Nóg 'n baba sterf in ongeluk

Francoise Steynberg - Namibië het 'n swart naweek op die paaie gehad met altesaam 13 mense wat in vier afsonderlike ongelukke gesterf het.

Volgens die Namibiese polisie se misdaad verslag het nóg 'n baba die naweek in 'n ongeluk gesterf.

Die ongeluk het Saterdag omstreeks 07:00 tussen Gobabis en Windhoek gebeur.

"Dit word beweer dat 'n sedanvoertuig met 'n 27-jarige bestuurder, vier volwassenes en twee babas se linkeragterband gebars het toe hulle vanaf Windhoek na Gobabis onderweg was. Die bestuurder het glo beheer oor die voertuig verloor waarna dit omgeslaan het," sê die polisie.

Een babameisie het op die toneel gesterf terwyl die ander insittendes met beserings in die Gobabis-staatshospitaal behandel is.

Die oorledene is die eenjarige Ester Angula.

Die polisieondersoek duur voort.