Noordweste se aardbewings 'n raaisel
Soveel as vyf aardskuddings op een dag is al naby die Anker-nedersetting gemeet.
Elvira Hattingh
Sedert Maart vanjaar het vyf beduidende aardbewings in die Anker-gebied in die noordweste van die land voorgekom - almal het tussen 4,1 en 4,6 op die Richterskaal gemeet.
Tussentydse navorsing in die gebied het verder aan die lig gebring dat minstens vyf skuddings daagliks voorkom, maar wat meestal minder as 1 op die Richterskaal meet en dus net deur seismograwe waargeneem kan word.
Volgens die ministerie van myne en energie is aardbewings 'n seldsame gebeurtenis in Namibië, maar daar het die afgelope jaar “'n merkwaardige aantal” seismiese gebeurtenisse spesifiek in hierdie gebied voorgekom.
Die nuus volg nadat die ministerie bekend gemaak het dat nog 'n aardbewing, wat 3,7 op die Richterskaal gemeet het, omstreeks 04:51 op 14 November op dieselfde plek voorgekom het.
Die jongste aardbewing se episentrum was 45 km noordwes van Palmwag, of 100 km noordwes van Kamanjab, geleë en dit het vir sowat tien sekondes geduur. Dit is deur drie plaaslike seismiese stasies van die Namibiese Seismologiese Netwerk waargeneem – in Windhoek, asook op Tsumeb en Rundu.
STUDIE FOKUS OP ANKER
Die Geologiese Opname se geowetenskaplike, me. Mako Sitali, het aan Republikein gesê hulle is nog besig met 'n analise van data om vas te stel waarom daar skielik so gereeld seismiese aktiwiteite in die Anker-gebied is, maar voeg by dat verskeie breuke in die aardkors in die gebied voorkom.
Die data wat sy tans analiseer, is ingesamel vanaf 20 Junie tot 24 September toe hulle 'n samevattende navorsingsprojek daar van stapel gestuur het. Dit het behels dat tien tydelike seismiese stasies ontplooi is om kleiner aardbewings in die gebied waar te neem en sones van seismiese aktiwiteit te identifiseer.
resultate
Die navorsingsresultate word tans in 'n finale verslag saamgevat, waarna dit aan relevante belangegroepe gekommunikeer sal word.
Sitali sê die vyf grootste aardbewings in die gebied wat deur die Nasionale Seismologiese Netwerk waargeneem is, is almal min of meer op dieselfde plek en het hul oorsprong 15 km onder die aardkors. Vier van die vyf sterkste skuddings het in Meimaand voorgekom.
“Namibië het min aardskuddings en gewoonlik is seismiese aktiwiteite nie baie intens van aard nie. Hierdie skuddings moet ons egter daaraan herinner dat die aardkors dinamies is, en voortdurend verander en ontwikkel. Skuddings en aardbewings is baie natuurlik, maar tog onvoorspelbaar,” het die ministerie se adjunk permanente sekretaris, me. Gloria Simubali, verlede week in 'n persverklaring gesê.
Sedert Maart vanjaar het vyf beduidende aardbewings in die Anker-gebied in die noordweste van die land voorgekom - almal het tussen 4,1 en 4,6 op die Richterskaal gemeet.
Tussentydse navorsing in die gebied het verder aan die lig gebring dat minstens vyf skuddings daagliks voorkom, maar wat meestal minder as 1 op die Richterskaal meet en dus net deur seismograwe waargeneem kan word.
Volgens die ministerie van myne en energie is aardbewings 'n seldsame gebeurtenis in Namibië, maar daar het die afgelope jaar “'n merkwaardige aantal” seismiese gebeurtenisse spesifiek in hierdie gebied voorgekom.
Die nuus volg nadat die ministerie bekend gemaak het dat nog 'n aardbewing, wat 3,7 op die Richterskaal gemeet het, omstreeks 04:51 op 14 November op dieselfde plek voorgekom het.
Die jongste aardbewing se episentrum was 45 km noordwes van Palmwag, of 100 km noordwes van Kamanjab, geleë en dit het vir sowat tien sekondes geduur. Dit is deur drie plaaslike seismiese stasies van die Namibiese Seismologiese Netwerk waargeneem – in Windhoek, asook op Tsumeb en Rundu.
STUDIE FOKUS OP ANKER
Die Geologiese Opname se geowetenskaplike, me. Mako Sitali, het aan Republikein gesê hulle is nog besig met 'n analise van data om vas te stel waarom daar skielik so gereeld seismiese aktiwiteite in die Anker-gebied is, maar voeg by dat verskeie breuke in die aardkors in die gebied voorkom.
Die data wat sy tans analiseer, is ingesamel vanaf 20 Junie tot 24 September toe hulle 'n samevattende navorsingsprojek daar van stapel gestuur het. Dit het behels dat tien tydelike seismiese stasies ontplooi is om kleiner aardbewings in die gebied waar te neem en sones van seismiese aktiwiteit te identifiseer.
resultate
Die navorsingsresultate word tans in 'n finale verslag saamgevat, waarna dit aan relevante belangegroepe gekommunikeer sal word.
Sitali sê die vyf grootste aardbewings in die gebied wat deur die Nasionale Seismologiese Netwerk waargeneem is, is almal min of meer op dieselfde plek en het hul oorsprong 15 km onder die aardkors. Vier van die vyf sterkste skuddings het in Meimaand voorgekom.
“Namibië het min aardskuddings en gewoonlik is seismiese aktiwiteite nie baie intens van aard nie. Hierdie skuddings moet ons egter daaraan herinner dat die aardkors dinamies is, en voortdurend verander en ontwikkel. Skuddings en aardbewings is baie natuurlik, maar tog onvoorspelbaar,” het die ministerie se adjunk permanente sekretaris, me. Gloria Simubali, verlede week in 'n persverklaring gesê.
Kommentaar
Republikein
Geen kommentaar is op hierdie artikel gelaat nie