Plakkers klóú aan plaas ondanks hofbevel

Niemand in hegtenis geneem

03 September 2018 | Afrika
Jeanne-Marié Versluis – Ten spyte van ’n uitsettingsbevel teen plakkers wat ’n swart boer met AfriForum se hulp bekom het, het nóg invallers gister op sy plaas naby Pretoria toegesak.

Hulle het ’n klipmuur by die plaashek afgebreek en boumateriaal met ’n klomp bakkies aangery.

Dr. Motodi Maserumule, mede-eienaar van dié 120 ha-plaas, se hofbevel wat hy Vrydag bekom het, het sover op dowe ore geval.

Ian Cameron, AfriForum se hoof van gemeenskapsveiligheid, sê daar het ’n stootskraper op Maserumule se grond aangekom om “erwe” skoon te skraap.

Volgens hom sou die balju en polisie waarskynlik vanoggend probeer om die uitsettingsbevel uit te voer.

As die besetters weier om pad te gee en dit help nie om die polisie daar te hê nie, sal die hulp van die Rooimiere dalk ingeroep word, het Cameron gister gesê.

“Ek is taamlik seker dit gaan in geweld ontaard as die balju en die polisie môre daar aankom om hulle af te sit. Ek het lank laas so ’n aggressiewe groep mense gesien. Hulle is behoorlik opge-charge.

“Ek weet nie wat hulle met die afgebreekte klipmuur wil doen nie. Dalk met die klippe huise bou of die pad versper.”

Hofbevele om onwettige plakkers te verwyder is een ding, maar om dit uitgevoer te kry, is ’n ander saak.

Selfs die regering se eie departement van menslike nedersettings kon ná drie hofbevele steeds nie ontslae raak van mense wat onwettig by 888 leë laekoste-huise in Centurion ingetrek het nie. Die plakkers het die sleutels uit die ontwikkelaar se kantoor gesteel en ingetrek en die polisie wou volgens die regering nie help nie.

Die hof het die eerste keer einde verlede jaar al met ’n bevel die inval van plakkers probeer keer. Die regering het met die beskerming van die Mamelodi-polisie, openbare-orde-polisie, die Tshwane-metropolisie én ’n private veiligheidsmaatskappy inbeweeg om net te gaan tel hoeveel bykomende plakkers daar is, terwyl hulle oogkontak met die plakkers vermy het, het die hof gehoor.

In Junie het die departement die uitsettingsbevel teen die besetters gekry. Die hof het gesê hulle moet teen 30 Junie trek, maar dit het nie gebeur nie.

Die hof het in Julie wéér beslis hulle moet skoert, maar toe het protesoptrede uitgebreek.

Keith Khoza, die departement se woordvoerder, het daarna aan Rapport gesê hulle moet hulpbronne bymekaar maak om die uitsetting te kan doen.

Maserumule, ’n wiskundige en uitvoerende direkteur van die Wetenskaplike en Nywerheidsnavorsingsraad (WNNR), hoop sy situasie word gouer ontlont.

Vroeër die week was daar sowat 30 hutte. Die besetters vra R500 vir ’n “woonerf” en R1 000 vir ’n “sake-erf”. Dit word vanuit ’n gehuggie wat as ’n “kantoor” beskryf word “verkoop”.

Vrydag se hofbevel sê die balju mag en moet dadelik alle onbewoonde hutte op die plaas afbreek en die boumateriaal verwyder. Die stasiebevelvoerder van Soshanguve moet alle redelike maatstawwe toepas en met “hul beskikbare hulpbronne” die balju hiermee help.

Die bevel het die mense ook uitdruklik verbied om verder te plak soos hulle gister gedoen het.

Die grond behoort sedert 2007 aan Maserumule en sy sakevennote Kgoshi Phaahla en Diphete Bopape. Hulle wil dit vir behuisingsontwikkeling gebruik.

’n Vriend van Maserumule het hom Maandag gebel om te sê hy sien daar is moeilikheid op die grond.

Toe Maserumule met die plakkers gaan praat en sy titelaktes wys, het hulle hom gedreig, sê hy in hofstukke. Hy is toe na die Soshanguve-polisiekantoor en het ’n klag van betreding probeer indien, maar die polisie het geweier om die klag te aanvaar.

Maserumule kon Dinsdag so ’n klag indien nadat AfriForum druk op die polisie geplaas het. Daarna het die polisie egter niemand vir betreding in hegtenis geneem nie. ’n Raadop Maserumule het teen Woensdag die hof genader.

Hy sê in die stukke die polisie is grondwetlik verplig om eiendom te beskerm en misdaad te voorkom.

Hy sê Donderdag het een van die besetters selfs gedreig dat ’n “joernalis wat die grond besoek het, verkrag sal word as sy aanhou vrae vra”.

“Die groep het duidelik geen respek vir reg en orde nie.” – Netwerk24

Soortgelyk

 

Namibia resistant to Eskom power woes

6 ure gelede | Energie

NDAMA NAKASHOLE NamPower has assured Namibians that load-shedding in South Africa will not affect Namibia.NamPower issued a statement two days after South Africa’s cash-strapped power...

Staatshospitale mank aan voorraad

6 ure gelede | Gesondheid

Henriette Lamprecht - Betalings vir verskaffers van skroewe, penne en prosteses vir ortopediese operasies by die twee staatshospitale in Windhoek word “by tye” vertraag wat...

Ekspo gee volhoubare toerisme woema

6 ure gelede | Gebeure

Volgende jaar vind die Namibië Toerisme Ekspo (NTE) vir die 21ste keer plaas, en sal op herwinning fokus.Dit sal van 5 tot 8 Junie by...

Rundu: Verdrink in vullis of ly dors

6 ure gelede | Regering

Catherine Sasman - Rundu se strate en sypaadjies het in onooglike, stinkende vullishope ontaard omdat die dorpsraad noodsaaklike dienste afskeep.Dít om sy skuld van N$60...

Ondersoek staatskaping, eis amptelike opposisie

6 ure gelede | Politiek

Ronelle Rademeyer - Die sluier van geheimhouding oor Namib Desert Diamonds (Namdia) en berigte dat mnr. Tom Alweendo, minister van myne en energie, nie geweet...

Weer vir 15 November 2018

6 ure gelede | Weer

BINNELAND: Sonnig en bloedig warm in die verre Noordooste en die ||Kharasstreek. Elders sal dit gedeeltelik bewolk en baie tot bloedig warm wees. Enkele ligte...

Huurbeheerrade aangestel

6 ure gelede | Ministeries

Catherine Sasman - Ná vele haakplekke en vertragings het die ministerie van nywerheidsontwikkeling, handel en SME-ontwikkeling vyf huurbeheerrade in vyf streke aangestel wat sedert Maandag...

Outjo se panga-moordenaar kry lewenslank

6 ure gelede | Howe

Ronelle Rademeyer - Die man van Outjo, wat erken het hy het sy meisie in 2015 vermoor deur haar verskeie kere met ’n panga op...

N$1,8 miljard nodig vir Etosha-heining

6 ure gelede | Ministeries

Ellanie Smit - Die heining om die Etosha Nasionale Park sal sowat N$1,8 miljard kos om te voltooi. Dít volgens 'n verslag van die...