Oos-Kaap en Dlamini wag vir waaghalsige Namibiër

Tielman van Lill - Nathaniel Kakololo (bynaam Natty), die Namibiese veergewig, sal op 3 Maart in Suid-Afrika as uitdager teen Lerato Dlamini (bynaam Lights Out) in Oos-Londen vir 12 rondes deur die toue klim.Die 26-jarige Dlamini van Linksfield, Gauteng, verdedig sy agt maande oue veergewig silwertitel (57.15 kg) van die Wêreldboksraad (WBC) wat hy op 12 Julie 2019 in Jeddah, Saoedi-Arabië, verower het.Die Suid-Afrikaner het Dave Penalosa van die Filippyne, wat as die volgende Manny Pacquiao bestempel was, oor twaalf rondes met 'n eenparige puntebeslissing verslaan om die WBC-silwergordel by sy IBF-jeugtitel, WBC internasionale titel en IBF-kontinentale Afrika-gordel te voeg.Die sakgrootte vegter wat skaars 1.65 meter in sy sokkies staan, spog met 14 gevegte, 13 oorwinnings en ses uitklophoue (46%). Hy het net sy eerste geveg op 24 Julie 2015 in die RSA teen Michael Mokoena met punte verloor.Dlamini word tans deur die WBC as sy vierde beste veergewig op sy internasionale ranglys aangedui.Kakololo gaan dus 'n groterige hap teen Dlamini afbyt, want terwyl die Suid-Afrikaner die vierde aanspraakmaker op Gary Russell junior van Amerika se WBC-wêreldtitel is, word Natty op geen liggaam se ranglys erken nie.Selfs nie die minder gesaghebbende WBF tel vir Kakololo op sy wêreldranglys nie.Kakololo (30) van die MTC Salute-boksakademie, is wel die trotse houer van die Namibiese veergewigtitel, die WBF internasionale kroon en Afrika-boksunie (ABU) se gordel. Die ABU-titel het hy op 12 Desember verlede jaar teen Jeff Magagane (RSA) in Windhoek met 'n puntebeslissing bekom.Natty het elf gevegte op sy kerfstok waarvan hy drie met uitklophoue afgesluit het. Hy het een geveg verloor (teen Onesmus Nekundi) en een keer gelykop geboks. Hy was nog nooit met 'n uitklophou tot oorgawe gedwing nie, maar Lights Out kan dié stand van sake by die Orient Theatre in Oos-Londen bedreig.Die Salute-stal glo dat Kakololo oor die talent en vermoëns beskik om Dlamini te kan stuit en dat hy bestem is om 'n wêreldkampioen te word.Die ervare Dlamini is egter in 'n ander klas en Kakololo sal 'n wonderwerk moet lewer om sy teenstander te stuit.Dlamini sê: “Ek was al gekritiseer en mense het in my getwyfel. Maar dit het my nie verhoed om aan myself en my ambag (boks) te skaaf nie. My doel was nog altyd om my fokus te behou en met elke geveg te verbeter. Mense rondom my hoef nie in my te glo nie; ek glo in myself,” skryf hy op sy Facebookblad.– tielman@republikein.com.na

Oos-Kaap en Dlamini wag vir waaghalsige Namibiër

Kommentaar

Republikein 2025-05-14

Meld asseblief aan om kommentaar te lewer

Oos-Kaap en Dlamini wag vir waaghalsige Namibiër

Kommentaar

Republikein 2025-05-14

Meld asseblief aan om kommentaar te lewer

MELD AAN

Advertensie