Paartjies vernoem babadogters na Erindi

Yolanda Nel – Nie een nie, maar twee paartjies het op Erindi tydens hul reise na Namibië verlief geraak en hul babadogters na die gewilde natuurreservaat vernoem.

Mnr. Daniel en me. Eleonor Rosam van Cairns in Australië het gesê hulle is bevoorreg om die wêreld plat te reis, fantastiese plekke te sien en wonderlike mense te ontmoet.

“Die belangrikste deel van ons reise is om plaaslike kulture te ontdek en Erindi is die ware Namibië in ons oë,” het Daniel gesê.

Hy het bygevoeg dat hulle hulself vereenselwig met die naam Erindi wat plek van water beteken, “want water is so kosbaar in Namibië, net soos in Australië”.

Die naam Erindi het die paartjie herinner aan die wonderlike mense wat hulle daar ontmoet en hul kuier daar onvergeetlik gemaak het.

“Ons dogter is vir ons kosbaar, net soos water in Namibië. Daar was nooit twyfel dat ons haar Erindi sou noem nie.

“Ons familie en vriende is mal oor haar naam. Dit is anders, maar pragtig en het ’n spesiale betekenis,” het hy gesê.

Die Rosams het Namibië al twee keer besoek en het baie Afrikaanse mense ontmoet. As hul baba ’n seuntjie was, sou hulle hom Ruan genoem het, maar hulle het van die begin af geweet Erindi sou die naam van hul babadogtertjie wees.

Hulle het by Erindi se Camp Elephant gebly en Daniel sê dit is vir hulle hul gunstelingplek waarheen hulle nog ooit gereis het.

“Die watergat en eg Namibiese gasvryheid van Erindi maak dat jy net weer en weer wil teruggaan. Ons praat hier in Australië van Erindi asof ons Windhoekers is wat elke maand daar gaan kuier,” het hy gesê.

Hulle beplan om Namibië weer te besoek en aan hul kinders te wys hoe ander mense met verskillende kulture leef.

‘NIE VERRAS’

Toe die Rosams hoor dat hulle nie die enigste ouers is wat hul dogter Erindi genoem het nie, was hulle nie verras nie.

“Dit is ’n pragtige naam, so ons is geensins verras dat daar nog ’n Erindi is nie,” het Daniel gesê.

Die ander Erindi is baie nader in buurland Suid-Afrika.

Volgens me. Leandri Labuschagne, het haar ouma die naam Erindi voorgestel nadat sy foto’s van hul besoek aan die natuurreservaat naby Omaruru gesien het.

“Ons besoek aan Erindi was ’n trougeskenk en dit was die eerste keer wat ek en my man buite die grense van Suid-Afrika gereis het,” het Labuschagne gesê.

Hul eerstelingseuntjie is Lian.

“Toe ons uitvind ons tweede kind is ’n dogtertjie, het ons geen ander naam as Erindi oorweeg nie.”

Erindi is nou 18 maande oud en Labuschagne sê sy was verras om te hoor daar is nog ’n meisietjie met dieselfde naam is.

- [email protected]