‘Ons is reg,’ sê stad se privaat hospitale

Henriette Lamprecht - Windhoek se vier privaat hospitale het ’n reaksieplan gereed om die Covid-19-pandemie in fases aan te pak. Bevestigde Covid-19-gevalle in die hoofstad het die afgelope dae toegeneem met 14 nuwe gevalle wat gister aangekondig is.

Die drie fases waarin die plan geïmplementeer word, beteken elk van die hospitale – Lady Pohamba Privaat Hospitaal, Rooms-Katolieke Hospitaal, Rhino Park Privaat Hospitaal en Mediclinic Windhoek – het ’n aantal beddens beskikbaar wat aan Covid-19-pasiënte toegeken is.

Volgens me. Esme Botes, voorsitter van die Namibiese Vereniging vir Private Gesondheidsgeriewe (NAPH), maak die hospitale sodoende voorsiening dat Covid-19-pasiënte, sowel as nie-Covid-19-pasiënte in die betrokke hospitale gehelp kan word. Deeglike kommunikasie tussen die hospitale se bestuur het ook ten doel om mekaar met voorraad, personeel en toerusting te ondersteun.

Botes beklemtoon die plan is nie in yster gegiet nie en die situasie kan verander.

“Nou het ons egter ’n raamwerk met wonderlike personeel wat gereed en toegewyd is om alle pasiënte te help,” het sy gesê.

Die plan word in drie fases en geleidelik in werking gestel en fokus onder meer op die beskikbaarheid van beddens. Tydens die fases word al vier hospitale betrek, wat ’n aantal beddens in verwante sale beskikbaar stel. Die drie fases verseker dat ’n hoeveelheid beddens volgens Botes beskikbaar is om die hoofstad te bedien.

“Deur die plan geleidelik te implementeer, word ’n veilige situasie geskep waarin alle pasiënte genoeg sorg kry,” sê Botes.

In fase 1 en 2 word alle nie-Covid-19-verwante, pediatriese en kraamgevalle by Rhino Park en ook Mediclinic hanteer en verwys.

“Deur die plan in fases te doen en verskillende pasiënte na mekaar te verwys, beskerm ons ons multi-dissiplinêre mediese spanne, personeel en ons pasiënte en word die risiko so laag as moontlik gehou,” verduidelik Botes.

Sy beklemtoon alle hospitale en teaters is gereed en “gaan mekaar se hande vat en ondersteun.”

Volgens Botes beteken dit daar is ’n “satelliettak” in elke uithoek van die hoofstad, insluitend sentraal, om Covid-19-pasiënte te ondersteun.

Met verwysing na die beskikbaarheid van teaters sê Botes die betrokke hospitale hanteer wel nie-noodgevalle wat deur mediese fondse goedgekeur is.

’n Pasiënt word in so geval drie dae voor die beplande prosedure versoek om ’n toets vir Covid-19 te doen om te bevestig of die persoon positief of negatief is. In dié verband bestaan ’n ooreenkoms ook met Pathcare om die uitslae reeds 72 uur voor die prosedure vry te stel.

In die geval van ’n noodoperasie of waar daar nie tyd was vir ’n toets nie, word die betrokke pasiënt hanteer asof hy of sy moontlik positief kan wees en geld die nodige protokol vir die hospitaal, teater en personeel.

Botes beklemtoon “daar is geen manier dat enige pasiënt nié gehelp sal word nie”.

“Ons is nooit onwillig om iemand in nood te help nie.”

In ’n poging om risiko vir blootstelling aan pasiënte en personeel te verlaag, word geen besoekers ook sedert 1 Augustus by die vier hospitale toegelaat nie. Uitsonderings kan wel geld, maar Botes versoek besoekers om “jouself en jou mense” se gesondheidsrisiko in ag te neem.

“Ons moet almal beskerm en kan nie ons mediese spanne en ander pasiente blootstel nie.”

Met verwysing na die beskikbaarheid van suurstof sê Botes elke kamer in ’n privaat hospitaal het suurstof en die hospitale het ook ’n aantal ventilators beskikbaar.

“Ons poog om beddens beskikbaar te hê, ook vir die gewone pasiënt.”

Botes sê die hospitale het ’n goeie verhouding met die staat en “ons help en akkommodeer mekaar waar ons kan”.

Personeel is ook deeglik opgelei in die hantering van Covid-19-pasiënte.

Die ministerie van gesondheid en maatskaplike dienste (MoHSS) is ook bewus van die hospitale se aksieplan, terwyl mediese fondse na hul lede sal omsien volgens hul beskikbare voordele. Daar is beklemtoon die hospitale kan Covid-19 én nie-Covid-pasiënte bedien.

- [email protected]