Reddingsboei van N$500 m. vir paaie

Ogone Tlhage en Ronelle Rademeyer - Die Padfondsadministrasie (RFA) het tot die Paaieowerheid (RA) se redding gekom deur ’n regeringsgewaarborgde lening van N$500 miljoen met ’n plaaslike handelsbank aan te gaan om agterstallige betalings vir padbouprojekte te doen.

Dit beteken die konstruksiewerk kan hervat en die Namibiese belastingbetalers word die rente en boetes gespaar wat maandeliks miljoene Namibiese dollar beloop.

Die RA se hoof uitvoerende beampte, mnr. Conrad Lutombi, het Vrydag in Windhoek aan joernaliste erken dat dié owerheid padboukontrakteurs en konsultante sedert die einde van Januarie vanjaar N$500 miljoen skuld.

Hy het gesê die kwessie is Vrydagoggend tydens die vergadering tussen die dié owerheid, die ministerie van finansies en die RFA opgelos.

“Ons is in die proses om fakture te betaal. Ons het ’n oplossing gevind en die kontrakteurs sal Maandag (vandag) of Dinsdag hul werk hervat,” het Lutombi gesê.

Hy het bewering ontken dat die RA projekte aangegaan het sonder om die regte prosedures te volg.

“Daar is nie ’n regeringsprojek wat ons begin het, wat ons nie sal klaar maak nie. Die RA is ’n verantwoordelike organisasie en daar is geen manier dat ons nie sal betaal het,” het hy by ’n nuuskonferensie in Windhoek gesê.

Mnr. Ali Ipinge, uitvoerende hoof van die RFA, sê dié fonds is twee weke gelede om hulp genader. “Ons is versoek om die regering halfpad te ontmoet. Ons moet regeringsinisiatiewe ondersteun waar ons kan,” het hy aan joernaliste gesê.

Volgens hom word die lening deur ’n regeringswaarborg gerugsteun. “Ons kan die regering help mits hy namens die RFA ’n waarborg uitreik.”

Volgens hom het die regering in die verlede sy verpligtinge nagekom in terme van lenings wat aangegaan is.

“Die regering het sy verpligtinge nagekom met vorige oortrokke fasiliteite wat toegestaan is. Ons is 100 persent seker die regering sal hierdie lening terugbetaal,” het Ipinge gesê.

Volgens hom sou die RFA Vrydagmiddag reeds N$250 miljoen vir die betalings van fakture oorbetaal het, met ’n betaling van ’n verdere n$250 miljoen wat deur die loop van hierdie week gemaak sal word.

Die volgende projekte het weens die staking van konstruksiewerk tot stilstand gekom:

· Deel 4 (a) van die snelweg tussen Windhoek en Okahandja wat strek van Döbra tot suid van die Osona-weermagbasis. Die Italiaanse maatskappy CMC doen die kontruksie in samewerking met Otesa, die padkonstruksiemaatskappy van mnr. Elmo Kaiyamo;

· Fase 1 van die nuwe pad tussen Walvisbaai en Swakopmund. Dié bouwerk word gesamentlik deur die vennootskap tussen die kontrakteurs Unik en Thoni gedoen;

· Deel 1 van die Swakopmund-Hentiesbaai-pad, waarvan die bouwerk deur Zhong Mei Engineering gedoen word;

· Die Isize-Namalubi-Luhononopad in die Zambezistreek waarvan die konstruksiewerk deur Nexus Civils gedoen word; asook

· Die 4 km-snelweg tussen Okatana en Oshakati.

Intussen het mnr. John Mutorwa, minister van werke en vervoer, gister by navraag gesê hy was nie Vrydag teenwoordig toe die RA, die RFA en die ministerie van finansies vergader het nie en is gevolglik nie op die hoogte van die besluite wat geneem is nie.

“Ek is uitstedig, maar die adjunkminister (mnr. James Sankwasa) en die uitvoerende direkteur (mnr. Willem Goeieman) was teenwoordig,” het hy gesê.

Hy het egter bevestig hy het die brief gesien waarin Lutombi verlede Maandag by Goeieman vir geld gepleit het om die kontrakteurs en konsultante te kan betaal.

Lutombi het die lynministerie daarin ingelig dat die gesamentlike daaglikse verliese wat die RA ly weens die rente en boetes wat die kontrakteurs hef, afhangend van die grootte van die projek oploop tot tussen N$15 miljoen en N$30 miljoen per projek per maand.

Die weekblad Confidénte het Donderdag berig die RA skuld die kontrakteurs nagenoeg N$98 miljoen.

Mnr. Calle Schlettwein, minister van finansies, het teen druktyd nog nie gereageer op ’n navraag wat per WhatsApp aan hom gestuur is nie.