Ongelukke, dodetal op paaie neem af

Polisie maan weer oor padreëls

04 January 2017 | Ongelukke
Sedert die Namibiese polisie se padverkeersveldtog op 22 November laasjaar begin het, is minder ongelukke, besering en sterftes as in die ooreenstemmende tyd in 2015 aangemeld.

Volgens ‘n verklaring van die polisie is vanaf 22 November tot 26 Desember 2016 altesaam 398 ongelukke in vergelyking met 455 in die ooreenstemmende tyd die vorige jaar aangemeld. Altesaam 741 mense teenoor 908 is in dié tyd beseer en 65 mense is dood teenoor die 80 van 2015.

Die meeste ongelukke, 32 persent, het in die Khomasstreek voorgekom (132). Dit is nege persent minder as die 144 ongelukke wat in 2015 in dieselfde tyd voorgekom het. Zambezi se paaie was die veiligste, met net drie ongelukke teenoor die sewe in die ooreenstemmende tyd in 2015.

Die meeste sterftes het ook in Khomas voorgekom, waar 13 mense in dié tyd in padongelukke dood is. Dit is aansienlik meer as die ses sterftes in dieselfde tyd in 2015.

In 142 gevalle van ongelukke landwyd het voertuie omgeslaan, 109 was in botsings betrokke, 68 voetgangers is raakgery, fietsryers was in 14 gevalle betrokke, diere is in 15 ongelukke as die oorsaak daarvan aangevoer en in 11 gevalle is teen ‘n stilstaande voorwerp gebots.

Ses gevalle is aangemeld waar voertuie die pad byster geraak het. Ander onbekende redes was vir die res van die ongelukke verantwoordelik, sê die polisie.

Die polisie het in die tyd 85 653 voertuie gestop, 19 545 motorbestuurders vir dronkbestuur getoets, 12 465 padwaardigheidstoetse uitgevoer en 198 mense in verband met verkeersoortredings aangekeer.

In die //Karasstreek is die meeste mense (25) vir die bestuur van ‘n voertuig onder die invloed van drank in hegtenis geneem.

Altesaam 1 081 mense is vir spoedoortredings aangekeer en boetes ter waarde van N$1 325 637 is gegee; 1 092 mense vir oortredings met rybewyse; 42 vir onpadwaardige voertuie, 612 vir motorryers wat nie hul veiligheidsgordels gedra het nie; 341 vir motorvoertuiglisensies wat verval het; 163 vir oorlaaide voertuie, 58 vir onbedagsame padgebruik en 95 vir die onwettige gebruik van ‘n selfoon.

Die adjunkinspekteur-generaal: operasies van die Namibiese polisie, genl.maj. James Tjivikua, sê ondanks ‘n afname in ongelukke, beserings en sterftes, bly die groot lewensverlies vanweë ongelukke ‘n bron van groot kommer.

“Met die volle samewerking van die publiek kan ons ‘n betekenisvolle verskil in hierdie verband maak. Ek versoek dus opnuut alle padgebruikers om gehoor te gee aan die padreëls en -regulasies,” het hy in ‘n verklaring gesê.

Die afgelope naweek

Nampa berig dat ‘n Kongolese man Vrydag in ‘n botsing op die Otjiwarongo-Outjo-pad dood is.

Die sedanvoertuig waarin hy op reis was, was betrokke in ‘n trompop botsing met ‘n ander voertuig waarin twee Suid-Afrikaanse burgers gereis het wat met vakansie in Namibië was.

Volgens die polisie in Otjizondjupa is die oorledene geïdentifiseer as Josue Ntambwe Kabongo, oorspronklik van die Demokratiese Republiek van Kongo (DRK) afkomstig.

Die ongeluk het omstreeks 17:30 plaasgevind.

Die Suid-Afrikaanse egpaar is vir ligte tot ernstige beserings in die Otjiwarongo-staatshospitaal behandel.

In ‘n afsonderlike voorval het die 29-jarige Angelina Kaunapawa omgekom nadat die sedanmotor waarmee sy gery het op die Otavi-Kombat-pad omgeslaan het. Die voertuig het ses insittendes gehad, insluitende die 38-jarige motorbestuurder, wat na bewering beheer oor die voertuig verloor het. Die bestuurder en vier ander insittendes is beseer en is na die hospitaal op Tsumeb vir mediese behandeling geneem.

Die polisie het in albei gevalle sake van strafbare manslag geopen.

Soortgelyk

 

Skooltragedie: Elfjarige skiet gr.5-seun dood

1 uur gelede | Misdaad

‘n Dertienjarige leerder van die Imbili Gekombineerde Skool in die Ohangwenastreek is vanoggend oorlede nadat hy deur ‘n klasmaat geskiet is.Volgens ‘n verklaring van die...

Watertenks vir Windhoek se informele nedersettings

8 ure gelede | Gesondheid

Die Windhoekse munisipaliteit (CoW) en NamWater gaan vroeg aanstaande maand 105 mobiele watertenks aan informele nedersettings in die hoofstad voorsien. Die watertenks sal in die...

Nkosi se bewegings gemonitor

19 ure gelede | Omgewing

Des Erasmus - Wanneer Cheeky, die stout leeuwyfie van die Ugab­vallei, weer met haar geliefde Nkosi herenig word, gaan hy 'n boordjie dra. Nkosi is...

'Sh*thole'-video versprei soos veldbrand

19 ure gelede | Toerisme

Tanja Bause - Skaars 12 ure nadat Amerika se president Donald Trump na Afrikalande as “sh*thole”-­lande verwys het, het Gondwana­ Collection Namibia in ­samewerking met...

Weer vir 18 Januarie 2018

19 ure gelede | Weer

BINNELAND: Gedeeltelik bewolk en baie warm in die verre Ooste. Elders sal dit gedeeltelik bewolk en baie tot bloedig warm wees met enkele geïsoleerde donderstorms....

Leerlingdokters, -aptekers kán registreer

19 ure gelede | Gesondheid

Henriette Lamprecht - Die registrasie van finalejaar- mediese studente as leerlingdokters en -aptekers sal toegestaan word die oomblik wanneer hulle hier­voor aansoek doen. Dit was...

Hepatitis E: Plakkers voel magteloos

19 ure gelede | Gesondheid

Maria EisebInwoners van informele woonbuurte leef tussen vullis en voel hulle het nie die opsie om die siektes vry te spring wat dit kan veroorsaak...

Cholera in Zambië se impak op invoere minimaal

19 ure gelede | Landbou

Ronelle Rademeyer - Met die grens wat vandag vir die invoer van mielies na Namibië open, word nie voorsien dat die invoerverbod op vars ­produkte...

Berguitta hou reën weg

19 ure gelede | Omgewing

Die enorme tropiese storm ­Berguitta wat oos van suidelike Afrika lê, is die rede waarom daar tans nie veel reën in Suidelike Afrika val nie....