Reho-minderjarige borgtog geweier

Formele aansoek gebring

15 October 2020 | Misdaad
Denver Kisting – Die kind met spesiale leerbehoeftes (14), wat na bewering Dinsdagoggend ’n medekoshuisleerder (15) op Rehoboth doodgesteek het, is gister borgtog geweier in die landdroshof op dié dorp ná hy formeel om borgtog moes aansoek doen.

Dít kom nadat die staat borgtog teengestaan het.

Die saak is tot 12 November vir verdere polisieondersoek en vir die seun se psigiatriese evaluering uitgestel.

Die beskuldigde, ’n graad 3-leerling by St. Joseph’s Laerskool, het reeds eergisteraand in ’n enkelsel by die Rehoboth-polisiekantoor deurgebring.

Die kinderadvokaat in die kantoor van die ombudsman, me. Ingrid Husselmann, het gister gesê kinderbeskuldigdes moenie soos ’n misdadiger behandel word nie.

Sy het te velde getrek daarteen dat die kind selfs vir een aand in aanhouding deurgebring het.

Die beskerming van so ’n kind behoort prioriteit te geniet. “Hy’s net ’n kind.”

Boonop behoort hy ook onskuldig geag te word tot hy skuldig bevind word, het sy by navraag gesê.

Maar, sê Husselmann, sy is tevrede om te hoor dat die kind nie voortaan in ’n sel aangehou sal word nie.

Na wat verneem word, het hy onder herhaalde afknouery deurgeloop – glo onder meer aan die hand van die oorledene, Ivan Zamuee.

Die koshuis waar die tragedie afgespeel het, behoort aan die Rooms-Katolieke Kerk.

Volgens ’n inspekteur op Rehoboth, mnr. George Dax, word die kinders saans in die koshuis toegesluit omdat daar nie genoeg personeellede vir toesighouding is nie.

’n Matrone en twee algemene werknemers is aan dié koshuis verbonde.

Die matrone was na wat verneem word met verlof tydens die voorval Dinsdagoggend.

Me. Sanet Steenkamp, die uitvoerende direkteur van onderwys, kuns en kultuur, het Dinsdagmiddag gesê kragtens ’n ooreenkoms tussen die ministerie en die kerk, bekom die kerk N$22 per leerling per dag.

Die ooreenkoms sit uiteen hoe dié subsidie bestee moet word tussen kos, skoonmaakmiddels en salarisse.

“Die verantwoordelikheid berus by die eienaars dat voldoende personeel aangestel word.”

Steenkamp sê sy dra nie kennis daarvan dat die kinders saans toegesluit word nie.

Intussen sê biskop Willem Christiaans van die Keetmanshoop-bisdom, waaronder Rehoboth ressorteer, gister in ’n verklaring: “Die Rooms-Katolieke Kerk (en) die bisdom van Keetmanshoop, het met hartseer die skokkende nuus ontvang van ’n steekvoorval op 13 Oktober by een van ons koshuise, St. Joseph’s op Rehoboth.”

Volgens Christiaans betreur die kerk die 15-jarige se dood, terwyl hulle terselfdertyd saam met die beskuldigde se familie pyn ervaar.

Hy sê hy is verbind daartoe om saam met die polisie te werk om dié “tragiese voorval” te ondersoek.

Me. Toni Hancox, die direkteur van die Regshulpsentrum (LAC), het gistermiddag gesê in die eerste plek moet vasgestel word wat behels die beskuldigde se spesiale behoeftes.

Die kind se spesiale behoeftes moet onder die landdros se aandag gevestig word.

Wat openbare belang betref, kan dit wees dat die staat bang is dat dit onveilig sal wees om die kind vry te laat as die samelewing met vergelding gedreig het.

Met die beperkte inligting tot haar beskikking, is dit moeilik om te sê of die seun aangehou of vrygelaat moet word, sê Hancox.

Sy sê maatskaplike werkers is by magte om met die aangeleentheid om te gaan.

Intussen berig Nampa ’n 13-jarige seun het gister sy tweede verskyning in die Gobabis-landdroshof gemaak weens die mesdood van mnr. Anton Goeieman in Augustus.

Dié tiener is vroeër op borgtog vrygelaat en moet weer op 27 Januarie op aanklag van moord in die hof verskyn.

- [email protected]

Soortgelyk

 

Geingob onder skoot oor ‘wit’ opmerkings

9 ure gelede | Politiek

Denver Kisting – Die leier van die amptelike opposisie, mnr. McHenry Venaani, sê wat pres. Hage Geingob die afgelope naweek oor wit mense kwytgeraak het,...

Verskeie daaglikse vlugte binnekort na SA

9 ure gelede | Vervoer

Ronelle Rademeyer – FlyWestair en Airlink, die private Namibiese en Suid-Afrikaanse rederye, het tot reisigers se redding gekom en gaan die leemte aan direkte, geskeduleerde...

Skone Lira bemark Namibië

9 ure gelede | Toerisme

Die Suid-Afrikaanse sangeres Lira, wat die inperking in Namibië deurgebring en uitgebreide verkenningsreise in die land onderneem het, is deur die Federasie van Namibiese Toerismeverenigings...

Weer vir 19 Oktober

9 ure gelede | Weer

BINNELAND: Gedeeltelik bewolk en bloedig warm in die Ooste. Elders sal die sonnig wees en baie warm tot bloedig wees. KUS: Gedeeltelik bewolk en koel...

Verdagte panga-rowers in hegtenis

9 ure gelede | Misdaad

Kristien KrugerVolgens ’n Namibiese polisieverslag is sewe mans in hegtenis geneem in verband met ’n aantal gewapende rooftogte in Windhoek.Die mans het hulself glo die...

Massavrekte van robwelpies ondersoek

9 ure gelede | Omgewing

Elvira Hattingh – ’n Ondersoekspan het begin om ongewone vrektes onder Kaapse pelsrobbe te ondersoek nadat klaarblyklik duisende wyfies vanjaar hul welpies teen die Namibiese...

Vier ton vis by Swakoppoort gekonfiskeer

9 ure gelede | Misdaad

Ronelle Rademeyer en Kristien Kruger – Sowat vier ton gedroogte vis en groot hoeveelhede visnettte en vislyn, asook die vlotte wat gebruik is om dit...

Stigma rondom Covid-19 neem af

9 ure gelede | Gesondheid

Jana-Mari Smith – Die normalisering van Covid-19 die afgelope jaar het veroorsaak dat stigmatisering weens die coronavirus besig is om af te neem, maar kenners...

Duitsland steun nasionale parke

9 ure gelede | Omgewing

Francoise SteynbergNóg 'n mylpaal is vir omgewingsbewaring behaal met die Duitse regering deur KfW wat sedert 2006 sowat N$1,4 miljard (75,5 euro) in Namibiese nasionale...