Ngatjizeko tree af

Augettto Graig - Die nuwe perssekretaris in die kantoor van die president, dr. Alfredo Tjiurimo Hengari, het so pas (Woensdagoggend) aan Republikein bevestig dat minister Immanuel Ngatjizeko wel afgetree het, soos vroeër vanoggend deur plaaslike media berig is. Hengari sê die president se kantoor sal later vandag ? verklaring hieroor uit reik.
Ngatjizeko is vroeër die maand verskuif na die pos van minister van presidensiële aangeleenthede, waar hy vir mnr. Frans Kapofi vervang het. Voorheen was Ngatjizeko die minister van nywerheidsontwikkeling, handel en SME-ontwikkeling.
Hy kon nog nievir kommentaar bereik word nie, maar sy vorige adjunk by die nywerheidsontwikkelingsministerie, mnr. Pieter van der Walt, het wel vanoggend bevestig dat Ngatjizeko se gesondheid onlangs nie te goed was nie. “Ek weet my minister is bietjie siekerig,” het Van der Walt gesê alhoewel hy toe ook nog nie die aftrede self kon bevestig nie.
Mnr. Tjekero Tweya is nou aan die stuur by nywerheidsontwikkeling en dit word verwag dat die president se kantoor later duidelikheid sal gee oor wie hom as minister van presidensiële aangeleenthede sal vervang.