SA se groeisyfer dalk beter as verwag

06 March 2018 | Ekonomie
Vida Booysen - Alle oë sal vandag op die groeisyfer vir die Suid-Afrikaanse ekonomie wees om te bevestig of daar inderdaad groen spriete begin uitsteek.

Suid-Afrika se bruto binnelandse produk (BBP)-groeisyfer vir die vierde kwartaal en vir 2017 word dan deur Statistieke Suid-Afrika (SSA) bekend gemaak.

Die BBP is die kernaanwyser van ekonomiese prestasie en ekonome is versigtig optimisties dat dit dalk beter kan lyk as wat ons verwag.

In Februarie se begrotingstoespraak is BBP-groei van 1% vir 2017 voorspel. Dit is hoër as die 0,7% wat in Oktober verlede jaar in die mediumtermynbegrotingsraamwerk in die vooruitsig gestel is.

“Ons hou vol die groeisyfer vir 2017 kan dalk hoër as ons aanvanklike verwagting van 0,9% styg – tot selfs so hoog as 1,1%,” sê Mamello Matikinca, FNB se hoofekonoom.

“Die ekonomiese herstel word deur die deurlopende verbetering in landbouvooruitsigte aangedryf asook deur ’n beter as verwagte vertoning deur die vervaardigingsektor en ’n opswaai in kleinhandelverkope in die vierde kwartaal verlede jaar.”

Haar voorspelling vir BBP-groei in die vierde kwartaal van 2017 is 2,1% hoër op ’n jaargrondslag en selfs meer as 3% op ’n kwartaalgrondslag.

John Asbourne, Afrika-ekonoom by Capital Economics, wys ook daarop dat die sterk vervaardiging- en kleinhandelsyfers die BBP vir die vierde kwartaal ’n hupstoot sal gee. Sy voorspelling is dat Suid-Afrika se BBP in 2017 met 1% sal toeneem.

Kleinhandelaars het 2017 op ’n vrolike noot afgesluit met Desember se handelsdata wat ’n toename van 5,3% in verkope toon teenoor dieselfde tydperk die vorige jaar.

Dennis Dykes, hoofekonoom van Nedbank, verwag groei van 2% in die vierde kwartaal en 0,9% vir die hele jaar. Hy stem saam dat vervaardiging begin kop optel en merk ook op dat daar ’n verbetering in die banksektor se groei was.

Dykes se voorspelling vir 2018 se BBP is ’n beskeie 1,6%.

“Daar is reeds ’n groot hoeveelheid skade aan die ekonomie aangerig en dit sal moeilik wees om so gou weer dinge reg te ruk.”

Ekonome hou ook die bewegings van die Amerikaanse Federale Reserweraad fyn dop. Indien die Fed op die korttermyn rentekoerse in die VSA gaan verhoog, soos hy reeds aangedui het hy wil doen, sal dit groei in ontluikende lande soos Suid-Afrika demp. ’n Verdere demper op Suid-Afrika se groeivooruitsigte sal wees as die regering se beloofde strukturele hervormings nie gou genoeg plaasvind nie. – Netwerk24

Soortgelyk

 

Ollies les hul dors

9 ure gelede | In beeld

Namibiërs in die Zambezistreek kan vandag na verspreide donderbuie uitsien, terwyl dié elders in die binneland vir eers nog met enkele tot geïsoleerde buie tevrede...

Ekonomie: Hou sand uit wiele

9 ure gelede | Politiek

Ronelle Rademeyer Dubbele belasting, soos belasting op dividende en belasting op kapitaalwins is immoreel en gaan nié die ekonomie laat groei nie.'n Ekonomie is die...

PS'e binnekort nié permanent

9 ure gelede | Regering

Denver Kisting - As beplande wetgewing deurgevoer word, is PS’e binnekort nie meer “permanent” in die tuig nie.Hiernaas sal dié rekenpligtige beamptes van ministeries ook...

Gróót regshervorming binnekort op pad

9 ure gelede | Ministeries

Denver Kisting – Die werksaamhede van die land se howe word deur verskeie uitdagings gekortwiek.In die lig van hervorming wat die minister van justisie, mnr....

Ongelukke: Namibië 45ste op wêreldranglys

9 ure gelede | Ongelukke

Padongelukke kos Namibië jaarliks N$1,3 miljard en is die oorsaak van 3,76% van die land se totale sterftes.Dié skokkende syfers is Dinsdag namens die minister...

Weer vir 23 November 2018

9 ure gelede | Weer

BINNELAND: Gedeeltelik bewolk en bloe­dig warm in die ||Kharasstreek en die Weste. Elders sal dit gedeeltelik bewolk en baie tot bloedig warm wees met enkele...

Weer, Donderdag 22 November 2018

9 ure gelede | Weer

BINNELAND: Sonnig en baie tot bloedig warm in die //Kharasstreek. Elders sal dit gedeeltelik bewolk en baie tot bloedig warm wees. Enkele donderbuie word in...

Kombat kwaad vir Katti

9 ure gelede | Plaaslik

Byna 300 inwoners van Kombat het Woensdag teen aansienlike verhogings in huur op die sluimerende myndorp betoog.Huur is vanaf 1 November van N$350 tot N$1...

N$19 miljard se paaie beplan

9 ure gelede | Vervoer

Augetto Graig Die Paaieowerheid (RA) beplan om binne die volgende vyf jaar N$19 miljard aan die land se paaie te bestee.Dít volgens mnr. Conrad Lutombi,...