Omgekrapte Kakololo wil Dlamini gaffel

Nathaniel Kakololo (bynaam Natty), Namibië se veergewigkampioen van die Afrika-boksunie (ABU), klim Sondag in Suid-Afrika teen Lerato Dlamini deur die kryttoue.Die 31-jarige Namibiër hoop om Dlamini in die Orient-teater in Oos-Londen van sy Wêreldboksraad- (WBC) silwertitel te ontneem.Kakololo sê hy is gereed om die wêreld vir Dlamini warm te maak en sê hy het nog altyd verkondig dat die WBC 'n groot rol in sy boksloopbaan gaan speel.“Dlamini sal reg vir 'n veldslag soos min moet wees. Nadat ek verlede jaar die ABU-veergewigtitel ingepalm het, was ek op die uitkyk om vir 'n WBC-titel deur die toue te klim. God het my dié geleentheid gegee om nou te floreer. Ek gaan Suid-Afrika toe om daar 'n opskudding te veroorsaak en die Namibiese volk iets te gee om oor te glimlag,” spog die bokser.Kakololo sê sy reis na die buurland is nie 'n besoek nie, maar om die vrugte van sy harde werk te gaan pluk.“Ek is so reg soos kan kom vir Sondagaand se geveg. Ek gaan as die nuwe WBC-silwerkampioen bekroon word. “Ek is in topvorm en hiervoor moet die MTC Salute-boksakademie, my afrigters en skermmaats al die krediet kry,” het Kakololo vertel.Die Namibiër het elf gevegte agter die rug waarvan hy nege gewen (drie uitklophoue), een keer gelykop geboks en teen sy landgenoot Onesmus Nekundi met punte verloor het (November 2015).Dlamini spog met 13 oorwinnings (ses uitklophoue) en 'n enkele puntenederlaag in sy debuutgeveg in 2015.Sy afrigters Tobias Nashilongo en Elifas Namundjebo sal vandag saam met Kakololo na Suid-Afrika vertrek.- Nampa

Omgekrapte Kakololo wil Dlamini gaffel

Kommentaar

Republikein 2025-05-14

Meld asseblief aan om kommentaar te lewer

Omgekrapte Kakololo wil Dlamini gaffel

Kommentaar

Republikein 2025-05-14

Meld asseblief aan om kommentaar te lewer

MELD AAN

Advertensie