Shifeta staan howe vir wildmisdaad voor

Francoise Steynberg - Die minister van die omgewing en toerisme, mnr. Pohamba Shifeta, sê hy ondersteun die versoek dat toegewyde, spesiale howe geskep word om wildmisdaad te hanteer.

Shifeta het onlangs vrae oor die wetsontwerp op die handel in beheerde wildprodukte in die Nasionale Vergadering beantwoord.

"Ons ondersteun die versoek om toegewyde, spesiale howe wat wildmisdaad hanteer. Ons glo vas as dit gebeur, het ons nóg 'n stuk gereedskap in die gereedskapkis om wildmisdaad in Namibië te beveg," het die minister gesê.

"Ons ondersteun en moedig die aanklaers, polisie en die regbank aan om met buurlande saam te werk om wildmisdaad te beveg. Ons ondersteun die bou van kapasiteit van ons wetstoepassers en nuwe tegnologie om wildmisdaad te beveg."

Shifeta sê verskeie inisiatiewe is aan die dag gelê om bewustheid onder die regbank, aanklaers en die polisie te skep oor die kwessie van wildmisdaad, veral oor die stropery van beskermde wild soos renosters en olifante, asook die onwettige handel in wildprodukte.

Hy sê dusver is drie slypskole oor die bou van kapasiteit met die polisie, regbank en aanklaers gehou waar wildmisdaad gereeld voorkom - noord en suid van die Etosha Nasionale Park, asook in noordoostelike Namibië.

"Die slypskole is om te verstaan waarom ons hande moet vat ten einde 'n gekoördineerde benadering te hê om te verseker dat vervolgings rakende wildmisdaad suksesvol uitgevoer moet word," het Shifeta gesê.

"Een van die gevolge van hierdie inisiatiewe is dat ons nou hierdie voorgestelde wetsonwerpe bespreek."

Op die vraag van me. Elma Dienda van die DTA oor outomatiese verhoging van boetes, het Shifeta geantwoord toe die wet op die handel in beheerde wildprodukte opgestel is, het Namibië vir 30 jaar nie werklik renoster- en olifantstropery gehad het nie.

"Teen die koers wat renoster- en olifantstropery nou in Namibië voorkom, moet ons optree en 'n beter manier vind om Namibiërs en ander mense af te skrik om hierdie misdaad te pleeg," het Shifeta gesê.

"Wette moet dinamies en in reaksie op veranderde toestande wees."

"Om vaste boetes met jaarlikse verhogings te hê, is nie die ideale manier om kwessies soos wildmisdaad te hanteer wat so ingewikkeld is en deurentyd ontwikkel nie."

Oor die vraag oor geen opsie vir 'n boete nie, het Shifeta geantwoord borgtog moet teengestaan word aan verdagtes wat vir wildmisdaad in hegtenis geneem is.

"Tog moet ons die grondwetlike voorsienings en wette respekteer. Ons moedig die regbank en aanklaers aan om nou saam met die ministerie van die omgewing en toerisme te werk wanneer borgtogaansoeke oorweeg word."

Op 'n vraag van me. Bernadette Jagger van Swapo het Shifeta bevestig dat Namibië aan streeksaktiwiteite deelneem om oorgrens- wild- en omgewingsmisdaad te beveg.

"Sulke deelname is op bilaterale en multilaterale vlakke. Namibië is aktief betrokke in die ontwikkeling van streeksbewaringsinisiatiewe wat gemik is op die afname in wildmisdaad, asook om die verbetering van die lewenstoestande van landelike gemeenskappe wat saam met wild moet leef," het die minister gesê.