Parlement open in chaos

Geingob se virtuele toespraak gekritiseer

10 February 2021 | Politiek
Augetto Graig – Die opening van die derde sessie van die sewende parlement van Namibië het gister in Windhoek op 'n chaotiese wyse afgeskop toe die Speaker, prof. Peter Katjavivi, aangekondig het dat president Hage Geingob die geleentheid virtueel sou toespreek.

Opposisielede het onmiddellik hierteen begin kapsie maak.

Die LPM se hoofsweep, mnr. Henny Seibeb, wou by Katjavivi weet of dié besluit met die partye in die parlement uitgeklaar is. Die leier van dié party, mnr. Bernadus Swartbooi, het saam met Seibeb uitgestap, terwyl Swartbooi opmerkings oor die Fishrot-skandaal en die verkragting van die Grondwet gemaak het. (Gister was ook die herdenking van Namibië se Grondwetdag).

Ná die staatshoof se rede het die leier van die amptelike opposie, die PDM se mnr. McHenry Venaani, Geingob se virtuele toespraak as 'n nasionale verleentheid beskryf. Dit was onduidelik of die toespraak regstreeks gebeeldsend, of vroeër opgeneem was.

“As die president is hy die leier van die uitvoerende tak van die regering. Hy word deur die grondwet verplig om ons in persoon hier toe te spreek,” het Venaani gesê.

Volgens Venaani kon die aantal teenwoordige parlementslede verminder gewees het om vir Geingob ruimte te skep, indien dit weens Covid-19 regulasies nodig was.

“Jy het dit nie bespreek nie – nie met my as partyleier óf met my hoofsweep nie,” het hy aan Katjavivi gesê. Volgens Venaani is dit lafhartige optrede en 'n strategie om Geingob teen indringende vrae te beskerm wanneer hy later vanjaar die staatsrede moet voorlê.

Katjavivi dring egter aan die virtuele uitsending is toelaatbaar ingevolge reël 124 van die parlementsreëls, wat handel oor onverwagte omstandighede.

Ook die eerste minister, me. Saara Kuugongelwa-Amadhila, het gesê die uitsending is geregverdig.

“Dit is geen oortreding indien die president die parlement virtueel open nie. Dit kan nie voorgegee word dat dit teen die bedoeling van die wet is nie; daar is niks in die wet wat dit verhoed nie.”

Sy het bygevoeg: “Dit is belangrik dat ons die waardigheid van hierdie huis en die mense van Namibië respekteer. Dit raak nou tradisie dat as ons nie ooreenstem nie, die reëls van die huis geminag word.”

Die LPM se parlementêre woordvoerder, me. Utaara Mootu, sê die uitsending was nie by 'n vergadering van hoofswepe vroeër die week bespreek nie. Sy sê haar partylede is deur die Namibiese polisie geteister by hul aankoms by die geleentheid. Polisiehonde is binne die gebou ingespan en streng reëls is toegepas, om die voorkoms te skep asof Geingob self daar sou wees.

“Die president wil nie aanspreeklik gehou word nie. Hy hardloop weg. Die president wil nie antwoord nie. Ons sal nie 'n kleuterskool-parlement verdra nie,” sê Mootu.

Geingob se toespraak was boonop onhoorbaar vir diegene binne die vertrek, afgesien van die Swapo-kant waar die meeste parlementslede oorfone gebruik en gereeld applous gelewer het.

Sy boodskap het gefokus op die belang van Namibië se grondwet, die ontwikkeling van demokrasie in die land en die verhoogde verwagtinge van landsburgers. “Vanjaar sal 'n spilpunt wees, wat die toekoms van ons demokrasie sal bepaal,” sê hy.

Geingob het die belang van veerkragtigheid in die stryd teen Covid-19 beklemtoon. Hy het die komende gebruik van inligtingtegnologie geprys om parlementslede toe te laat om ontmoetings virtueel by te woon.

Vanjaar sal die parlement volgens Geingob beraadslaag oor onder meer die wysiging van die wet op die bekamping van verkragting; die wet op die bekamping van huishoudelike geweld; die kriminele prosedurewet; die hoërhofwet; die landdroswet; die egskeiding-wetsontwerp, die ombudsman-wetsontwerp, die wetsontwerp op geregtigheid vir kinders; die huwelikswetsontwerp asook die wet op bankinstansies.

[email protected]

Soortgelyk

 

Hoërskool Rehoboth gesluit tot ná Paasnaweek

3 ure gelede | Onderwys

Hoërskool Rehoboth is vanaf vandag tot Dinsdag 6 April gesluit. Volgens die bestuur van die skool sal dié tyd gebruik word om die skoolperseel deeglik...

Robberts bly in aanhouding

14 ure gelede | Howe

Erwin Leuschner – Die 36-jarige mnr. Daniel (Danie) Robberts bly in aanhouding nadat hy na bewering sy vriend, mnr. Thomas Frederick (Frikkie) van Schalkwyk (69),...

Inentings: Namibiërs wag en kyk

14 ure gelede | Gesondheid

Henriette Lamprecht – ’n Wag-en-kyk-benadering en voorkeur vir spesifieke entstowwe is van die redes vir die trae reaksie tot die ministerie van gesondheid en maatskaplike...

Living a purposeful life

14 ure gelede | Mense

Rivaldo Kavanga“I would advise the youth to relentlessly go after whatever they desire unlimited. In pursuit of long-term gains and not short term rather.” Ndakondja...

Weer vir 30 Maart 2021

14 ure gelede | Weer

BINNELAND: Gedeeltelik bewolk en warm in die verre suide en die Zambezi-streek. Elders gedeeltelik bewolk en warm met verspreide donderbuie. Wyd verspreide donderbuie in die...

Huishoudelike geweld gedy in Kavango-Wes

14 ure gelede | Misdaad

Die naweek is drie sake van huishoudelike geweld in die Kavango-Wesstreek by die polisie aanhangig gemaak. Vrydag om 05:00 het ’n 36-jarige man in die...

Running for those who can’t

14 ure gelede | Skole

In honour of cerebral palsy awareness month and as part of a school project, four learners from Windhoek Afrikaanse Privaatskool ran with children, parents and...

Windhoek kry eie ekonomiese plan

14 ure gelede | Regering

Augetto Graig – Die burgemeester van Windhoek, dr. Job Amupanda, sê die regering moenie terugstaan sodat die private sektor die nasie tot werkskepping en ekonomiese...

Ending the double shift system at schools

14 ure gelede | Onderwys

Rivaldo KavangaBet-el Primary School on Friday, 26 March 2021 received three classroom blocks and a storeroom from The Craton Foundation. The classrooms were donated to...