Onsekerheid hang oor Windhoek

CoW vergader vandeesweek

05 February 2019 | Regering
Denver Kisting – Die Windhoekse stadsraad (CoW) vergader vandeesweek om te besluit oor die pad vorentoe betreffende tugstappe teen sy baas, mnr. Robert Kahimise.

Dít kom nadat CoW teen gister steeds nie geweet het wat om met pres. Hage Geingob se raad in dié verband aan hulle te maak nie.

Intussen bly Kahimise se toekoms duister met hernude pogings om hom in die pad te steek.

Dr. Peya Mushelenga, die minister van stedelike en landelike ontwikkeling, het gister beklemtoon sy rol is net om ’n skorsing, wat die raad aanbeveel, goed of af te keur.

Boonop het niks verander sedert sy goedkeuring van Kahimise se skorsing verlede jaar nie.

Al wat die hoërhof onlangs bevind het, is dat die liggaam, wat Kahimise laat verlede jaar vir die tweede keer in ’n kort tydperk geskors het, nie reg saamgestel is nie.

Sodra dít uitgesorteer word en daar geen “nuwe kwessies” ter sprake kom nie, kan die stadsraad van sy bestaande goedkeuring gebruik maak om opnuut van Kahimise ontslae te raak, sê Mushelenga.

Op ’n vraag of Geingob se bevel nie tot “nuwe kwessies” aanleiding gegee het nie, het Mushelenga Republikein aanbeveel om by die staatshoof te hoor wat sy opdrag beteken.

Kragtens dié aanbeveling moes CoW alle tugstappe teen sy uitvoerende hoof dadelik laat vaar.

Daarnaas het Geingob die stadsraad beveel om mnr. Abraham Kanime, die geskorste stadspolisiehoof, weer aan te stel.

Ofskoon Kahimise reeds sedert die begin van verlede week terug in die tuig is, hang die dissiplinêre swaard steeds oor sy kop.

Kanime se heraanstelling is ook steeds nie bekragtig nie.

Trouens, CoW het laat verlede week stukke by die Windhoekse hoërhof geliasseer, waarvolgens hy sê daar is steeds gronde om Kahimise opnuut in die pad te steek.

Mnr. Ignatius Semba, raadslid van die Popular Democratic Movement (PDM), het by navraag bevestig hulle vergader dié week oor die kwessie.

Semba was een van drie opposisieraadslede wat verlede jaar beweer het die ondersoek teen Kahimise is die gevolg van ’n stamgebonde heksejag.

In ’n onderhoud met NBC-TV die afgelope naweek het Geingob opnuut probeer verduidelik oor wat presies hy laat verlede week by Staatshuis gesê het.

Volgens hom is diegene, soos die grondwetkenner prof. Nico Horn, verkeerd, wat aanvoer sy uitlatings het die skeiding van magte tussen die regeringsorgane verontagsaam.

Geingob sê voorts indien daar ’n bestaande regsgeding is, moet daardie proses sy loop neem.

“As die mense hof toe gesleep is, sal ek verkeerd wees om te sê stop die proses.”

Maar, maan hy, dit is onaanvaarbaar dat die “stad brand” en die hoof van die stadspolisie word vir ’n lang tydperk met volle salaris geskors.

Volgens hom ly dienslewering onder dié binnegevegte.

“Ons gaan aan asof dit ’n grap is. Dis ’n grap en mense ly.”

Dr. Alfredo Hengari, presidensiële woordvoerder, het verlede Woensdagmiddag reeds namens Geingob gereageer.

Hy het nie gister op vrae oor wat die impak van die staatshoof se uitlatings en opvolguitsprake is, gereageer nie.

Kahimise, Kanime en hul regsverteenwoordigers het almal gister soos die graf geswyg.

Soortgelyk

 

‘Aarde lag deur haar gebarste gesig’

12 ure gelede | Weer

Ronelle Rademeyer – Groot dele van die Suide is vanoggend (Saterdag) sopnat.Die Facebook-blad Reën in Namibia van Philip Deetlefs is die ene jubelsange van dankbaarheid...

‘Aarde lag deur haar gebarste gesig’

12 ure gelede | Tuisblad

Ronelle Rademeyer – Groot dele van die Suide is vanoggend (Saterdag) sopnat.Die Facebook-blad Reën in Namibia van Philip Deetlefs is die ene jubelsange van dankbaarheid...

Parlement skop Woensdag sy werksaamhede af

1 dag gelede | Regering

Pres. Hage Geingob open Woensdag om 14:30 die Nasionale Vergadering se verrigtinge vir die jaar. Dit sal die negende sitting van die sesde parlement inlui.Die...

Registrasiefooie by NUST nou N$2 000 minder

1 dag gelede | Onderwys

Die Universiteit van Wetenskap en Tegnologie (Nust) se registrasiefooie is met N$2 000 van N$4 200 tot N$2 200 verminder. Dit volg nadat ouers en...

Man sterf in ongeluk naby Rehoboth

1 dag gelede | Ongelukke

‘n Man is Woensdag op slag dood nadat die voertuig waarin hy op reis was, die pad verlaat en omgeslaan het. Volgens die polisie se...

Grondwet mag nie ‘papierdroom’ wees

1 dag gelede | Mense

Ronelle Rademeyer - “Ons kan almal baie dankbaar wees vir die Grondwet wat ons geskryf en eenparig aanvaar het. Namibiërs se vryheid en beskerming lê...

Groter stoom vir TransNamib

1 dag gelede | Vervoer

font face="Verdana" > Augetto Graig - Die nasionale spoorwegonderneming TransNamib het ’n nuwe raad en strategiese besigheidsplan aangekondig waarmee die onderneming ’n nuwe rigting...

NSFAF: Finale betalings voor 28 Februarie

1 dag gelede | Onderwys

Die Finansiële Hulpfonds vir Namibiese Studente (NSFAF) het alle geld ontvang wat aan studente vir 2018-’19 uitbetaal moet word. Volgens die fonds het die verwerking...

Weer, Vrydag 8 Februarie 2019

1 dag gelede | Weer

BINNELAND: Sonning en bloedig warm in die verre noordweste. Elders sal dit gedeeltelik bewolk en baie tot bloedig warm wees met enkele tot wydverspreide donderbuie.KUS:...