Swapo kry vuur van binne

Tandarts daag Geingob uit

21 October 2019 | Politiek
Denver Kisting – Die tandheelkundige dr. Panduleni Itula is onversetlik – hy weier om uit Swapo te bedank ondanks kritiek dat hy twee base dien.

Itula is Vrydag by die Verkiesingskommissie van Namibië (ECN) as onafhanklike presidensiële kandidaat vir die komende nasionale verkiesing bekragtig.

Hiermee kom hy onder meer te staan teen pres. Hage Geingob, Swapo-president en huidige staatshoof, en mnr. McHenry Venaani, president van die Popular Democratic Movement (PDM).

Volgens Itula dra hy die welstand van “die ganse Namibië” op die hart – ongeag hul politieke of geloofsoortuigings.

Hy beoog glo om inwoners se waardigheid kragtens artikel 8 van die Grondwet te herstel.

Swapo voel glo ’n veer

Swapo het Vrydag by monde van sy sekretaris-generaal (SG), me. Sophia Shaningwa, gesê Itula se bevestiging as onafhanklike kandidaat het niks met hulle te doen nie. “Nee, nee, nee, dit is nie my besigheid nie. Hoekom moet dit my besigheid wees?”

Sy meen die regerende party het geen probleem met onafhanklike kandidate mits hulle nie onder die vaandel van Swapo hul ding doen nie.

“Hy is ’n onafhanklike kandidaat – onafhanklik, onafhanklik, onafhanklik. So, die Swapo-party het geen kwessies met ’n onafhanklike kandidaat nie, solank ’n onafhanklike kandidaat nie onder Swapo se vlag is nie.”

Shaningwa moes haar Vrydagoggend in haar eie woorde onder polisiebegeleiding terughaas Windhoek toe nadat sy reeds naby die Internasionale Lughawe Hosea Kutako was op pad Gobabis toe, waar Swapo die naweek ’n byeenkoms gehou het.

Die voorsitter van die ECN, adv. Notemba Tjipueja, het gesê Shaningwa moes fisiek teenwoordig wees om Geingob as gemagtigde verteenwoordiger van die party as hul presidentskandidaat te bevestig.

Die SG het kort voor die 11:00-spertyd by die ECN se hoofkantoor aangehaas gekom.

“Hulle’t gedink hierdie is nou ’n baie goeie geleentheid vir hulle om gou die land oor te neem, omdat die groot olifant nie in die huis was nie en al die klein muise toe hul plek kon afbaken.”

Namibiërs gaan oor minder as 40 dae stembus toe om vir ’n nuwe staatshoof en lede van die Nasionale Vergadering te stem.

Ofskoon wetgewing voorsiening maak vir onafhanklike politieke kandidate om aan ’n verkiesing deel te neem, is kenners dit eens daar is moontlike struikelblokke in die praktyk.

Boonop, maan kundiges, is dit oneties om twee base terselfdertyd te dien.

Me. Yvonne Dausab, voorsitter van die Kommissie van Regshervorming en -ontwikkeling (LRDC), sê die grondwetlike bepalings kan geag word oop vir interpretasie te wees.

Sy sê die Grondwet maak die deur oop vir onafhanklike kandidate omdat die grondwetskrywers demokrasie wou beliggaam.

Kragtens artikel 28 (4) van die Grondwet mag enige geregistreerde party ’n presidentskandidaat benoem.

Hiernaas, lui dieselfde bepaling, mag “enige persoon wat deur ’n minimum aantal geregistreerde kiesers ondersteun word soos deur ’n parlementêre wet bepaal word geregtig wees om as (presidents)kandidaat benoem te word”.

Itula het na wat verneem word 500 handtekeninge van geregistreerde kiesers in elk van die 14 streke bekom.

Dausab het onlangs in ’n paneel gedien wat die kwessie op Talk of the nation, ’n weeklikse paneelbesprekingprogram op NBC, onder die loep geneem het.

Die ander paneellede was dr. Charles Mubita, ’n politieke ontleder, dr. Victor Tonchi, die voormalige voorsitter van die ECN, en me. Emilia Theofelus, ’n jeugaktivis en kandidaatprokureur.

Mubita, veral, het gemeen dit is oneties om twee base terselfdertyd te dien.

Tonchi wou weet hoe ’n onafhanklike kandidaat stemme gaan werf en selfs al sou hy aan bewind hom, uit wie sy parlement saamgestel sal word.

Die paneellede was van mening ’n lid van ’n party wat ook as ’n onafhanklike kandidaat wil staan, skep botsende belange.

So ’n mens beskik oor binnekennis van die party en het toegang tot hulpbronne wat hy of sy dan tot hul voordeel as onafhanklike kandidaat kan uitbuit.

- [email protected]

Soortgelyk

 

Twee 'renosterstropers' verskyn in Gobabis-hof

9 minute gelede | Howe

Twee vermeende renosterstropers het vandag in die landdroshof op Gobabis verskyn.Mnre. Alberto Mbwale en Joseph Matheus het op klagte van die onwettige jag van spesiaal...

Pastoor Babi steeds agter tralies

3 ure gelede | Howe

Pastoor Jackson Babi (30) van die House of Joy Ministries en sy medebeskuldigde, mnr. Friza Dumeni (25), bly steeds agter tralies.Landdros Linus Samunzela het vanoggend...

25ste Covid-19-geval bevestig

5 ure gelede | Gesondheid

'n Vroulike gesondheidswerker (32) is Namibië se jongste Covid-19-geval. Dit bring die aantal bevestigde Covid-19-gevalle in Namibië op 25 te staan. Volgens die minister van...

Hof hoor president is 'mislei' oor arbeidsregulasies

16 ure gelede | Howe

Ronelle Rademeyer - Pres. Hage Geingob is “verkeerd geadviseer” met die opstel van die gewraakte arbeidsregulasies waarvan die grondwetlikheid Vrydag in die hoërhof deur Namibiese...

Namibiërs in haglike omstandighede onder SA-kwarantyn

16 ure gelede | Gesondheid

Twee vroue van Windhoek en die een se 16-jarige dogter meen die vervalle staatshospitaal by Nababeep naby Springbok in die Noord-Kaap waar hulle in kwarantyn...

'Profeet' Babi se borgaansoek vandag

16 ure gelede | Misdaad

Francoise Steynberg – Die bekende, charismatiese en selferkende profeet van die House of Joy Ministries, pastoor Jackson Babi (30), en sy medebeskuldigde, mnr. Friza Dumeni,...

Twee bemanningslede positief vir Covid-19

16 ure gelede | Gesondheid

Henriette Lamprecht & Leandrea Louw – Walvisbaai huisves tans drie aktiewe gevalle van Covid-19 ná ‘n 51-jarige man Saterdag positief vir die virussiekte getoets het....

Fishrot-manne skarrel vir borgtog

16 ure gelede | Misdaad

Augetto Graig – Die Windhoek-landdroshof het Vrydag met verskeie Fishrot-sake gewemel, met borgtogaansoeke wat met aansoeke vir die verlenging van tyd vir verdere ondersoek, meegeding...

Weer, Maandag 1 Junie 2020

16 ure gelede | Weer

BINNELAND: Gedeeltelik bewolk en baie warm in die Zambezi- en Kavangostreek. Elders sonnig en warm tot baie warm. Winderige weer sal oor die binneland heers....