Ons Taal: Weinig woorde

Hallo Ma,Daar waar Mamma bly, verander dinge of bly dit dieselfde? En as dinge verander, krap dit ook mense om soos hier by ons? Ek word toenemend bewus van verandering, Ma. Ek besef niks is vir ewig nie. Nie eers die ewigheid nie. Die heelal bly verander en aanpas. Dood, evolusie, geboorte, dood. Met taal is dit dieselfde storie. Weinig woorde . . . Van weinig gepraat: “weinig” word al minder in Afrikaans gebruik, en “min” al meer. En omdat ek en my studente ons hierdie semester met Nederlands besig hou, vind ek dat woorde soos “langsaam”, “naas”, “boos”, “heet” (hoe heet jy?), “onverskrokke”, “agting”, “onbesonne”, “komieklik” en nog baie ander vir die nuwe geslag Afrikaanspraters onbekend is. En dan is dit juis hierdie woorde wat in Nederlands heeltemal aan die orde van die dag is – ook onder die Nederlandse millenniërs. Die ander uiterste van die saak is dat ’n sêding soos “ek lus koffie” (wat ek gereeld onder die studente hoor) ’n onding in Afrikaans is, terwyl dit ’n inding in Nederlands is omdat “ik wel nu koffie lust”. “Ik houd niet van koffie”, want “houden van” in Nederlands beteken liefhê. Jy kan wel in Nederlands sê “ik heb zin in koffie”, terwyl dit die ouer garde Afrikaanspraters is wat sin in koffie het - al hou dit ons wakker.Ma, die cherry (oeps, kersie) op die koek is ’n woord waarin ek my vanoggend vasgeloop het, en my uit soos ’n kers gelaat het. Het Ma al van ’n “plebejer” gehoor? Nee, Ma, ek dink werklik nie Ma sou nie. Ek is vrek nuuskierig of daar van my landgenote is wat al van dié woord gehoor het . . . Verander taal daar waar Ma bly? Word dit meer modern? Of is modern daar nie eens ’n konsep nie? Net nog een vragie, Ma: Bly alles soos dit in die begin was, vir ewig daar by Ma-hulle?Baai, my Ma.Dr. Chrisna Beuke-MuirVakgroep AfrikaansUniversiteit van Namibiëcbeuke@unam.na

Ons Taal: Weinig woorde

Kommentaar

Republikein 2025-05-14

Meld asseblief aan om kommentaar te lewer

Ons Taal: Weinig woorde

Kommentaar

Republikein 2025-05-14

Meld asseblief aan om kommentaar te lewer

MELD AAN

Advertensie