Nokia 9: Uniek, maar haal nie heeltemal die paal

Spreek tot nostalgie

18 July 2019 | Tegnologie
Petrus Malherbe – Nuuskierige agies se monde het behoorlik oopgehang toe die eerste steelfoto’s van Nokia se nuutste vlagskipfoon maande gelede op die internet beland het.

In plaas van een, twee of selfs drie kameras, het die Nokia 9 PureView výf kameralense wat almal gelyktydig ’n foto neem wat uiteindelik danksy gevorderde sagteware saamgevoeg word.

Op sigself klink dit dalk na ’n wonderlike idee: jy kry ’n foto met vyf keer die gehalte van ’n selfoonkamera met net een lens.

Tog is meer nie noodwendig beter in die geval van die PureView nie. Die saamgestelde foto is eintlik net in 12 MP en die PureView neem nie besonder goeie kiekies in donker toestande nie.

Portretfoto’s van vriende of voorwerpe word wel vasgevang met ’n verbasende hoeveelheid diepte, maar dit verg ’n mate van kennis met die vertellings van die foon om die beste moontlike foto te neem.

Trouens, die PureView se kamera is seker so na aan ’n “gewone” kamera se funksionaliteit as wat moontlik is met ’n selfoon.

Die foon se sagteware gee jou verbasend baie beheer oor watter verstellings jy kan maak om ’n foto na wense te laat vertoon. Maar al dié moeite is ligsinnig as jy net vinnig jou foon wil gryp om sussie se eerste treë af te neem, of vir Wagter wat op die strand hardloop.

Die PureView verg geduld, nie net met die verstellings vir die perfekte foto nie, maar ook om dit uiteindelik te sien.

Omdat die foon vyf afsonderlike foto’s saamsmelt, neem dit tot tien sekondes of meer om te verwerk voordat jy die vrug van jou dade kan aanskou.

Dit is ’n ongelooflik frustrerende ervaring. As jy byvoorbeeld ’n groep vriende afneem, sal jy eers tien sekondes moet wag voordat jy kan sien of almal se oë oop was!

Die PureView het ook nie ’n ingeboude galery-app nie. Alle foto’s word eerder regstreeks na Google Photos gestuur waar dit op die toestel sowel as in die wolk geberg word.

Nokia het intussen ’n bywerking tot die kamera se sagteware uitgereik wat hulle sê die tyd wat dit neem om foto’s te verwerk, aansienlik verkort.

Ek kon geen verandering in dié tyd bespeur nadat ek die toestel wat ek getoets het, se sagteware bygewerk het nie.

Battery en bedryfstelsel

Die PureView maak gebruik van Android One, ’n spesiale weergawe van die Android-bedryfstelsel wat beteken dit word voorsien van bykomende sekuriteit en kom ook met heelwat minder onnodige apps wat vooraf op ander fone geïnstalleer word.

Nokia belowe ook dat die toestel al die nodige bywerkings, insluitende nuwe weergawes van Android vir minstens die volgende drie jaar, gaan ontvang.

Afgesien van die stadige kamera werk die PureView flink. Die foon is ’n lekker grootte en pas steeds gemaklik in die hand.

Die skerm is sensitief vir aanraking, maar die ingeboude vingerafdrukskandeerder laat veel te wense oor. Die vingerafdrukker is in die skerm ingebou en vereis dat jy jou duim hárd daarop moet druk voordat dit enigsins jou vingerafdruk registreer.

Gelukkig werk die toestel se gesigsherkenningstegnologie heelwat beter.

En die PureView se battery van 3 320 mAh verdien respek.

Ingeboude sagteware help dat jy die foon se batterylewe met etlike ure, selfs dae kan verleng.

Ongelukkig is die gevolg daarvan ook dat die PureView vreeslik lank neem om te herlaai. As dit heeltemal pap is, neem dit ure voor jy weer 100%-batterykrag het.

Gevolgtrekking

Kortom is dit moeilik om die PureView aan te beveel in stede van ander, beter produkte wat tans beskikbaar is.

Om weer ’n Nokia te besit, spreek dalk tot ’n nostalgiese gevoel van vervloë dae toe elke Jan Rap en sy maat ’n Nokia begeer het.

Maar dié maatskappy, wie se fone deesdae deur HMD Global onder die Nokia-handelsnaam vervaardig word, sal met iets meer noemenswaardig vorendag moet kom om ’n nuwe generasie te oortuig ’n Nokia is steeds ’n foon wat almal moet hê.

Die Nokia 9 PureView is reeds beskikbaar by al die diensverskaffers op kontrak sowel as vir kontant. Vergeleke met sy mededingers is die PureView ook teen sowat R15 000 bietjie goedkoper as byvoorbeeld die jongste iPhone of vlagskip Huawei-foon. – Netwerk24

Soortgelyk

 

KOLLIG Voorblad

1 dag gelede | Byvoegsels

Swakop hou Makietie bl. 4

ECN gaan Itula se aansoek teenstaan

1 dag gelede | Politiek

Denver Kisting – Vanweë die beweerde negatiewe uitwerking van elektroniese stemtoestelle (EVM’s) in die afgelope presidensiële verkiesing moet die proses tersyde gestel word.Dr. Panduleni Itula,...

Ekonomie bloei lánkal

1 dag gelede | Plaaslik

Jo-Maré Duddy – Ekonomiese groei het reeds in 2015 skerp begin tuimel sonder dat dit deur amptelike syfers weerspieël is, toon nuwe data wat gister...

NOU AAN DIE GANG

1 dag gelede | Byvoegsels

» Die Swakopmund Wetenskaplike Vereniging bied tans ‘n Kersfees-skattejag by die Swakopmund Museum aan. Dit bestaan uit twee afdelings, een vir kinders en een vir...

Geskorste raadslede van Rehoboth herkies

1 dag gelede | Regering

Denver Kisting op Rehoboth – Dieselfde span raadslede wat verlede jaar deur dr. Peya Mushelenga, die minister van stedelike en landelike ontwikkeling, in die pad...

Weer vir 13 Desember 2019

1 dag gelede | Weer

BINNELAND: Mooi weer en baie tot bloedig warm in die Suide. Elders sal dit gedeeltelik bewolk en baie tot bloedig warm wees. Winderige weer sal...

STEMFEITE: NAM & SA 2019

1 dag gelede | Politiek

In Namibië het Swapo persentasiegewys meer steun ingeboet as die ANC in Suid-Afrika.

NamibRe: Versekeraars moet 12,5% sedeer

1 dag gelede | Howe

Elvira Hattingh Plaaslike versekeringsmaatskappye móét voorts vir herverseke­ring by NamibRe opdok - tot tyd en wyl daar in 'n hangende hofsaak oor die wettigheid van...

CoW baklei teen beslaglegging

1 dag gelede | Regering

Denver Kisting – Die Windhoekse munisipaliteit (CoW) baklei tans verbete teen ’n beweerde beslagleggingsbevel wat poog om van hul vaste bates te konfiskeer.Veertien superintendente verbonde...