Tragedie tref toergroep

Bus, bagasie brand uit

11 November 2019 | Ongelukke
Iréne-Mari van der Walt op Swakopmund - Altesaam 34 Duitse toeriste se Namibiese reis is kortgeknip ná hul “Rotel”-bus aan die brand geslaan het.

Die bus het Vrydag op die C14-pad in die omgewing van die Kuiseb-canyon aan die brand geslaan. Al die insittendes is ongedeerd, maar is al hul bestittings kwyt.

Mnr. Peter Hess, die busbestuurder, het gesê die oorsaak van die brand is onbekend. Hy meen dit kon die remme links agter gewees het wat die brand veroorsaak het.

Die toergids, mnr.Roland Kordy, het gesê hulle het alles in hul vermoë gedoen om die vlamme met die twee brandblussers aan boord te blus, maar die toeriste moes uiteindelik terugstaan en toekyk hoe die vlamme die hotelbus verswelg.

“Die brandblussers was nie genoeg nie. Ná 10 minute was daar nie meer ’n bus nie,” het ’n geskokte Kordy gese.

Volgens hom het byna die helfte van die toeriste hul passpoorte in die vlamme verloor.

“Hulle het al hul besittings verloor wat op die bus was.”

Die toeriste het Vrydagaand by Hotel Zum Kaizer op Swakopmund tuisgegaan voor hulle teen 09:00 Saterdag ’n toer met Charly’s Desert Tours onderneem het.

Me. Anett Kötting, Hotel Zum Kaiser se bestuurder, vertel hoe die toergroep klerewinkels ná die voorval moes pak.

“Een van die vroue in die groep het gesê sy dra nooit haar reisdokumente en geld in haar tas nie. Sy dra dit altyd by haar, maar die toergids het hulle aangeraai om nie waardevolle items by hulle te hou nie. Met misdaad is jy liewer veilig, maar dit was net so ongelukkig,” sê Kötting.

'SLEGTE PAAIE'

’n Bron in die toerismebedryf, wat verkies om anoniem te bly, is hoogs ontsteld oor die voorval.

“Ek kry daagliks toeriste wat by my instap en van verligting sug voor hulle sê ‘sjoe, ons het dit gemaak, is al jul paaie so sleg?’

“Die pad waarop die voorval plaasgevind het, is veral moeilik. Ek dink dit is tyd dat ons ophou om die pad op te gradeer, en tyd om die paaie te teer. Ons paaie is sleg. Dis tyd dat iets daaraan gedoen word.”

Die groep het gister na Windhoek vertrek en gaan nuwe noodreisdokumente van die Duitse ambassade ontvang.

Die toer sou tot 16 November duur, maar die brand het dié planne kortgeknip.

Kordy sê die groep sou in die komende week na Spitzkoppe en Etosha reis voor hulle eers na Windhoek en dan Europa sou terugkeer.

“Dit was vir ons baie stresvol. Ek ly steeds aan skok,” het Kordy Saterdagoggend gesê, “maar ons sal probeer om ons toeriste sover moontlik te akkommodeer.”

'ROTEL'

Die Rolling Hotel of “Rotel” is inderwaarheid ’n mobiele hotel.

Die voertuie word in Duits rollende Hotels genoem, en word besit deur die Duitse maatskappy Rotel Tours, ’n onderneming van 55 jaar, wat met 60 toergidse reise deur Europa, Afrika en Noord-Amerika aanbied.

Die voorste helfte van die voertuig lyk soos enige ander toerbus, maar die agterste helfte lyk beduidend anders.

Die sleepwaentjie word bedags (onbeman) agter ’n gewone motorbus aan getrek.

Snags word die lang tuig by ’n hotel geparkeer. Dit bevat sowat 26 afsonderlike slaapkamers en daar is ook ’n toilet aan boord. Badkamergeriewe word by stilhouplekke voorsien.

OLIFANT TRAP TOERIS DOOD

Nóg ’n tragedie het ’n Europese toergroep getref toe ’n olifant Donderdagoggend ’n Oostenrykse man (59) in die Huabrivier in die Kunenestreek doodgetrap het.

Die ministerie van die omgewing en toerisme het aanvanklik berig die slagoffer is ’n Australiese toeris.

“Die plek waar die groep toeriste gekampeer het, is nie ’n gevestigde kampplek nie,” het die woordvoerder van die ministerie, mnr. Romeo Muyunda, gesê.

“Die ministerie betreur die voorval en spreek sy medelye uit. Ons en die polisie se ondersoek duur voort,” het hy gesê.

- [email protected]

Soortgelyk

 

Afrika en Namibië gereed coronavirussiekte (Covid-19)

2 ure gelede | Gesondheid

Die Wêreldgesondheidsorganisasie (WHO) se noodgesondheidsbeampte vir Namibië, dr. Petrus Mhata, sê die organisasie beveel nie enige reis- en handelsbeperkings met China vir lande in Afrika...

Regbank kan nie alleen pa staan vir tydige geregtigheid,...

2 ure gelede | Howe

Denver Kisting - Hoofregter Peter Shivute sê die publiek verwag ’n regstelsel wat geregtigheid spoedig en regverdig lewer.Hoewel die regbank hul bes doen om regverdigheid...

Fopnuus tydens die verkiesing

3 ure gelede | Politiek

Navorsers verbonde aan die Instituut vir Openbare Beleidsnavorsing (IPPR), mnr. Frederico Links en me. Martha Nangolo, deel vanoggend hul bevindings oor fopnuus wat voor, tydens...

Verskeie staatskole in Windhoek sonder water, krag

5 ure gelede | Onderwys

Meer as tien staatskole in Windhoek is reeds vir dae sonder krag en water, nadat toevoer deur die munisipaliteit afgesny is. Die skole wat geraak...

Hardapkrane lóóp

5 ure gelede | Landbou

Elvira Hattingh - Watertoevoer in die besproeiingskanaal op die Hardapskema het reeds 05:00 vanoggend weer afgeskop. Dit volg nadat NamWater se uitvoerende hoof, mnr. Abraham...

‘Skaapdiefstal’ lei tot treurspel ...

14 ure gelede | Howe

Francoise Steynberg - Die beweerde diefstal van 30 skape by ’n bekende ruskamp buite Keetmanshoop het Maandag glo tot die dood van ’n vermeende skaapdief,...

’n Uitspansel vol belofte

14 ure gelede | In beeld

Mnr. Ettienne Rossouw het dié foto gistermiddag om 15:00 in Suid-Namib geneem en op die Facebook-blad “Namibië Reënval” gedeel. “Kyk hoe bou die wolke. Belowend!”...

Itula slyp sy tande opnuut

14 ure gelede | Howe

Denver Kisting – Dae nadat die hooggeregshof beslis het Namibiërs keer nie terug stembus toe nie, het die voormalige onhafhanklike presidensiële kandidaat, dr. Panduleni Itula,...

Corona draai in parlement

14 ure gelede | Regering

Augetto Graig – Die Swapo-agterbanker en parlementslid me. Pendukeni Iivula-Ithana het gistermiddag die minister van hoër onderwys, opleiding en vernuwing, dr. Itah Kandjii-Murangi, oor die...