'SA Staatsveiligheidsagentskap sal sukkel met regstappe'
Erica Gibson - ’n Spioen of oudspioen se geheimhoudingsplig geld tot die dood. Dié onderneming word geteken die dag wat ’n spioen die diens van die Suid-Afrikaanse Staatsveiligheidsagentskap (SVA) verlaat.
As die SVA regstappe teen die Suid-Afrikaanse skrywer Jacques Pauw wil doen, sal hy moet bewys die inligting in Pauw se omstrede boek, The President’s Keepers, strook met geheime dokumentasie in die SVA se databasis.
Dr. Nel Marais, wat tot kort ná 1994 vir die destydse geheimediens gewerk het, sê die SVA gaan sukkel.
Een van die oudspioene in The President’s Keepers is Paul Engelke, ’n voormalige regsbeampte in die SVA. Hy moes onder meer die geheime Principal Agent Network (PAN) ondersoek. Hy het die diens in 2015 verlaat en doseer tans in Moskou.
Dit is nie die feit dat Pauw met Engelke gepraat het wat dalk ’n probleem is nie – dit sou wel problematies wees as Pauw geweet het dat iets wat Engelke hom vertel, eintlik staatsgeheime was.
As hy nié geweet het dit is geheime inligting nie, kan hy nie weens die verbreking van die Intelligensiewet aangekla word nie.
“Pauw is nie onderworpe aan die wet nie en het geen onderneming van geheimhouding onderteken nie. Van sy bronne het dalk.
“Die staat sal in die hof moet aanvoer of Pauw se inligting eg is en hy daarom wel aandadig was aan die bekendmaking van sensitiewe inligting. Die staat sal hom dan moet vra om sy bronne bekend te maak, want as voormalige SVA-lede is hulle wel aan die intelligensiewet en geheimhouding onderworpe,” sê Marais.
Korrekte inligting oor die steel van staatsgeld kan ook nie noodwendig as ondermynend van die staatsgesag beskou word soos wat Bongani Bongo, minister van staatsveiligheid, gesê het nie.
“Al die geraas is waarskynlik nou meer ’n afskrikmiddel in ’n poging om enige verdere sensitiewe lekkasies te probeer verhoed,” sê Marais.
Die SVA en die Suid-Afrikaanse Inkomstediens (SAID) dreig Pauw met regstappe – laasgenoemde omdat hy inligting oor pres. Jacob Zuma se niebetaling van belasting uitgelap het.
Die wet ter sprake is die oortreding van die Wet op Belastingadministrasie, wat die bekendmaking van ’n belastingbetaler se besonderhede verbied.
Volgens Adrian Lackay, voormalige SAID-woordvoerder, het die diens sover bekend nog nooit enigiemand weens oortredings van dié wet vervolg nie.
Die diens het trouens met die bekendmaking van die Sikhakhane-verslag in 2014 oor die bedryf van ’n sogenaamde koverte SAID-eenheid self die wet oortree. - Netwerk24
As die SVA regstappe teen die Suid-Afrikaanse skrywer Jacques Pauw wil doen, sal hy moet bewys die inligting in Pauw se omstrede boek, The President’s Keepers, strook met geheime dokumentasie in die SVA se databasis.
Dr. Nel Marais, wat tot kort ná 1994 vir die destydse geheimediens gewerk het, sê die SVA gaan sukkel.
Een van die oudspioene in The President’s Keepers is Paul Engelke, ’n voormalige regsbeampte in die SVA. Hy moes onder meer die geheime Principal Agent Network (PAN) ondersoek. Hy het die diens in 2015 verlaat en doseer tans in Moskou.
Dit is nie die feit dat Pauw met Engelke gepraat het wat dalk ’n probleem is nie – dit sou wel problematies wees as Pauw geweet het dat iets wat Engelke hom vertel, eintlik staatsgeheime was.
As hy nié geweet het dit is geheime inligting nie, kan hy nie weens die verbreking van die Intelligensiewet aangekla word nie.
“Pauw is nie onderworpe aan die wet nie en het geen onderneming van geheimhouding onderteken nie. Van sy bronne het dalk.
“Die staat sal in die hof moet aanvoer of Pauw se inligting eg is en hy daarom wel aandadig was aan die bekendmaking van sensitiewe inligting. Die staat sal hom dan moet vra om sy bronne bekend te maak, want as voormalige SVA-lede is hulle wel aan die intelligensiewet en geheimhouding onderworpe,” sê Marais.
Korrekte inligting oor die steel van staatsgeld kan ook nie noodwendig as ondermynend van die staatsgesag beskou word soos wat Bongani Bongo, minister van staatsveiligheid, gesê het nie.
“Al die geraas is waarskynlik nou meer ’n afskrikmiddel in ’n poging om enige verdere sensitiewe lekkasies te probeer verhoed,” sê Marais.
Die SVA en die Suid-Afrikaanse Inkomstediens (SAID) dreig Pauw met regstappe – laasgenoemde omdat hy inligting oor pres. Jacob Zuma se niebetaling van belasting uitgelap het.
Die wet ter sprake is die oortreding van die Wet op Belastingadministrasie, wat die bekendmaking van ’n belastingbetaler se besonderhede verbied.
Volgens Adrian Lackay, voormalige SAID-woordvoerder, het die diens sover bekend nog nooit enigiemand weens oortredings van dié wet vervolg nie.
Die diens het trouens met die bekendmaking van die Sikhakhane-verslag in 2014 oor die bedryf van ’n sogenaamde koverte SAID-eenheid self die wet oortree. - Netwerk24
Kommentaar
Republikein
Geen kommentaar is op hierdie artikel gelaat nie