Oliesoektog: D-dag vir besware om die draai

20 January 2021 | Omgewing
Ronelle Rademeyer – Die olie- en gasmaatskappy Reconnaissance Energy Namibia (ReconAfrica) moet teen Vrydag 5 Februarie sy aansoek vir ’n omgewingsklaringsertifikaat (ECC) by die ministerie van die omgewing, bosbou en toerisme indien.
’n Omgewingsimpakstudie (EIA) en -bestuursplan (EMP) moet dié aansoek vergesel. ReconAfrica se boorinstallasie waarmee hy sowat 50 km suidoos van Rundu sy eerste toetsgat gaan boor, het in Desember per skip by Walvisbaai aangekom. Die prospektering sal toon of daar wel olie is.
Dié Kanadese groentjie in die olie- en gasbedryf hou in voorleggings aan voornemende beleggers vol hy het “’n massiewe petroleumbron in die Kavangokom ontdek”. Dié bron “kan miljarde vate olie” lewer, sê hy.
ReconAfrica haal op sy webblad ’n geochemikus, Dan Jarvie van Worldwide Geochemistry, aan wat sê die aard van die sediment is sodanig dat dit “produktief” sal wees en “hoë gehalte olie lewer”.
ReconAfrica het Woensdag in Vancouver, Kanada, aangekondig hy het Polaris Natural Resources Inc gekontrakteer om die tweedimensionele (2D) seismiese opnames te doen.
Die maatskappy is van plan om oor 450 km 2D-data te versamel, te verwerk en te interpreteer. Dit maak volgens hom deel uit van die program om drie gate vir prospektering te boor.
“Die voorgestelde seismiese opname sal langs bestaande paaie gedoen word,” lui die verklaring.
ReconAfrica sê ook hy is bly om aan te kondig die goedkeuringsproses vir ’n klaringsertifikaat het begin en vergaderings in dié verband sal gehou word. ’n Luide wekroep deur omgewings- en ander drukgroepe klink die laaste paar maande op verskeie platforms op teen die plan om hier na olie te soek – enersyds omdat fossielbrandstof-ontginning indruis teen klimaatsplanne en tweedens omdat dit ’n verwoestende impak op die ongerepte Okavango-delta kan hê.
Laasgenoemde is een van die mees ikoniese natuurgebiede ter wêreld, en is in 2014 as wêrelderfenisgebied gelys.
ReconAfrica se stigter en medeaandeelhouer, mnr. Craig Steinke, het in Desember in ’n onderhoud met Republikein ontken dat hidrobreking as ontginningsmetode gebruik gaan word.
Dit is ondanks aanduidings vroeër aan beleggers dat “moderne brekingstimulerings” die groot volumes olie sal lewer.
Risk-Based Solutions (RBS), wat tegniese spesialisdienste vir maatskappye in die olie-, gas-, mineraal- en energiebedryf lewer, het die publiek in kennisgewings na drie openbare vergaderings uitgenooi.
Die eerste een vind vandag op Nkurenkuru en die tweede een Vrydag op Rundu plaas. Van 23 tot 25 Januarie kom plekke soos Ncamagoro, Gcuru, Ncuncuni en Ncaute aan die beurt.
Belanghebbendes moet per e-pos by [email protected] na registreer, of hulle kan dr. Sindila Mwiya van RBS by 081 141 3229 bel.
Skriftelike voorleggings deur geraakte partye moet RBS teen Vrydag, 29 Januarie bereik.
[email protected]

Soortgelyk

 

Namibië se Ontplooiings- en Immuniseringsplan "onder die beste...

1 uur gelede | Gesondheid

Namibië se Ontplooiings- en Immuniseringsplan teen Covid-19 is deur die Wêreldgesondheidsorganisasie (WHO) as "een van die beste in die wêreld" beskryf. Volgens die minister van...

N$583 miljoen vir Namibië se Covid-19 Ontplooiings- en Immuniseringsplan...

2 ure gelede | Gesondheid

Die totale voorgestelde begroting vir Namibië se Ontplooiings- en Immuniseringsplan vir Covid-19-entstowwe is N$583 miljoen waarvan N$484,8 miljoen vir die aankoop van die entstowwe is....

Covid-19-regulasies geld tot 31 Maart

2 ure gelede | Gesondheid

Pres. Hage Geingob het pas by Staatshuis aangekondig die huidige Covid-19-maatreëls geld vir die volgende 36 dae vanaf middernag tot 31 Maart (Onafhanklikheidsdag op 21...

Knopvelsiekte breek in Omaheke uit

3 ure gelede | Landbou

Knopvelsiekte het by Eiseb in die Omahekestreek uitgebreek en die beweging van beeste in dié gebied is tot verdere kennisgewing opgeskort.Volgens dr. Albertina Shilongo, hoof-veeartsenybeampte...

Metro spoils its customers

4 ure gelede | Plaaslik

Metro Namibia celebrated its birthday in style once again by spoiling five lucky customers each to a trailer of their own, stocked with N$5,000-00 worth...

Vrou woon in haar motor by hospitaal

13 ure gelede | Mense

Henriette Lamprecht – 'n Bejaarde vrou van die kus woon die afgelope week in haar motor in die parkeerterrein van 'n staatshospitaal in Windhoek om...

Toekoms van 77 Air Nam-vlieëniers onseker

13 ure gelede | Vervoer

Francoise Steynberg – Altesaam 77 vlieëniers van Air Namibia se toekoms is onseker. Boonop het bykans 75% van die redery se vlieëniers se lisensies verval...

Ses damme voller as 100%

13 ure gelede | Weer

Elvira Hattingh – Terwyl altesaam sowat ses Namibiese damme tans 100% of meer water bevat, oorstroom die Zambezirivier sy walle, met water wat in die...

Weer vir 24 Februarie

13 ure gelede | Weer

WEERWAAK: Wydverspreide donderbuie word in Ohangwena, Oshikoto, Otjozondjupa en Omaheke verwag. BINNELAND: Sonnig en warm in die Suide en Weste, andersins gedeeltelik bewolk en baie...