Sewe dae kwarantyn vir toeriste geskrap

Francoise Steynberg - Sedert die aankondiging van die implementering van die toerismeherlewingsplan-protokol en heropening van die Internasionale Lughawe Hosea Kutako (HKIA) op 1 September, is geen besprekings deur toeriste gemaak nie en die land het weens kansellasies N$115,7 miljoen verloor.

Die aankondiging is gister deur die minister van die omgewing, bosbou en toerisme, mnr. Pohamba Shifeta, gemaak wat gelei het tot nuwe aanpassings in die protokol van die toerismeherlewingsplan om meer toeriste te lok.

“Dit het ’n direkte negatiewe impak op die kontantvloei van besighede wat gelei het tot verdere salarisbesnoeiings en/of afdankings. Dit het ons gedwing om ons benadering te heroorweeg,” het Shifeta gesê.

Daarom moes streng Covid-19-regulasies vir internasionale toeriste soos onder meer die sewe dae kwarantyn geskrap word, waaroor die toerismebedryf verheug is.

“Die toerismesektor is hoogs mededingend en Namibië moet teen ander lande wêreldwyd meeding om toeriste te lok.”

Shifeta het erken die feit dat ander lande in die streek hul grense met minder beperkinge oopgemaak het, het Namibië benadeel.

“Daar is steeds besprekings in die stelsel, maar toeriste hoop op meer aanloklike protokol en maatreëls.

“Om ’n balans te vind tussen menselewens te red en die lewensbestaan van mense te red, moes die protokol verander word,” het Shifeta gesê.

GEEN 7 DAE IN KWARANTYN

Protokol wat verander het, behels onder meer: As toeriste op HKIA land, mag hulle verder reis na ’n voorafbespreekte bestemming en deelneem aan beplande toerisme-aktiwiteite by die akkommodasieplek vir die aantal dae wat die toeris daar bly.

Shifeta sê indien die toeris minder as vyf dae by die voorafbespreekte plek wil bly, mag die toeris na die volgende bestemming reis.

“Toeriste moet wel beskikbaar wees waar hulle hulself ook al bevind om ’n weefselmonster vir ’n Covid-19-toets te verskaf.”

Volgens Shifeta moet die toeriste ook bereikbaar wees om die resultaat van die toets op dag 7 te ontvang.

“Indien die uitslag negatief is, is die toeris vrygestel van enige toesig. As die toets positief is, sal die toeris na ’n isolasiefasiliteit geïdentifiseer deur die ministerie van gesondheid en maatskaplike dienste geneem word en op hul eie koste en volgens die nasionale riglyne vir gevallebestuur behandel word,” het Shifeta bevestig.

Hy het ook bevestig dat die HKIA slaggereed is en dat bilaterale lugvaartveiligheidsooreenkomste onderneem is.

“Ons het positiewe reaksie van groot lugrederye ontvang, soos Ethiopian Airlines wat vlugte Vrydag hervat, asook die Lufthansa-groep wat op 20 September land.”

Volgens die minister beplan Air Namibia ook om sy internasionale vlugte te hervat.

Die voorsitter van die Toer- en Safarivereniging (Tasa), me. Nathaly Ahrens, en die uitvoerende hoof van die Gasvryheidsvereniging van Namibië (HAN), me. Gitta Paetzold, meen die nuwe reëls is ’n groot stap vorentoe vir toerisme.

“Ons is baie opgewonde en bedank ons minister en al die rolspelers wat so hard daaraan gewerk het om hierdie te bewerkstellig op só ’n manier dat ons Namibiërs se gesondheid ook beskerm word,” het Ahrens gesê.

“Vir die toeriste beteken dit die vryheid wat hulle soek om te toer, tesame met die versekering dat daar ’n gesondheidsdiens is wat in hul belang optree en toetse uitvoer,” het Paetzold gesê.

“Dit is ’n bewys dat spanwerk en voortdurende gesprekke met die ministerie en die taakspan vrugte afwerp. Ons is baie dankbaar dat ons regering vir ons ’n oop deur gehou en na ons belange geluister het en bereid is om aan te pas in die belang van ons land en sy mense,” het sy bygevoeg.

- [email protected]