes was nie teen druktyd beskikbaar nie.

Onderskrif

Die toneel van die ongeluk wat Maandag die lewe van mnr. Bennie Gloeditzsch geëis het. Die oorledene het in Windhoek aan sy beserings gesterf.

Bennie Gloeditzsch met leeus as sy speelmaats. Die foto is Maandag op sy facebookblad geplaas.

Bennie Gloeditzch as gesinsman met een van sy drie dogters. Foto’s verskaf

Soortgelyk

 

Bejaarde erg getraumati­seer

5 ure gelede | Gesondheid

Henriette Lamprecht'n Bejaarde inwoner van Windhoek wat van 'n rolstoel gebruik maak, het vandeesweek vir ure in haar ontlasting in 'n hospitaalgang vir 'n prosedure...

Rooies Mostert in eiendomsgeskil

5 ure gelede | Misdaad

Denver Kisting – Mnr. Walter (Rooies) Mostert, ’n oudlanddros, staar strafregtelike klagte in die gesig weens ’n eiendomstransaksie wat skeefgeloop het.Luidens dokumente in Republikein se...

Weer vir 19 April

5 ure gelede | Weer

BINNELAND: Gedeeltelik bewolk en matig tot warm in die //Kharasstreek, maar baie warm in die Noorde. Elders sal dit mooiweer en baie warm wees. KUS:...

Inbrekers steel derduisende by SKW

5 ure gelede | Misdaad

Denver Kisting – Teen gistermiddag was daar nog geen sent teruggevind van die N$220 000 kontant wat die naweek by die Sport Klub Windhoek (SKW)...

Piramideskema: Trio skuldig op 512 klagte

5 ure gelede | Howe

Ronelle RademeyerDie bedrog-trio van Oranjemund wat van 2004 tot 2006 'n piramideskema bedryf het waarin beleggers sowat N$11,5 miljoen verloor het, se doppie is geklink.Regter...

Oranjemund maak spiere vir toerisme

5 ure gelede | Gebeure

Môre (Vrydag) bied Namibië se nuutste dorp, Oranjemund, ‘n toerismemark aan.Die geleentheid vier ook die dorp se nominering as ‘n finalis in Namibia Media Holdings...

Skole, koshuise in 'toestand van verval'

5 ure gelede | Ministeries

Henriette LamprechtSowat 85% van openbare onderwysgeriewe in Namibië is in 'n toestand van verval, terwyl die ontwikkeling en rehabilitasie daarvan teen 'n slakkepas beweeg. Die...

PDM lê Sona-eier

5 ure gelede | Regering

Denver Kisting Mnr. McHenry Venaani, leier van die amptelike ­opposisie, beweer president Hage Geingob en sy binnekring woon in 'n ander land as die...

Spensdeure klap oop oor kaas en kontreikos

5 ure gelede | Gebeure

Des Erasmus - Die bystand van deskundiges uit Suid-Afrika is ingeroep in die eerste stappe wat gedoen word om Namibië se kaasmakersbedryf te standaardiseer en...