Tien topjoernaliste op glansaand bekroon

07 October 2019 | Gebeure
Ronelle Rademeyer



Tien van Namibië se voorste joernaliste is Donderdagaand tydens 'n glansgeleentheid deur die Redakteursforum van Namibië (EFN) vir uitnemende werk bekroon.

Dit is die eerste keer sedert 2010 toe die Media-instituut vir Suider-Afrika (Misa) joernaliste vir die laaste keer bekroon het dat joernaliste vanjaar weer hul beste werk kon inskryf en daarvoor beoordeel word.

Altesaam 96 inskrywings is van meer as 30 joernaliste ontvang, waarná 'n span van drie beoordelaars dit volgens vasgestelde kriteria beoordeel het. Hulle is die veteraanjoernalis Estelle de Bruyn, me. Emily Brown, senior lektor in kommunikasie aan die Namibië Universiteit vir Wetenskap en Tegnologie (Nust) en mnr. Nevanji Madanhire van Zimbabwe, wat ook 'n dosent in joernalistiek is.

Die Joernalis van die Jaar-toekenning is deur Nomhle Kangooti van The Namibian ingepalm vir 'n hartroerende artikel oor die impak van hepatitis E in Windhoek se informele nedersettings. Hierdie kategorie is deur FNB Namibia geborg.

Die wenners in die ander 10 kategorieë was as volg:

Mathias Haufiku is as die top- ondersoekende joernalis aangewys met sy berig “Intelligence Extravangaza” vir The Patriot. Dit is deur die EFN geborg.

Namibia Media Holdings se ondersoekende joernalis, Catherine Sasman, het die prys gekry vir die beste landbou- en omgewingsberig vir haar artikels oor die onwettige oes van inheemse bome in die Kavango. Feedmaster het hierdie kategorie geborg.

Lazarus Amukeshe, Shinovene Immanuel en George Turner het die kategorie vir besigheid en innovering (ook geborg deur FNB Namibia) ingepalm met 'n gesamentlike berig oor belastingontwyking deur die Langer Heinrich-myn.

Tuyeimo Haidula van The Nami­bian het in twee kategorieë, gemeen­skapsjoernalistiek en gesondheid en maatskaplike welsyn, gewen. Die kategorieë is deur die Namibia Broadcasters' Network (NCBN) en DW Akademie, asook deur Geka Pharma geborg.

Jana-Mari Smith van Namibian Sun het die prys vir beste onderwysjoer­nalistiek gewen, wat deur Nictus geborg is.

Dit was vir 'n berig getiteld “Free your mind through work”.

Die wenner van die beste potgooi-inskrywing was 99 FM se Kristy Watermeyer. Die kategorie is ook deur die EFN geborg.

One Africa Television se Isai Sipunga het die kategorie vir video­grafie, geborg deur die Regulerende Owerheid vir Kommunikasie in Namibië (Cran), gewen.

Hesron Kapanga van Nampa se foto-inskrywing van die verspring­atleet Sandro Diergaardt in aksie het aan hom die prys vir beste fotojoernalistiek besorg. Dit is deur Cecil Nurse Office Furniture geborg.

Sheefeni Nicodemus van The Namibian is as die beste sportjoernalis bekroon vir sy berig “Cosafa triggers NFA 'confessions'” – 'n kategorie wat deur Engen Namibia geborg is.

Die gasspreker by die geleentheid was die veelbekroonde Saoedi-Arabiese ondersoekende joernalis en filmmaker Safa al-Ahmad.

Sy het nou met die vermoorde Jamal Khashoggi saamgewerk.

Die EFN het 'n afskrif van die Windhoek-deklarasie, wat sy oorsprong byna 30 jaar gelede in Windhoek gehad het, postuum aan Kha­shoggi toegeken en Al-Ahmad het dit namens hom ontvang. Dit is deur die veteraan- ondersoekende joernalis en uitvoerende direkteur van die Namibia Media Trust, Gwen Lister, oorhandig. Sy was destyds instrumenteel in die opstel van dié deklarasie.

Al-Ahmad het gesê Khashoggi se dood het vir haar gewys “onderdrukkende, korrupte regerings” vrees joer­naliste.

“Ons is magtig. Ek dink ons vergeet dit. Joernalistiek wat reg gedoen word, kan regerings omverwerp; dit kan gemeenskappe verander.

“Ons as joernaliste kan beter doen. Ons móét beter doen,” was haar kragtige boodskap.

* Die koste van die dinee is deur FNB Namibia, Ohlthaver & List en die Namibia Media Trust geborg met bykomende borgskappe deur The Windhoek Collection, Komnick & Frank, John Meinert Printing en Gondwana Collection.

Soortgelyk

 

Man vas oor 'diamantsmokkelary'

37 minute gelede | Misdaad

'n Nambiese man is Vrydag in verband met diamantsmokkelary op die grenspos tussen Suid-Afrika en Namibië by Oranjemund in hegtenis geneem.Volgens die Namibiese polisie se...

Laat koppe rol - Jooste, SPYL

16 ure gelede | Politiek

Catherine Sasman - Stemme uit die regerende party dring toenemend aan dat diegene wat beskuldig word van korrupsie onder sy geledere verwyder word.Nadat die beleërde...

Gertze skiet glo vrou

16 ure gelede | Misdaad

Henriette Lamprecht – Die uitvoerende hoof van die Namibiese Kwalifikasieowerheid (NQA) het die naweek agter tralies deurgebring nadat hy na bewering sy vrou Saterdag in...

Namibiërs betoog oor korrupsie

16 ure gelede | Plaaslik

Tanja Bause - Meer as 200 mense van alle rasse en ouderdomme het Vrydag deelgeneem aan ’n teenkorrupsie-optog in Windhoek wat deur aktiviste gereël is....

Weer vir 18 November

16 ure gelede | Weer

BINNELAND: Gedeeltelik bewolk en baie tot bloedig warm met 'n paar donderbuie oor die verre Noordooste, andersins gedeeltelik bewolk en warm tot baie warm. Winderige...

Buitelandse mediese studente: Eksamen nietig verklaar

16 ure gelede | Gesondheid

Henriette Lamprecht – Die jongste pre-internskapevaluering van 297 studente wat medies in die buiteland studeer het, is nietig verklaar. Die evaluering is op 27 September...

Passasiers gestrand ná Frankfurt-botsing

16 ure gelede | Vervoer

Ronelle Rademeyer - Dit is in hierdie stadium nie bekend wanneer Air Namibia se vlugte tussen Frankfurt in Duitsland en Windhoek sal hervat nie.Dit volg...

Die kwaliteit van verkiesings

16 ure gelede | Politiek

Christie Keulder – Gereëlde vry en regverdige verkiesings is die rugraat van enige demokrasie.Die kwaliteit van verkiesings is daarom onontbeerlik vir die konsolidering van nuwe...

VERKIESINGS 2019: Regeringstrukture en die staatsdiens

16 ure gelede | Politiek

Die reeks neem politieke partye se manifeste oor sleutelkwessies in oënskou.ALL PEOPLE’S PARTY (APP)• Sny die uitspattige salarisse van openbare ondernemings (SOE’s) se direksie, uitvoerende...