Swapo neem dissiplinêre stappe teen lede

Stilswye oor “swartlys”

09 March 2017 | Politiek
Catherine Sasman - By Maandag se spesiale Swapo politburo-­vergadering is besluit om dissiplinêre stappe teen sekere lede vir beweerde wangedrag te neem.

Dié lede oortree glo die party se grondwet, maar doen hulself steeds as Swapo-lede voor.

Die party se sekretarisgeneraal, mnr. Nangolo Mbumba, wou Dinsdag by 'n mediakonferensie nie die name van diegene wat in die sop is, bekend maak tot hulle skriftelike kennisgewing van die dissiplinêre stappe ontvang het nie. Hy wou ook nie sê hoeveel lede vir dissiplinêre stappe oorweeg word nie.

Mbumba het gesê die vermeende “dwalende” lede sal mettertyd aangekla word. Daarby het die ­inligtingsekretaris, mnr. Helmut Angula, gesê die dissiplinêre stappe word geneem teen diegene wat “doelbewus” hul partylidmaatskap gebruik om partyhoofde en lede te beledig.

Die politburo, wat uit 26 lede bestaan wat die stigterspresident en oudpresident Sam Nujoma en Hifikepunye Pohamba insluit, het kommer uitgespreek oor die ­“formasie van nuwe bewegings deur bona fide-lede van die party en die blatante voortgesette minagting teenoor die partyleier­skap”.

Op Maandag se vergadering is onderneem om bepalings, reëls en prosedures van die party se grondwet, asook sy gedragskode toe te pas.

Die dissiplinêre komitee sal uit ses of sewe lede bestaan onder die voorsitterskap van die voormalige sekretaris­-generaal, mnr. Ngarikutuke Tjiriange.

Hoewel geen name verskaf is nie, blyk dit duidelik te wees dat stappe geneem gaan word teen diegene wat met die ­Beweging vir ­Grondlose Mense (LPM) verbind word.

Dit sluit in die ontsetelde adjunkminister van grondhervorming, mnr. Bernadus Swartbooi, mnr. Henny Seibeb en parlementslid, me. Ida Hoffmann.

Daar is ook gesuggereer dat ­dissiplinêre stappe moontlik teen die voormalige parlementslid, mnr. Kazenambo Kazenambo en die leier van die Regstellende Herposisionering (AR), mnr. Job Amupanda, asook die voormalige jeugliga-sekretaris, mnr. Elijah Ngurare, kan volg.

Seibeb het gesê hy het geen besonderhede oor wie voor die ­dissiplinêre komitee gaan verskyn nie.

Kazenambo, wat ook 'n lid van die politburo is, het gesê hy is nog nooit van 'n misdryf aangekla of as 'n rebel bestempel nie, omdat hy nog nooit aan 'n opstand binne of buite die land deelgeneem het nie.



'HEKSEJAG'

Amupanda het gesê die dreigende dissiplinêre proses is 'n poging om diegene wat aangedui het hulle het leier­skap-aspirasies, opsy te skuif in aanloop tot die ­partykongres in November.

Amupanda het onlangs aangedui hy is bereid om as kandidaat vir die posisie van sekretaris­generaal te staan.

Mbumba het gesê dit is “verregaande” om voor te stel dat lede van die politburo hul mag misbruik vir 'n heksejag.

Hy het kapsie gemaak teen 'n vraag wat gesuggereer het dat Swapo se topvier, pres. Hage Geingob, Mbumba, Laura McLeod-Katjirua en voormalige president ­Hifikepunye Pohamba, dubbele standaarde toepas ná gevind is hulle het nie die regte ­prosedures gevolg toe hulle drie AR-leiers geskors het nie.

Die politburo het ook die land se ekonomiese in­sinking bespreek.

Hulle het 'n beroep op die regering gedoen om kleinskaalboere te ­ondersteun sodat hulle produksie kan verhoog en dus werkge­leenthede en voedselsekuriteit kan verbeter.

Soortgelyk

 

Theo Mujoro is nuwe hoof van verkiesings

17 ure gelede | Politiek

Mnr. Theophilus (Theo) Mujoro is vanaf 1 September vanjaar vir ‘n tydperk van vyf jaar aangestel as die nuwe hoof verkiesingsbeampte van die Verkiesingskommissie van...

Nuwe spoedkameras getoets

18 ure gelede | Infrastruktuur

Die Namibiese polisie se verkeersbeamptes toets van gister af die werking van nuwe spoedkameras op Namibië se hoofpaaie. Veral in die Erongo- en Otjozondjupastreek word...

Onderwys: ‘Gebruik wat julle het om fondse in te...

19 ure gelede | Onderwys

Die minister van onderwys, kuns en kultuur, me. Katrina Hanse-Himarwa het ’n beroep op skole gedoen om beskikbare middele te gebruik om fondse vir hul...

Otjomuru-kliniek aan regering oorhandig

19 ure gelede | Gesondheid

Die Otjomuru-kliniek naby die Otjomuru-nedersetting sowat 27 km oos van Okangwati in die Kunenestreek, is aan die regering oorhandig. Die konstruksie van die kliniek was...

Nuwe visekanselier vir Unam

20 ure gelede | Onderwys

Die Universiteit van Namibië (Unam) sal voorleggings deur die vier kandidate vir die universiteit se visekanselierspos regstreeks op YouTube, Twitter, Facebook en hul webwerf uitsaai.Die...

Windhoek se krane dalk oor twee seisoene leeg ...

1 dag gelede | Omgewing

Elvira Hattingh - Windhoek het genoeg water om twee reënseisoene te dek, indien dit bykomende waterbronne in die Noorde, asook die Windhoek-akwifer onvolhoubaar gebruik én...

Wag die Skedelkus op Harry en sy bruid?

1 dag gelede | Toerisme

Des Erasmus - Prins Harry-koors teister die gebied tussen Hentiesbaai en die monding van die Kunenerivier op die noordgrens en die ooreenstemmende leeu- en renosterwêreld...

Weer vir 22 Junie 2018

1 dag gelede | Weer

BINNELAND: Koud aanvanklik in die binneland. Dit sal gedeeltelik bewolk en warm tot baie warm oor die verre Noordooste en die Khomasstreek wees. Elders sal...

Fosfaat-debat begin oor

1 dag gelede | Omgewing

Augetto Graig - Die ontginning van fosfaat op Namibiese seebodem is vir eers van die baan af. Die minister van die omgewing en toerisme,...