Nuwe variant op voorstoep

32 mutasies van stekelproteïen

26 November 2021 | Gesondheid
Henriette Lamprecht

Namibië is altyd bekommerd oor die teenwoordigheid van virusse in welke vorm ook al en veral wanneer 80% van die bevolking nie ingeënt is nie.

Dit is die antwoord van die minister van gesondheid en maatskaplike dienste, dr. Kalumbi Shangula, oor die nuwe variant van Sars-CoV-2 wat groot kommer onder wetenskaplikes wek en reeds in twee van Namibië se buurlande naamlik Botswana en Suid-Afrika aangemeld is.

Die B.1.1.529 of Botswana-variant het 32 mutasies in die stekelagtige proteïen van die virus wat dit in staat stel om makliker die immuniteitstelsel te ontwyk en na meer mense te versprei. Buiten die vier gevalle in Botswana en vier in Hongkong, vuur die variant die styging in gevalle in veral Gauteng in die buurland aan waar teen druktyd 100 gevalle aangemeld is. Dit volg nadat dit Dinsdag vir die eerste keer in Suid-Afrika gerapporteer is.

Hier ter plaatse sê Shangula toets Namibië as deel van die land se moniteringstelsel vir alle variante wat moontlik in die land mag sirkuleer.

Op ’n vraag of Namibië nou oorweging sal skenk vir aanvullende dosisse aangesien byna 270 000 dosisse AstraZeneca en Pfizer teen einde Januarie verval, het Shangula gesê die besluit is geneem om ’n bykomende primêre dosis in spesifieke gevalle toe te dien. Volgens Shangula is die besluit nie geneem omdat dosisse verval nie, maar as deel van “omsigtige inentingsbestuur”. Teen gister was nog net 300 633 mense volledig ingeënt van die teiken van 1,5 miljoen inwoners teen Maart aanstaande jaar om 60% kudde-immuniteit te verseker.

Prof. Tulio de Oliveira van die KwaZulu-Natal Research Innovation and Sequencing Platform (KRISP) is die nuwe variant ’n “baie ongewone konstellasie van mutasies”, met meer as 30 mutasies op die stekelproteïen van die virus. Volgens De Oliviera het dit tien mutasies op die reseptorbindende domein waar die hoogs aansteeklike Delta-variant slegs twee en die Beta-variant slegs drie gehad het.

Dr. Tom Peacock, ’n viroloog by die Imperial College in London, het op Twitter gesê die variant moet “baie beslis” weens die “aaklige stekelprofiel” gemonitor word omdat laasgenoemde dit meer aansteeklik as enige ander variant tot dusver maak.

Hy sê die feit dat dit reeds in Asië is, beteken dit is dalk meer wydverspreid. “Ook die uiters lang taklengte en ongelooflike hoë aantal stekelmutasies dui daarop dat dit rede tot werklike kommer is,” het Peacock gesê.

Hy het beklemtoon die getalle is “super laag” in Afrika en het die hoop uitgespreek dat die variant een van ’n “ongewone groep” is en nie so oordraagbaar is soos wat gevrees word nie.

Prof. Francois Balloux, van die UCL Genetics Institute, het op sy beurt die variant se mutasies as ’n “ongewone konstellasie” beskryf wat skynbaar in ’n “enkele oopbars versamel het”.

Volgens hom dui dit daarop dit kon tydens ’n chroniese infeksie in ‘n persoon met ’n verswakte immuniteitstelsel ontwikkel het, moontlik in ’n onbehandelde MIV-vigspasiënt.

Balloux sê hy verwag beslis dit sal swak herken word deur neutraliserende teenliggaampies relatief tot die Alpha- of Delta-variant. Hy erken dit is moeilik om in hierdie stadium te voorspel hoe oordraagbaar dit kan wees.

“Dit kan in ander dele van Afrika teenwoordig wees. Vir nou moet dit noukeurig gemonitor en ontleed word.”

Prof. Burtram Fielding, ’n molekulêre bioloog wat sedert 2003 hoofsaaklik op coronavirusse werk, wou nie by navraag oor die nuwe variant kommentaar lewer nie.

“In hierdie stadium is ek bevrees ek is net nog ’n teenstrydige stem in die kakofonie van somtyds teenstrydige geraas wat uit die Covid-bespreking kom. Ek het probeer om insig te gee in wat die wetenskap sê, ongefilter deur politieke of ideologiese vooroordeel.

“Ek het ook pynlik geleer ‘alles is politiek’ en dit is moeilik om selfs die vermoede van vooroordeel te vermy. Vir nou is dit ’n bespreking waarvan ek verkies om te onttrek.”

Beamptes van die Wêreldgesondheidsorganisasie (WHO) het gister oor die variant vergader. Bronne: Netwerk24, Bloomberg, Independent – [email protected]

Soortgelyk

 

Een sterfte, sewe nuwe gevalle

9 ure gelede | Gesondheid

Die Covid-sterftes styg met een - die tuissterfte van 'n 32-jarige man in die Rundu-distrik - tot 3 572. Gister is sewe nuwe gevalle aangemeld,...

Trusted Travel System tot 15 Januarie uitgestel

10 ure gelede | Toerisme

Die Trusted Travel System vir die koördinering en verifiëring van Covid-19-uitslae in lande deel van die Afrika Unie (AU) geld eers van 15 Januarie aanstaande...

Man in Bwabwata Nasionale Park deur olifant doodgetrap

11 ure gelede | Omgewing

Matala Mafuta (71) van die Omega 3-nedersetting is Woensdag omstreeks 09:30 deur 'n olifant in die Bwabwata Nasionale Park doodgetrap. Volgens 'n voorlopige ondersoek deur...

August 26 skenk PPE's aan gesondheidsministerie

12 ure gelede | Gesondheid

August 26 het persoonlike beskermende toerusting (PPE) ter waarde van N$2,9 miljoen aan die ministerie van gesondheid en maatskaplike dienste geskenk. Die toerusting sluit mediese...

Stop digitale geweld teen vroue

14 ure gelede | Misdaad

Jaarliks val die fokus op 25 November tydens die Internasionale Dag om Geweld teen Vroue en Meisies te Stop op die stygende aantal gevalle van...

Covid-19: Nuwe virus-variant in Suid-Afrika, Botswana

1 dag gelede | Gesondheid

Wetenskaplikes het ‘n nuwe variant van SARS-CoV-2, die virus wat Covid-19 veroorsaak, geïdentifiseer.Dit is ‘n mutasie van die B.1.1-variant en staan as B.1.1.529 bekend, berig...

NSFAF terug op tapyt

1 dag gelede | Ministeries

Augetto GraigDie Finansiële Hulpfonds vir Namibiese Studente (NSFAF) moet vanoggend opnuut voor die parlementêre staande komitee oor openbare rekeninge verskyn om antwoorde te verskaf hoe...

Weesrenosterkalf oorleef ’n maand in bos

1 dag gelede | Omgewing

Tanja BauseMwezi, die klein swartrenosterkalf wie se ma deur stropers doodgeskiet is, kan al self staan. Die kalfie is sowat ’n week gelede om twaalfuur...

Weer vir 25 November 2021

1 dag gelede | Weer

WEERWAAK: Sterk westewinde kan vandag en môre oor die binneland waai.BINNELAND: Gedeeltelik bewolk en warm tot baie warm in die suide en ooste met enkele...