Ongeluk eis ma en seun
Spoed en roekelose bestuur veroorsaak dodelike ongelukke
Augetto Graig - Spoed is deel van die oorweldigende gevaar wat Namibiese padgebruikers daagliks op die land se paaie in die gesig staar.
Dinsdag het dit gelei tot die tragiese dood van 'n 37-jarige ma en haar 14 maande oue seuntjie. Hulle was passasiers in 'n wit bakkie wat omstreeks 16:30 op die pad tussen Otavi en Otjiwarongo teen 'n stilstaande lorrie vasgery het. Hulle is op slag dood. Hul families is nog nie amptelik van hul dood ingelig nie en dus kan hul name nie bekend gemaak word nie.
Die ongeluk het sowat 35 km noord van Otjiwarongo plaasgevind. Die 26-jarige, manlike drywer van die bakkie is met geringe beserings in die Otjiwarongo-staatshospitaal opgeneem.
Die woordvoerder van die Namibiese polisie in die Otjozondjupastreek, ao. Maureen Mbeha, sê sy is oortuig spoed het 'n rol gespeel omdat die drywer net 'n uur voor die voorval oor 'n stopstraat in Dr. Hage Geingob-rylaan op Otjiwarongo gery het. Verkeersbeamptes moes hom glo agternajaag om aan hom 'n boete en waarskuwing uit te reik. Nogtans het die N$1 500 nie die gewenste gevolg gehad nie. Hy het 'n paar kilometer verder teen die trok gebots.
Die trok het op die pad gestaan, agter 'n ry karre wat hul beurt by 'n padwerkblokkade afgewag het. Die deel van die pad word tans herseël. Tekens van die padwerke en spoedbeperkings op die deel van die pad was sigbaar, maar blykbaar geïgnoreer, volgens Mbeha. Die bestuurder van die bakkie het probeer rem, soos aangedui deur die buitebande se glymerke op die pad, maar het beheer oor die voertuig verloor en agter in die vragmotor vasgery.
Mbeha het alle gebruikers van Namibië se nasionale paaie versoek om vir die lewe van hul passasiers en padgebruikers verantwoordelikheid te neem. “Ek doen 'n beroep op alle motoriste om te hou by die verkeersreëls en aandag aan verkeerstekens te gee. Hou by die nasionale spoedgrens van 120 km per uur om onnodige motorvoertuigongelukke en die verlies van lewens te vermy,” het sy gister aan Republikein gesê. Die polisie ondersoek tans 'n saak van strafbare manslag teen die drywer, wie se naam nog nie bekend gemaak is nie.
Gedurende die tydperk van 3 Mei tot Dinsdag 9 Mei het die Namibiese polisie deur middel van Operasie Opotuli 30 boetes vir spoedoortredings en 240 vir kwessies rakende rybewyse opgelê, terwyl 32 voertuie weens onpadwaardigheid afgetrek is. Altesaam 126 mense het nie hul veiligheidsgordels gebruik nie, 19 oortreders is vir roekelose bestuur vasgetrek asook 32 wat onwettig selfone gebruik het terwyl hulle bestuur het. Nóg 21 oortreders is aangespreek oor die onwettige verbysteek van ander voertuie.
Dinsdag het dit gelei tot die tragiese dood van 'n 37-jarige ma en haar 14 maande oue seuntjie. Hulle was passasiers in 'n wit bakkie wat omstreeks 16:30 op die pad tussen Otavi en Otjiwarongo teen 'n stilstaande lorrie vasgery het. Hulle is op slag dood. Hul families is nog nie amptelik van hul dood ingelig nie en dus kan hul name nie bekend gemaak word nie.
Die ongeluk het sowat 35 km noord van Otjiwarongo plaasgevind. Die 26-jarige, manlike drywer van die bakkie is met geringe beserings in die Otjiwarongo-staatshospitaal opgeneem.
Die woordvoerder van die Namibiese polisie in die Otjozondjupastreek, ao. Maureen Mbeha, sê sy is oortuig spoed het 'n rol gespeel omdat die drywer net 'n uur voor die voorval oor 'n stopstraat in Dr. Hage Geingob-rylaan op Otjiwarongo gery het. Verkeersbeamptes moes hom glo agternajaag om aan hom 'n boete en waarskuwing uit te reik. Nogtans het die N$1 500 nie die gewenste gevolg gehad nie. Hy het 'n paar kilometer verder teen die trok gebots.
Die trok het op die pad gestaan, agter 'n ry karre wat hul beurt by 'n padwerkblokkade afgewag het. Die deel van die pad word tans herseël. Tekens van die padwerke en spoedbeperkings op die deel van die pad was sigbaar, maar blykbaar geïgnoreer, volgens Mbeha. Die bestuurder van die bakkie het probeer rem, soos aangedui deur die buitebande se glymerke op die pad, maar het beheer oor die voertuig verloor en agter in die vragmotor vasgery.
Mbeha het alle gebruikers van Namibië se nasionale paaie versoek om vir die lewe van hul passasiers en padgebruikers verantwoordelikheid te neem. “Ek doen 'n beroep op alle motoriste om te hou by die verkeersreëls en aandag aan verkeerstekens te gee. Hou by die nasionale spoedgrens van 120 km per uur om onnodige motorvoertuigongelukke en die verlies van lewens te vermy,” het sy gister aan Republikein gesê. Die polisie ondersoek tans 'n saak van strafbare manslag teen die drywer, wie se naam nog nie bekend gemaak is nie.
Gedurende die tydperk van 3 Mei tot Dinsdag 9 Mei het die Namibiese polisie deur middel van Operasie Opotuli 30 boetes vir spoedoortredings en 240 vir kwessies rakende rybewyse opgelê, terwyl 32 voertuie weens onpadwaardigheid afgetrek is. Altesaam 126 mense het nie hul veiligheidsgordels gebruik nie, 19 oortreders is vir roekelose bestuur vasgetrek asook 32 wat onwettig selfone gebruik het terwyl hulle bestuur het. Nóg 21 oortreders is aangespreek oor die onwettige verbysteek van ander voertuie.
Kommentaar
Republikein
Geen kommentaar is op hierdie artikel gelaat nie