SOS-werkers oorhandig klagskrif

Tanja Bause – Ongelukkige werkers van SOS Children’s Villages Namibia in Windhoek, Tsumeb en Ondangwa het gister ’n klagskrif by hul onderskeie kantore ingedien.

Me. Christina Nowases het die klagskrif aan Windhoek se sentrumdirekteur, mnr. Rodney Cloete, oorhandig.

Volgens die klagskrif is die klagtes daarin reeds verskeie kere onder die bestuur se aandag gebring, maar geen klagte is al aangespreek nie.

Die klagskrif stel dat huismoeders 24 uur ’n dag werk en met werk oorlaai is, wat nie met die Arbeidswet no. 11 van 2007 strook nie.

“Hoewel gesê kan word die kinders slaap snags en daar is dan min werk, is dit steeds ’n feit dat die moeders deurnag werk. Indien ’n kind siek word, vat die moeders hulle hospitaal toe en as die kinders druip, word hulle daarvoor verantwoordelik gehou. Ons eis dus dat SOS onmiddellik aan die arbeidswet voldoen.”

Volgens die petisie is sommige werkers verplig om in die SOS-dorpies te woon en mag hulle nie besoekers ontvang nie.

“Ons het op 11 Mei 2016 ’n brief aan die raad gestuur waarin staan dat besoekers tussen 19:00 en 21:00 daagliks ontvang mag word.

“Dié tye pas ons nie, omdat ons dan met die kinders besig is. Ons maak kos, doen huiswerk en kry die kinders reg vir slapenstyd. Die raad het gesê ons kan tye kies wat ons pas, maar dit word nie geïmplementeer nie. Besoekers word weggejaag.”

In die verlede kon die huismoeders sommige van die kinders vir ’n naweek wegneem of met vakansie neem sonder om aansoek vir verlof te doen.

Die bestuur het egter ’n nuwe reël tot die teendeel ingestel.

“Dit het die moeders ontmoedig om die kinders uit te neem, en dít het ’n negatiewe effek op die kinders. Ons eis dat versorgers kinders kan uitneem sonder ’n verlofaansoek.”

Die werkers eis ook dat die raad aan hulle voorgestel word.

Volgens die petisie word werkers nie onmiddellik ná hul indiensneming by die Maatskaplike Voorsorgkommissie (SSC) geregistreer nie.

Bydraes tot die mediese en pensioenfonds word ook nie betyds aan die verskillende organisasies oorbetaal nie.

Volgens die petisie word die balans van werkers se verlofdae, asook die pos wat hulle beklee nie op hul salarisstrokies aangedui nie.

“Kinders met gestremdhede word in ons sorg geplaas en ons het geen opleiding ontvang oor hoe om dié kinders te hanteer nie. Dit stel die kinders in gevaar. Ons eis dus opleiding.”

Volgens die werkers het hulle hul klagtes onder me. Simonee Shihepo Mulamata, nasionale direkteur van SOS Children’s Villages Namibia, se aandag gebring, maar het daar niks van gekom nie.

Hulle eis terugvoering van Mulamata op of voor 12:00 op 15 Februarie.

Indien daar nie terugvoering is nie, sal hulle verdere stappe doen, sê hulle.