Stadsraad: Regstreeks en lewendig
Die regstreekse uitsending op sosiale media van die maandelikse vergadering het baie aandag getrek.
Augetto Graig
Selde tevore, indien ooit, was Windhoek se maandelikse stadsraadsvergadering so vermaaklik soos op die aand van 11 Februarie, toe die nuwe burgemeester dr. Job Amupanda ’n stempel van deursigtigheid en konsensus op die normaalweg formele verrigtinge laat plaas het.
Teen Sondag het volgers op sosiale media reeds die opname van die regstreekse uitsending bykans 50 000 keer gaan kyk.
Amupanda se boodskap – dat die hoofstad se leierskap metgeselle vir inwoners moet wees – is uitgebeeld in sy openingstoespraak, waarin talle spesifieke lewenswerklikhede van inwoners een vir een geopper is. Hy sê die raadslede moet só optree dat hulle helde in die oë van inwoners is.
Die burgemeester het uitgebrei oor die post-kolonialistiese aard van Windhoek se erfenis, en hoe die administrasie van die hoofstad ontaard het tot “’n leë dop, ’n kru en brose bespotlikheid.”
Om hierdie rede is dit tyd vir ’n verandering, sê hy.
“Windhoek, in 2021, se politieke konfigurasie het verander en is nie meer in die hande van diegene wat dit vir 30 jaar bestuur het nie. Ons is ’n leierskap en ’n generasie op ’n tydstip waarin burgers gesonde verstand bo ekstase verkies, die toekoms bo die verlede, ontwikkeling bo heldhaftigheid,” het hy gesê.
Tegniese probleme met die uitsending, en met tye die klankgehalte, het veroorsaak dat die meerderheid van sy toespraak nie deel van die opname is nie. Nogtans het die vier ure van beraadslaging met verskeie interessante en dramatiese oomblikke, ’n wye gehoor ontlok.
Onder meer het kwessies aan die lig gekom soos die 116 toilette wat aan die stad geskenk is, maar nie in informele nedersettings opgerig is nie, weens geldtekort en die uitstaande goedkeuring van die ministerie van die omgewing, bosbou en toerisme.
’n Voorstel is ook bespreek om met die regering skuldbedrae ter waarde N$350 miljoen uit te ruil.
Die eerste vergadering waar die nuwe stadsraad besluite sou neem, het sá lank voortgeduur dat dit gister om 14:00 hervat moes word. Weens die Covid-19-aandklokreël moes die vergadering Donderdagaand verdaag.
Die volle agendapunte is nie bespreek nie en die vergadering is laas week verdaag net ná die goedkeuring vir die stad se hertoetrede tot die Vereniging van Plaaslike Owerhede (ALAN) en die registrasie van die burgemeester se trust.
Gister is hervat met goedkeuring van ander skenkings aan die hoofstad; die beginsel van tydelike vooraf goedkeuring vir erwe vir inwoners op die stad se behuisingswaglys en inwoners wat gedurende stadsbeplanning verskuif moet word. Hier is lank beraadslaag oor die integriteit van die lys van 30 000 mense, wat op datum gebring moet word. Oor die volgende drie jaar wil die munisipaliteit op dié wyse 5 000 erwe vooraf toeken.
Die stadsraad het ook goedkeuring gegee vir voortsetting met ’n projek om bitumen in Windhoek te vervaardig. Die openbare deel van die vergadering is om halfvyf gistermiddag afgehandel.
– [email protected]
Selde tevore, indien ooit, was Windhoek se maandelikse stadsraadsvergadering so vermaaklik soos op die aand van 11 Februarie, toe die nuwe burgemeester dr. Job Amupanda ’n stempel van deursigtigheid en konsensus op die normaalweg formele verrigtinge laat plaas het.
Teen Sondag het volgers op sosiale media reeds die opname van die regstreekse uitsending bykans 50 000 keer gaan kyk.
Amupanda se boodskap – dat die hoofstad se leierskap metgeselle vir inwoners moet wees – is uitgebeeld in sy openingstoespraak, waarin talle spesifieke lewenswerklikhede van inwoners een vir een geopper is. Hy sê die raadslede moet só optree dat hulle helde in die oë van inwoners is.
Die burgemeester het uitgebrei oor die post-kolonialistiese aard van Windhoek se erfenis, en hoe die administrasie van die hoofstad ontaard het tot “’n leë dop, ’n kru en brose bespotlikheid.”
Om hierdie rede is dit tyd vir ’n verandering, sê hy.
“Windhoek, in 2021, se politieke konfigurasie het verander en is nie meer in die hande van diegene wat dit vir 30 jaar bestuur het nie. Ons is ’n leierskap en ’n generasie op ’n tydstip waarin burgers gesonde verstand bo ekstase verkies, die toekoms bo die verlede, ontwikkeling bo heldhaftigheid,” het hy gesê.
Tegniese probleme met die uitsending, en met tye die klankgehalte, het veroorsaak dat die meerderheid van sy toespraak nie deel van die opname is nie. Nogtans het die vier ure van beraadslaging met verskeie interessante en dramatiese oomblikke, ’n wye gehoor ontlok.
Onder meer het kwessies aan die lig gekom soos die 116 toilette wat aan die stad geskenk is, maar nie in informele nedersettings opgerig is nie, weens geldtekort en die uitstaande goedkeuring van die ministerie van die omgewing, bosbou en toerisme.
’n Voorstel is ook bespreek om met die regering skuldbedrae ter waarde N$350 miljoen uit te ruil.
Die eerste vergadering waar die nuwe stadsraad besluite sou neem, het sá lank voortgeduur dat dit gister om 14:00 hervat moes word. Weens die Covid-19-aandklokreël moes die vergadering Donderdagaand verdaag.
Die volle agendapunte is nie bespreek nie en die vergadering is laas week verdaag net ná die goedkeuring vir die stad se hertoetrede tot die Vereniging van Plaaslike Owerhede (ALAN) en die registrasie van die burgemeester se trust.
Gister is hervat met goedkeuring van ander skenkings aan die hoofstad; die beginsel van tydelike vooraf goedkeuring vir erwe vir inwoners op die stad se behuisingswaglys en inwoners wat gedurende stadsbeplanning verskuif moet word. Hier is lank beraadslaag oor die integriteit van die lys van 30 000 mense, wat op datum gebring moet word. Oor die volgende drie jaar wil die munisipaliteit op dié wyse 5 000 erwe vooraf toeken.
Die stadsraad het ook goedkeuring gegee vir voortsetting met ’n projek om bitumen in Windhoek te vervaardig. Die openbare deel van die vergadering is om halfvyf gistermiddag afgehandel.
– [email protected]
Kommentaar
Republikein
Geen kommentaar is op hierdie artikel gelaat nie