NLU: Só moet grondhervorming geskied
Die landbou-unie vir kommersiële boere sê grondhervorming moet produktiwiteit verhoog.
Die Namibië Landbou-unie (NLU) het sy stem laat hoor by die streeksvergaderings ter voorbereiding van die tweede nasionale grondkonferensie in Oktober.
Verteenwoordigers van die NLU het die streeksvergaderings bygewoon in alle streke waar grondeienaars oor titelaktes beskik, naamlik die ||Kharas-, Hardap-, Khomas-, Omaheke-, Erongo-, Kunene- en Otjozondjupastreek en insette gelewer.
Dié landbouliggaam vir kommersiële boere sê die uiteindelike doel van grondhervorming in Namibië moet wees om werksgeleenthede te skep en dat boerdery op ’n volhoubare basis finansieël suksesvol moet wees en produktiwiteit verhoog, sê die NLU in sy jongste nuusbrief.
’n Program behoort ontwikkel te word waar hervestigingbegunstigdes eienaarskap van die grond moet kry sodat hulle dit as kollateraal kan gebruik om verder in die grond te belê. Mentorskapprogramme en kapasiteitsbou is belangrik om die finansiële sukses van hierdie nuwe boere volhoubaar te maak.
Die ministerie van grondhervorming behoort syfers oor hoeveel grond sedert 2008 aan hulle aangebied is, hoeveel hektaar grond gekoop is deur die ministerie en hoeveel hektaar grond van afstand gedoen is om in die ope mark te verkoop, bekend te maak, sê die NLU.
“Hierdie inligting behoort openbaar bekend gemaak te word om te kan bepaal of die beginsel van gewillige koper, gewillige verkoper suksesvol was of nie.”
Die verbetering van lewendehawebemarking in die noordelike kommunale gebied is van kritieke belang vir ekonomiese groei. Die NLU steun ’n gestruktureerde implementeringsprogram om hierdie doel te bereik. Dit moet onder leiding van die direktoraat veeartsenydienste geskied.
Die NLU ondersteun verder die onteieningsproses met billike vergoeding binne die wetlike raamwerk soos in die Grondwet en verskeie ander wetgewing uiteengesit word.
Daar sal ook na oplossings gesoek moet word om grond in stedelike gebiede te bekom sodat elke Namibiër ’n stuk grond het wat hy sy tuiste kan noem. Oordrag van eienaarskap aan individue in stedelike gebiede sal bydra tot rykdom en selftrots.
Die NLU steun pres. Hage Geingob se visie soos uiteengesit in die Harambee-welvaartsplan en ook sy versoek dat alle witmense in Namibië ’n oplossing vir die grondprobleem behoort te soek.
“Wit grondeienaars is egter nie in staat op hulle eie oplossings vir hierdie nasionale saak te vind nie en sal ons dus verder met die president wil vergader om sy visie beter te verstaan,” sê die NLU.
Verteenwoordigers van die NLU het die streeksvergaderings bygewoon in alle streke waar grondeienaars oor titelaktes beskik, naamlik die ||Kharas-, Hardap-, Khomas-, Omaheke-, Erongo-, Kunene- en Otjozondjupastreek en insette gelewer.
Dié landbouliggaam vir kommersiële boere sê die uiteindelike doel van grondhervorming in Namibië moet wees om werksgeleenthede te skep en dat boerdery op ’n volhoubare basis finansieël suksesvol moet wees en produktiwiteit verhoog, sê die NLU in sy jongste nuusbrief.
’n Program behoort ontwikkel te word waar hervestigingbegunstigdes eienaarskap van die grond moet kry sodat hulle dit as kollateraal kan gebruik om verder in die grond te belê. Mentorskapprogramme en kapasiteitsbou is belangrik om die finansiële sukses van hierdie nuwe boere volhoubaar te maak.
Die ministerie van grondhervorming behoort syfers oor hoeveel grond sedert 2008 aan hulle aangebied is, hoeveel hektaar grond gekoop is deur die ministerie en hoeveel hektaar grond van afstand gedoen is om in die ope mark te verkoop, bekend te maak, sê die NLU.
“Hierdie inligting behoort openbaar bekend gemaak te word om te kan bepaal of die beginsel van gewillige koper, gewillige verkoper suksesvol was of nie.”
Die verbetering van lewendehawebemarking in die noordelike kommunale gebied is van kritieke belang vir ekonomiese groei. Die NLU steun ’n gestruktureerde implementeringsprogram om hierdie doel te bereik. Dit moet onder leiding van die direktoraat veeartsenydienste geskied.
Die NLU ondersteun verder die onteieningsproses met billike vergoeding binne die wetlike raamwerk soos in die Grondwet en verskeie ander wetgewing uiteengesit word.
Daar sal ook na oplossings gesoek moet word om grond in stedelike gebiede te bekom sodat elke Namibiër ’n stuk grond het wat hy sy tuiste kan noem. Oordrag van eienaarskap aan individue in stedelike gebiede sal bydra tot rykdom en selftrots.
Die NLU steun pres. Hage Geingob se visie soos uiteengesit in die Harambee-welvaartsplan en ook sy versoek dat alle witmense in Namibië ’n oplossing vir die grondprobleem behoort te soek.
“Wit grondeienaars is egter nie in staat op hulle eie oplossings vir hierdie nasionale saak te vind nie en sal ons dus verder met die president wil vergader om sy visie beter te verstaan,” sê die NLU.
Kommentaar
Republikein
Geen kommentaar is op hierdie artikel gelaat nie