Skoner geslag maak skoonskip

IEB se bestes

04 January 2019 | Onderwys
Ronelle Rademeyer - Van die 192 graad 12-leerlinge wat die eksamen van die Onafhanklike Eksamenraad (IEB) aan privaatskole in Namibië geskryf het, het 98,9% geslaag.

Dié leerlinge se uitslae is kort ná middernag gisteroggend bekend gemaak.

Altesaam agt leerlinge het met ’n gemiddelde A-simbool die eksamen geslaag.

Sewe van dié slimkoppe is meisies, met net een “haan” onder die top-8.

Die topskole vanjaar is Pro-Ed Akademie op Swakopmund met drie van die toppresteers wat uit hierdie skool kom. Windhoek Afrikaanse Privaatskool (WAP) het ook drie van die agt leerlinge met ’n A-gemiddeld opgelewer.

Lara Bartholomae van Pro-Ed Akademie is die IEB se nommer 1-kandidaat in Namibië, gevolg deur Aniké Maritz van dié skool in die tweede plek. Lara se gemiddeld is 88,9% en Aniké s’n 82,9%.

Luna de Bruyn van WAP is derde met 82,6%, Marlinda Schutz van Pro-Ed is vierde met 82,1%, gevolg deur Arina van Rensburg (WAP, 81,4%), Lisa Basson (Tsumeb Gimnasium, 81,1%), Henri Coetzee (WAP, 80,7%) en Dalene Steenkamp van Privaatskool Moria op Outjo met 80%.

Volgens die Namibiese Privaatskole-organisasie (Napso) het 88% van die graad 12’s met universiteitsvrystelling geslaag, terwyl 11% se punte sodanig is dat hulle aan ’n kollege kan gaan studeer.

RESEP VIR SUKSES

Lara het gister uit Swakopmund gesê sy was nog altyd ’n hardwerkende mens en verkies dit om haar werk so spoedig moontlik af te handel sodat sy my naweke en aftye kan geniet sonder 'n swaard oor haar kop. “Ek pak ook graag die bul dadelik by die horings deur dit wat ek nie weet of verstaan nie onmiddellik uit te vind. My pa het altyd gesê as ek goed wil wees in iets moet ek dit oefen,” vertel sy.

Sy gaan vanjaar aan die Universiteit Stellenbosch aktuariële wetenskappe studeer. Aan al die toekomstige graad 12’s sê sy: “Moenie uitstel nie!”

Oor haar wenresep, sê Aniké dit het haar baie gehelp om haarself gereeld aan haar droom te herinner en daarop te fokus. “Om vorige eksamenvraestelle deur te werk was beslis ’n groot hulp en natuurlik is tydsbestuur ook uiters belangrik.”

Sy sê sy is “bevoorreg en geseënd” dat haar droom waar geword het en sien uit om binnekort met haar studie by die mediese fakulteit van die Universiteit van Namibië te begin.

“Glo in jouself, hou vas aan jou droom en weet waarheen jy op pad is,” is haar raad aan jonger leerlinge.

Luna, wat op Stellenbosch BRek gaan studeer, skryf haar sukses hieraan toe: “Ek skryf dit toe aan my ongelooflike onderwysers vir hulle geduld, liefde en kennis, my skool wat vir my ’n veilige omgewing geskep het waar ek elke dag kon leer en as mens groei. Aan my ouers, familie en vriende vir motivering wanneer ek moedeloos was en aan my Hemelse pappa vir my talente en deursettingsvermoë.

Sy sê sy het elke dag hard gewerk en take aangepak sodra sy dit ontvang het.

“Ek sal die graad 12’s van 2019 aanraai om elke dag hulle deel te doen, om nooit ’n taak of toets af te skeep nie en altyd hulle doelwitte as motivering te gebruik. Daar is geen kortpad tot sukses nie: harde werk sal jou kry waar jy wil wees.”

Marlinda is ook voorlopig vir medies aan die mediese fakulteit in Windhoek gekeur, maar het ook ingekom vir BRek op Stellenbosch.

Sy het deurgaans probeer om die akademie met sport, kultuur en ontspanning te balanseer. “Ek het ook die ondersteuning van onderwysers, klasmaats, vriende en my ouers gebruik, en my Skepper gevra vir krag en kalmte.”

Haar raad? “Begin vroegtydig ou vraestelle uitwerk. Stel doelwitte en meet jouself daaraan. Geniet jou laaste skooljaar en bly betrokke by skoolaktiwiteite. Werk saam met jou klasmaats en onderwysers, help en ondersteun mekaar.”

Arina hou saam met haar familie op Jeffreysbaai in Suid-Afrika vakansie, kon kon nie telefonies bereik word nie.

Lisa, wat in Duitsland kuier, sê sy is baie dankbaar vir vriende, familie en onderwysers se ondersteuning. "harde werk en 'n goeie balans is nodig."

Sy gaan vanjaar 'n Bybelskool in Duitsland bywoon en daarna deur Europa toer as deel van 'n oorbruggingsjaar voor sy in 2020 gaan studeer.

Henri soms sy resep vir sukses só op: “Harde werk, goeie geselskap en genoeg tyd vir slaap en rus. . .”

Dié jong man gaan hom ook as ’n geoktrooieerde rekenmeester bekwaam en het vir die BRek-graad aan die Noordwes Universiteit ingeskryf.

“Die grootste fout wat jy kan maak is om een dag voor ’n eksamen te begin leer,” is sy raad aan vanjaar se graad 12’s.

Dalene sê die bekende Fillipense 4:13 was haar motivering. Rekeningkunde is haar passie en sy gaan ook, soos baie van die voorgenoemde slimkoppe, 'n geoktrooieerde rekenmeester word. "Aan elke graad 12-leerling, werk hard en hou vas aan dít wat jou motiveer," sê sy.

Soortgelyk

 

Mense uit 33 lande onder 157 rampslagoffers

3 ure gelede | Ongelukke

Ronelle Rademeyer - Sover bekend was daar nie enige Namibiërs op rampvlug ET302 van Ethiopian Airlines nie.Familielede wat passasiers van die Ethiopiese lugdiens se vlug...

Ethiopiese vliegtuig met 157 aan boord stort neer

6 ure gelede | Ongelukke

‘n Boeing 737 van Ethiopian Airlines het vanoggend onderwegvanaf Addis Ababa na Nairobi in Kenia neergestort.Die Ethiopiese eerste minister, Abiy Ahmed, het in ‘n verklaring...

braai en wen groot met . . .

1 dag gelede | In beeld

Die Namibiese weerkantoor voorspel sonnige en baie warm weer vir vandag in die verre weste en suidweste van die land, terwyl dit elders gedeeltelik bewolk...

Geingob: Gelukkig Vrouedag, vroue

2 dae gelede | Regering

President Hage Geingob sê hy erken die dapper pogings van vroue om beter gemeenskappe te skep en tot die voorspoed van die mensdom by te...

Verkrygingsraad presteer

2 dae gelede | Regering

Die Sentrale Verkrygingsraad van Namibië (CPBN) se raadsvoorsitter, mnr. Patrick Swartz, en administratiewe hoof, me. Lischen Ramakhutla, het vanoggend lig gewerp op uitdagings wat die...

Namibië topbestemming by ITB

2 dae gelede | Toerisme

Namibië is gisteraand as beste safari en wildbestemming by die Internasionale Toerismeskou in Berlyn (ITB) in Duitsland aangewys.Die minister van die omgewing en toerisme, mnr....

Wet slaan toe op wapenlisensies

2 dae gelede | Ministeries

Denver Kisting – Op die oomblik hoef iemand wat om ’n wapenlisensie aansoek doen, nie bewys te lewer dat hulle in staat is om ’n...

Water: Verligting ná hemelhoë rekeninge

2 dae gelede | Regering

Elvira Hattingh - Windhoekers wat vandeesmaand uitsonderlike hoë waterrekeninge ontvang het, kan ‘n sug van verligting slaak omdat die droogtetarief vir huishoudings net tot Januarie...

Kalender 8 Maart

2 dae gelede | Kuns en vermaak

Nou aan die gang» Tapz is 'n meester van die bira en die Wes-Afrikaanse djembe. Dit kan op sy debuutalbum, Awaited Wait, wat in Desember...