Pollard-slag lei tot losskakel-vraagstuk
Rugby
Cobus Claassen – ’n Kans vir Elton Jantjies om uit die Handré Pollard-skadu te beweeg of tyd om met ’n opkomende ster te waag?
Daar is diegene wat meen dat Pollard se kniebesering, wat hom uit vanjaar se Rugbykampioenskap sal hou, Jacques Nienaber, die Bok-breier, eerder na ’n langtermyn-belegging soos Damian Willemse of Curwin Bosch moet laat kyk.
Die voormalige Springbok-losskakel Joel Stransky glo egter dat die 30-jarige Jantjies verdien om nou die voorkeur-kandidaat te wees.
“Elton het hom al bewys. Hy is deesdae ’n leier, verdedig goed, sy besluitneming is knap en hy bied afwisseling op die aanval.
“Hy is al lank in die Bok-spanopset en ek sou beslis dink hy is volgende in die ry.”
Maar wat van sy geneigdheid om die kluts kwyt te raak in drukkoker-wedstryde wanneer die teenstanders in sy gesig boer?
“Dit was hier en daar ’n kwessie in die verlede, maar dit was deel van sy leerkurwe. Ek dink nie hy is meer daardie speler nie.
“Curwin is baie talentvol, maar hy het steeds een of twee tekortkominge in sy mondering. Hy was vroeër vanjaar uitstekend in die Superreeks en dit is goed dat hy die kans gekry het om hom op losskakel te begin vestig.”
Die man wat in 1995 die Springbokke se Wêreldbeker-glorie met ’n skepdoel verseël het, sê hy is nie oortuig dat losskakel Willemse se beste posisie is nie.
“Hy het nét so baie talent, maar ek voel hy kom op heelagter beter tot sy reg wanneer hy meer ruimte het.
“Het hy al sy vernuf in die nr. 10-trui op Superrugby-vlak bo alle twyfel tentoongestel? Ek twyfel.”
Met Pollard se besering is Nienaber een van sy voorste troefkaarte kwyt, sê Stransky.
“Pollard se teenwoordigheid en invloed verlede jaar in die Wêreldbeker-toernooi was duidelik.
“Hy het die span se aanslag met soveel selfvertroue en volwassenheid bestuur. Dit is ’n enorme terugslag. Hy is boonop groot en sterk, en bied iets ekstra, wat kleiner losskakels nie het nie.”
Naas Botha, oud-Bok-losskakel en -kaptein, sê dit is nooit ’n goeie plan om ’n speler op grond van sy reputasie te kies nie.
“Die beste speler moet gekies word. Dit klink of daar (voor die Rugbykampioenskap) tyd sal wees om ons losskakels op te weeg.
“Sommige spelers sal vinnig uit die wegspringblokke wees en ander sal ’n ruk vat om aan die gang te kom. Gegewe die omstandighede, gaan spelpeil belangrik wees teen die tyd wanneer die span gekies moet word.
“Spelers soos Elton, Curwin en Damian Willemse sal almal in die wedloop wees. Selfs Robert du Preez het die laaste ruk in die Engelse Premierliga goed gelyk.
“Ons is eintlik in ’n goeie posisie as jy vier losskakels as ’n moontlike plaasvervanger kan opnoem.”
Sou jy Pollard met ’n soortgelyke speler wou vervang, kan Du Preez, wat ook groot en sterk is, sterk in die wedloop wees.
“Daar is ’n nuwe afrigter (Nienaber) en hy sal sekerlik sy stempel wil afdruk, hoewel Rassie Erasmus steeds insette sal lewer.
“Pollard kies homself, maar watter soort losskakel sal Nienaber nou verkies? Net tyd sal leer,” sê Botha. – Netwerk24
FOTO
’n Losskakel soos Robert du Preez, wat tans vir die Sale Sharks in die Engelse Premierliga speel, is ’n moontlike opsie as plaasvervanger vir die beseerde Springbok Handré Pollard. Foto Getty Images
Daar is diegene wat meen dat Pollard se kniebesering, wat hom uit vanjaar se Rugbykampioenskap sal hou, Jacques Nienaber, die Bok-breier, eerder na ’n langtermyn-belegging soos Damian Willemse of Curwin Bosch moet laat kyk.
Die voormalige Springbok-losskakel Joel Stransky glo egter dat die 30-jarige Jantjies verdien om nou die voorkeur-kandidaat te wees.
“Elton het hom al bewys. Hy is deesdae ’n leier, verdedig goed, sy besluitneming is knap en hy bied afwisseling op die aanval.
“Hy is al lank in die Bok-spanopset en ek sou beslis dink hy is volgende in die ry.”
Maar wat van sy geneigdheid om die kluts kwyt te raak in drukkoker-wedstryde wanneer die teenstanders in sy gesig boer?
“Dit was hier en daar ’n kwessie in die verlede, maar dit was deel van sy leerkurwe. Ek dink nie hy is meer daardie speler nie.
“Curwin is baie talentvol, maar hy het steeds een of twee tekortkominge in sy mondering. Hy was vroeër vanjaar uitstekend in die Superreeks en dit is goed dat hy die kans gekry het om hom op losskakel te begin vestig.”
Die man wat in 1995 die Springbokke se Wêreldbeker-glorie met ’n skepdoel verseël het, sê hy is nie oortuig dat losskakel Willemse se beste posisie is nie.
“Hy het nét so baie talent, maar ek voel hy kom op heelagter beter tot sy reg wanneer hy meer ruimte het.
“Het hy al sy vernuf in die nr. 10-trui op Superrugby-vlak bo alle twyfel tentoongestel? Ek twyfel.”
Met Pollard se besering is Nienaber een van sy voorste troefkaarte kwyt, sê Stransky.
“Pollard se teenwoordigheid en invloed verlede jaar in die Wêreldbeker-toernooi was duidelik.
“Hy het die span se aanslag met soveel selfvertroue en volwassenheid bestuur. Dit is ’n enorme terugslag. Hy is boonop groot en sterk, en bied iets ekstra, wat kleiner losskakels nie het nie.”
Naas Botha, oud-Bok-losskakel en -kaptein, sê dit is nooit ’n goeie plan om ’n speler op grond van sy reputasie te kies nie.
“Die beste speler moet gekies word. Dit klink of daar (voor die Rugbykampioenskap) tyd sal wees om ons losskakels op te weeg.
“Sommige spelers sal vinnig uit die wegspringblokke wees en ander sal ’n ruk vat om aan die gang te kom. Gegewe die omstandighede, gaan spelpeil belangrik wees teen die tyd wanneer die span gekies moet word.
“Spelers soos Elton, Curwin en Damian Willemse sal almal in die wedloop wees. Selfs Robert du Preez het die laaste ruk in die Engelse Premierliga goed gelyk.
“Ons is eintlik in ’n goeie posisie as jy vier losskakels as ’n moontlike plaasvervanger kan opnoem.”
Sou jy Pollard met ’n soortgelyke speler wou vervang, kan Du Preez, wat ook groot en sterk is, sterk in die wedloop wees.
“Daar is ’n nuwe afrigter (Nienaber) en hy sal sekerlik sy stempel wil afdruk, hoewel Rassie Erasmus steeds insette sal lewer.
“Pollard kies homself, maar watter soort losskakel sal Nienaber nou verkies? Net tyd sal leer,” sê Botha. – Netwerk24
FOTO
’n Losskakel soos Robert du Preez, wat tans vir die Sale Sharks in die Engelse Premierliga speel, is ’n moontlike opsie as plaasvervanger vir die beseerde Springbok Handré Pollard. Foto Getty Images
Kommentaar
Republikein
Geen kommentaar is op hierdie artikel gelaat nie