Regrukaksie begin op Jakkalsputz
Kampe dalk spiekeries voor seisoen
Des Eramus
Op Jakkalsputz het die stof gister gedraai namate 'n noodplan vir die rehabilitasie van die gewilde oord net suid van Hentiesbaai in werking gestel is.
Terselfdertyd het Namibia Wildlife Resorts (NWR) se beheerbeampte oor die kusoorde, mnr. Francois Snijders, op Hentiesbaai aangekom waar hy tot selfs ná die naweek in beheer van die operasies gaan wees om die poorte van Jakkalsputz, Myl 72 en Myl 108 op 1 Desember vir kampeerders oop te swaai.
Op Hentiesbaai is gister beweer dat elke inwoner wat oor 'n ou bakkie beskik op Jakkalsputz help.
'n Bewering waaraan NWR gekoppel word, is dat instandhoudingspanne uit die binneland gister op pad see toe was om met die regrukaksie van die oorde te help.
In antwoord op vrae het van die Hentiesbaaiers oor hul doen en late op Jakkalsputz gesê: “Het kontrak gekry.”
Beweringe was dat soortgelyke noodmaatreëls by Myl 72 en Myl 108 ingestel is, maar dit moes gistermiddag nog bevestig word ná ondersoeke ter plaatse.
Ter versagting is gister uit die geledere van die noodwerkers aangevoer die eintlike toestroming van kampeerders word eers oor die naweek van 9 en 10 Desember verwag. Vroeëre aankondigings deur NWR was dat die kampe op 1 Desember gereed sou wees.
Dit maak van uitstel tot 8 Desember geleende tyd.
Die noodoperasie is ingestel ná 'n katgeveg op die sosiale media tussen verteenwoordigers van toerisme-instansies en manne van die NWR.
Die fluitjie oor die onklaar kampe is aanvanklik deur toerinstansies geblaas.
Beweringe van haglike toestande is met foto's gestaaf.
Ná 'n eerste ondersoek deur die NWR is die beswaardes van kwaadwilligheid beskuldig. Toe is weer beweer dat die NWR-ondersoek nie verder as die kantoorkompleks van Jakkalsputz gestrek het nie.
Daar klink en blink dit met onder meer 'n reklamebord vir 'n ligte koeldranksoort. Toe is die NWR daarop gewys dat die kantoorgebied nie die plek vir kampeerders is nie.
Hulle is op staanplekke op die bank aangewese en dis waar feitlik niks gedoen was nie.
'n Onafhanklike waarnemer is toe na Jakkalsputz gestuur en sy bevinding het die onleefbare toestande gestaaf.
“Wie lieg nou vir wie?” Só is met die aanwending van die sosiale media gevra. Ewe gou as wat die vraag verskyn het, is dit weer verwyder. Toe het die onderskeie partye toenadering begin soek en het die noodplan vorm aangeneem.
Woensdag was 'n algemene verwagting dat die genoemde drie kampe teen 1 Desember ten dele leefbaar gaan wees en dat alles teen 8 Desember gereed behoort te wees wanneer die groot vakansiestroom uit die binneland verwag word.
Op Jakkalsputz het die stof gister gedraai namate 'n noodplan vir die rehabilitasie van die gewilde oord net suid van Hentiesbaai in werking gestel is.
Terselfdertyd het Namibia Wildlife Resorts (NWR) se beheerbeampte oor die kusoorde, mnr. Francois Snijders, op Hentiesbaai aangekom waar hy tot selfs ná die naweek in beheer van die operasies gaan wees om die poorte van Jakkalsputz, Myl 72 en Myl 108 op 1 Desember vir kampeerders oop te swaai.
Op Hentiesbaai is gister beweer dat elke inwoner wat oor 'n ou bakkie beskik op Jakkalsputz help.
'n Bewering waaraan NWR gekoppel word, is dat instandhoudingspanne uit die binneland gister op pad see toe was om met die regrukaksie van die oorde te help.
In antwoord op vrae het van die Hentiesbaaiers oor hul doen en late op Jakkalsputz gesê: “Het kontrak gekry.”
Beweringe was dat soortgelyke noodmaatreëls by Myl 72 en Myl 108 ingestel is, maar dit moes gistermiddag nog bevestig word ná ondersoeke ter plaatse.
Ter versagting is gister uit die geledere van die noodwerkers aangevoer die eintlike toestroming van kampeerders word eers oor die naweek van 9 en 10 Desember verwag. Vroeëre aankondigings deur NWR was dat die kampe op 1 Desember gereed sou wees.
Dit maak van uitstel tot 8 Desember geleende tyd.
Die noodoperasie is ingestel ná 'n katgeveg op die sosiale media tussen verteenwoordigers van toerisme-instansies en manne van die NWR.
Die fluitjie oor die onklaar kampe is aanvanklik deur toerinstansies geblaas.
Beweringe van haglike toestande is met foto's gestaaf.
Ná 'n eerste ondersoek deur die NWR is die beswaardes van kwaadwilligheid beskuldig. Toe is weer beweer dat die NWR-ondersoek nie verder as die kantoorkompleks van Jakkalsputz gestrek het nie.
Daar klink en blink dit met onder meer 'n reklamebord vir 'n ligte koeldranksoort. Toe is die NWR daarop gewys dat die kantoorgebied nie die plek vir kampeerders is nie.
Hulle is op staanplekke op die bank aangewese en dis waar feitlik niks gedoen was nie.
'n Onafhanklike waarnemer is toe na Jakkalsputz gestuur en sy bevinding het die onleefbare toestande gestaaf.
“Wie lieg nou vir wie?” Só is met die aanwending van die sosiale media gevra. Ewe gou as wat die vraag verskyn het, is dit weer verwyder. Toe het die onderskeie partye toenadering begin soek en het die noodplan vorm aangeneem.
Woensdag was 'n algemene verwagting dat die genoemde drie kampe teen 1 Desember ten dele leefbaar gaan wees en dat alles teen 8 Desember gereed behoort te wees wanneer die groot vakansiestroom uit die binneland verwag word.
Kommentaar
Republikein
Geen kommentaar is op hierdie artikel gelaat nie