Pakistan wen openingstryd

Andrew Poolman - 'n Senuagtige vertoning met die kolf en die bal het daartoe bygedra dat die Namibiese uitnodigingspan gister in die Kaap selde daarin kon slaag om sy vuis te bal in sy openingswedstryd by die wêreldtoernooi vir krieketspelers ouer as 50 jaar.Pakistan het die wedstryd met 177 lopies gewen, nadat hy 262/8 in sy toegelate 45 boulbeurte opgestapel het. Namibië is hierna vir net 85 uitgeboul.Met die Asiatiese nasie se groter bevolking (197 miljoen), ingebore passie vir die spel en status as 'n krieketmal toetsspelende land, behoort gister se uitslag nie as 'n groot verrassing te kom nie.Namibië, wat sy debuut in dié toernooi maak, het in sy boulvertoning straks hoop gekry toe hy Pakistan op 63/3 en 94/5 gehad het, maar aanvallende vyftigtalle deur Jaffar Quresh (71 nie uit nie van 67 balle, agt viere en drie sesse) en A. Khan (50 van 71 balle) het die skaal geswaai.Die draaier Dee Thakur was Namibië se voorste bouler (3/19 in 9 boulbeurte), terwyl heelwat duurder deurbrake ook deur sy vennote Ashley Griffiths (2/52 in 9) en Trevor Britten (2/79 in 9) gemaak is. Kaptein Lennie Louw was soos in sy jonger dae meestal ekonomies (0/35 in 7).In die Namibiese kolfpoging – teen 'n stywe vereiste kolftempo van 5.8 per boulbeurt – is Rudi Birkenstock (3 van 14 balle) eerste uitgeboul, onmiddellik gevolg deur sy aanvangsmaat Gielie Vermeulen (8 van 11 balle, 1x4).Sake het beter begin lyk terwyl Basie Buitendag en Gavin Murgatroyd saam gekolf het. Buitendag het drie grenshoue geslaan in sy 21 van 40 balle, terwyl Murgatroyd se waardevolle paaltjie op 18 (21 balle 4x4) geval het toe hy gevang is.Melt van Schoor is met die eerste bal skoongeboul en Ashley Griffiths (0), Dee Thakur (9) en Daneel van der Walt (1) kon ook nie veel bydra nie.Vir oulaas het Francois Erasmus op nommer nege darem onoorwonne met 17* (38 balle, 3x4) afgestap.Die Namibiërs, wie se toer deur FNB Namibia as hoofborg moontlik gemaak word, se volgende groepwedstryd is môre teen Wallis. Hul latere wedstryde is teen Engeland, Indië en Suid-Afrika.

Pakistan wen openingstryd

Kommentaar

Republikein 2025-05-14

Meld asseblief aan om kommentaar te lewer

Pakistan wen openingstryd

Kommentaar

Republikein 2025-05-14

Meld asseblief aan om kommentaar te lewer

MELD AAN

Advertensie