Ons woestynland die agterdoek van Duitse fliek

17 September 2021 | Byvoegsels
Dr. Peya Mushelenga, die minister van inligting en kommunikasietegnologie, het die afgelope Maandag ’n hoëvlak-regeringsafvaardiging gelei na ’n internasionale multimiljoendollar-rolprentproduksie wat tans aan die kus verfilm word – ’n eerste sedert die aanvang van die Covid-19-pandemie.

Die doel van die besoek was om die leierskap en die multi-sektorale instellings vir belanghebbendes aan die ekonomiese impak van buitelandse produksies in Namibië bloot te stel.

Volgens die Namibiese medevervaardiger en fasiliteerder van die produksie, Joel Haikali van Joe Vision Production – wat ’n sleutelrol gespeel het om die internasionale produksie na Namibië te bring – werk meer as 1 644 Namibiërs voor én agter die kamera aan die produksie.

Onder hulle is die bekroonde aktrise Girley Jazama, wat die vroulike hoofrol speel teenoor die Duitse akteur Leonard Scheicher. Haikali het voorts gesê dit het twee jaar van mededinging teen Suid-Afrika geneem om die Duitse uitvoerende vervaardigers te oortuig om Namibië as die ruimte vir dié film te kies.

Hy het verwys na die uitdagings wat plaaslike fasiliteerders moet hanteer om meer buitelandse beleggers in die sektor te lok – met ’n beduidende gebrek aan aansporings en voordeel vir beleggers. Hy het bygevoeg dis nodig om die beste samewerkingsmodelle tussen die verskillende regeringsagentskappe te vind om dié prosesse te vergemaklik en te verseker dat die grootste deel van die begroting wat bestee word in Namibië bly en nie in Suid-Afrika nie – soos dit al jare lank die geval was.

Die uitdagings ter plaatse het weereens beklemtoon hoe noodsaaklik dit is dat die kreatiewe bedryf as ’n ekonomiese bydraer erken moet word – en talle voordele vir ander bedrywe soos gasvryheid, vervoer, kulturele klein- en mediumgrootte ondernemings inhou en sodoende broodnodige werksgeleenthede skep.

Om dié rede is dit van kardinale belang om die ontwikkeling van aansporingspakkette vir die buitelandse en plaaslike beleggers sowel as plaaslike belanghebbendes te bespoedig.

Die regisseur en draaiboekskrywer van die film, Lars Kraume, en die uitvoerende vervaardiger, Thomas Kufus, het die afvaardiging verwelkom en hul opgewondenheid oor die verfilming in Namibië uitgespreek.

Hoewel hulle beter aanbiedings van ateljees in Duitsland en Suid-Afrikaanse ontvang het, was hulle oortuig dat Namibië as filmbestemming die verhaal wat hulle deur dié rolprent wil vertel, die beste sou aanvul. Die film word teen ’n bedrag van N$130 miljoen deur Duitse subsidies en ander private beleggers gefinansier.

Ná die besoek aan die filmstel en pakhuise van die produksie, het Mushelenga gesê die besoek het meer lig gewerp op die direkte buitelandse belegging wat die plaaslike rolprentbedryf kan lok, en dat die regering krities na hierdie sektor moet kyk.

“Die belangrikheid van samewerking om te verseker dat ons aansporings vir buitelandse vervaardigers het, kan nooit oorbeklemtoon word nie. Ons jeug het werksgeleenthede nodig, en ná wat ek gesien het, is ek vas oortuig dié sektor kan die werkloosheidskrisis verlig en ontwikkeling in ons land meebring,” het hy gesê.

Volgens ’n skatting deur die Verenigde Nasies se Onderwys-, Wetenskap- en Kultuurorganisasie (Unesco) genereer die kreatiewe bedrywe wêreldwyd ongeveer US$2,3 triljoen terwyl dit 30 miljoen direkte werksgeleenthede skep. In Afrika kom dit neer op ongeveer US$58 miljard, waarvan slegs 5 miljard direk deur die rolprentbedryf gegenereer word weens die gebrek aan ontwikkeling in dié bedryf en die gebrek aan fasiliteite en subsidies.

Verna Sinimbo, die adjunkminister van nywerheidsontwikkeling en handel, het gesê haar ministerie het reeds die sektorale konsepraamwerk van Kulturele & Kreatiewe Industrieë na die kantoor van die prokureur-generaal gestuur, met die hoop dat die verwesenliking daarvan meer rolprentbeleggings na die land sal lok.

Die adjunkminister van onderwys, kuns en kultuur, Faustina Caley, het gevra vir deurlopende samewerking tussen die onderskeie belanghebbendes om verder in die ontwikkeling en opleiding van jongmense te belê. Haar ministerie werk in hierdie verband saam met die Namibiese Kunsteraad (NACN).

Die goewerneur van die Erongostreek, Neville Andre, het gesê hy is bly om te sien dat soveel jong Namibiërs is by hierdie produksie betrokke.

NALATENSKAP

Intussen het die burgemeester van Swakopmund, Louisa Kativa, op haar beurt gesê die dorpsraad sal maniere vind om met rolspelers in die bedryf saam te werk en te help met die bewaring van rekwisiete wat op die stel gebruik word sodat Namibië ’n versameling kan hê wat in toekomstige produksies gebruik kan word.

Die raadsvoorsitter van die Namibiese Filmkommissie (NFC), Abius Akwaake, het Namibië se potensiaal as ’n filmbestemming beklemtoon – met rolprente soos The Mummy, Mad Max en Flight of the Phoenix wat in Namibië verfilm is.

Terwyl lande soos Suid-Afrika, Marokko, Kenia en Rwanda wat aansporings aan internasionale produksiespanne bied, kan Namibië egter ’n beduidende afname in filmbeleggings verwag. Juis om dié rede moet doelbewus opgetree word om sulke aansporings te bespoedig en die land as ’n topkeuse-filmbestemming in Afrika te vestig.

Die produksieproses het op 30 Augustus afgeskop en word tot Oktober vanjaar in die streke Erongo, Otjozondjupa en Khomas verfilm.

Dié fiktiewe rolprent volg ’n jong Duitse antropoloog wat te midde van ’n oorlog op ’n navorsingsmissie deur die destydse Deutsch Süd West Afrika gaan in ’n poging om die rasseteorie te weerlê. Tydens sy reis probeer hy ’n jong Herero-vrou opspoor wat hy tydens ’n koloniale uitstalling in Berlyn ontmoet het.

Die rolprent is tot dusver in geheimhouding gehul en meer inligting sal mettertyd beskikbaar wees.

FOTO’s
Die regeringsafvaardiging het die filmstel op Arandis besoek. Foto's Verskaf

Soortgelyk

 

Uitstel van eksamens: Integriteit van eksamen, kwalifikasie moet beskerm...

12 ure gelede | Onderwys

Die ministerie van onderwys, kuns en kultuur sê dit het 'n wettige kontrak met Cambridge International om te verseker dat kredietwaardige eksamens geskryf word wat...

Styging van 56% in nuwe gevalle, 184 gister aangemeld

18 ure gelede | Gesondheid

Gister is 184 nuwe gevalle aangemeld, 'n positiewe koers van 3,9% en 56% meer as die vorige dag. Die meeste gevalle is in Windhoek en...

Veldbrande woed al tien dae

1 dag gelede | Ongelukke

Tanja Bause’n Groot aantal beeste loop langs distrikspaaie noordoos van Windhoek waar verwoestende veldbrande boere tussen Steinhausen en Omitara genoop het om grensdrade te knip...

‘Voltooi vanjaar se eksamen’

1 dag gelede | Ministeries

Henriette LamprechtSkryf die vraestelle wat moontlik is vóór die einde van die jaar met nuwe vraestelle in die plek van dié wat uitgelek het, identifiseer...

Oscar-benoeming dalk in ‘The White Line’ se visier

1 dag gelede | Byvoegsels

Die plaaslike rolprent The White Line is amptelik in die wedloop om oorweeg te word vir ’n moontlike Oscar-benoeming. Dit is die eerste Namibiese rolprent...

Voortrekkers trap vir renosters

1 dag gelede | Byvoegsels

Karli RudolphDie Voortrekkers vier vanjaar hul 90ste bestaansjaar met die tema “Voortrekkers gaan groot”. Die Namibiese Voortrekkers het daarom besluit om hul eie span vir...

V5 Digital a forerunner in digital solutions

1 dag gelede | Tegnologie

Iréne-Mari van der WaltMore than three years ago, Armin Wieland founded his business, V5 Digital, after noticing that there was a lack of companies in...

Do it with passion or not at all

1 dag gelede | Howe

Desiree Gases Ngeendina Angula, born and raised in Greenwell, Windhoek, moved to Cape Town, South Africa, when she was 13 years old and lived there...

A love for engineering and airplanes

1 dag gelede | Vervoer

Wetumwene Shikage Describing her journey at Fly Namibia, Gabriela Kamaahene says the experience has been surreal. She says the company continuously grows and she...