Namvet gee opposisie ultimatum

'Ons word soos diere behandel'

17 August 2018 | Politiek
Catherine Sasman - Twee van die nege opposisiepartye in die parlement - die Popular Democratic Movement (PDM) en die All People's Party (APP) - het 'n versoekskrif van die Namibië Oorlogs­veteranetrust (Namvet) ontvang waarin van hulle versoek word om die voormalige soldate se versoek te steun om deur die Namibiese regering erken te word.

Indien nie, het die voomalige soldate gewaarsku, sal hulle en hul familielede dié partye by volgende jaar se verkiesing die rug toekeer.

“Opposisiepartye het toegelaat dat ons verneder word, dat daar teen ons gediskrimineer word en dat ons in ekonomiese apartheid leef wat deur die regerende Swapo-­party op ons afgedwing is,” lui Namvet se versoekskrif, wat Woensdag aan dié twee partye oorhandig is.

“Ons vereis van die opposisiepartye om voor 1 Desember voorspraak vir hierdie veranderinge te maak. Indien hulle nie daarin slaag nie, sal ons van hulle afstand doen en hulle nie meer ondersteun nie.”

Namvet se aanvanklike plan was om 'n optog van die Rooivlag-kommando­saal in Katutura na die Nasionale Vergadering (NV) te hou, maar die oudsoldate het in plaas hiervan na Wernhil Park-winkelsentrum in die middestad beweeg, waar hulle die versoekskrif aan die twee politieke partye oorhandig het.

VETERANEWET

Namvet meen die veteranewet maak net voorsiening vir en bevoordeel net oudlede van Plan, terwyl die voormalige soldate van SWATF en Koevoet, wat grootliks onder dwang in die voor-onafhanklikheidsoorlog moes veg, nie hierby ingesluit word nie.

Die Namvet-soldate sê hul uitsluiting is doelbewus gedoen en ignoreer grondwetlike bepalings wat ­diskriminerende wette verbied en beklem­toon landswette is op almal van toepassing.

Hulle sê hul opname in die nuwe Namibiese weermag (NDF) is ook doelbewus gedoen en dat die NDF hoofsaaklik uit voormalige Plan-lede bestaan wat slegs Swapo steun.

“Die integrasie van voormalige Plan- en SWATF/Koevoet-lede kon 'n belangrike rol in die bevordering van stabiliteit in die land gespeel het,” lui die versoekskrif.

Namvet het in sy versoekskrif voorgestel dat die bepalings van die veteranewet vir alle ­militêre veterane voorsiening maak, asook vir vergoeding vir verliese en vernedering wat deur die voormalige SWATF- en Koevoet-lede en hul ­families gely is.

Namvet sê ook sulke wetgewing moet voorsiening maak vir berading vir militêre veterane wat “uiterste ontheming” van 'n normale lewensbestaan ervaar het, en hulp bied met deeglike herintegra­sie in die samelewing.

Die voormalige soldate versoek ook voldoende gesondheids- en psigiatriese sorg, asook mediese fonds-ondersteuning vir tuisversorging van dié wat in die oorlog beseer is.

Mnr. Marius Goraseb, wat die versoekskrif namens die APP se waarnemende sekretaris-generaal, mnr. Vinsent Kanyetu, ontvang het, het gesê die party het sy steun vir die erkenning van die voormalige SWATF/Koevoet-lede reeds in die party se verkiesingsmanifes van 2014 vervat.

“Dit is onregverdig dat hierdie ­voormalige soldate by die land se hoofstroomekonomie uitgesluit word. Die stigterspresident, mnr. Sam Nujoma, het in 1990 op nasionale versoening aanspraak gemaak. In 'n hedendaagse Namibië kan ons nie in 'n samelewing leef waar mense weens hul verlede gebrandmerk word nie,” het Goraseb gesê.

OPPOSISIEPARTYE REAGEER

Hy het gesê die APP het in 2011 en 2012 met leiers van Namvet vergader waar hulle hul steun aan Namvet gegee het, maar bygevoeg dit is moeilik om voorspraak vir hul regte in die parlement te maak weens Swapo se tweederde meerderheid.

“Voorspraak in die parlement is ondoeltreffend – selfs as al die opposisiepartye 'n kwessie ondersteun. Weens die verwronge verteenwoordiging in die parlement vorder dinge nooit nie,” het Goraseb gesê.

Die PDM se sekretaris-generaal, mnr. Manuel Ngaringombe, het gesê sy party is deur ander nasionale kwessies oorweldig, maar het onderneem om Namvet se eise te bespreek.

Namvet se woordvoerder, mnr. Jabulani Ndeunyema, het beweer die Swapo-regering is “besig met iets wat ons nog nie vantevore gesien het nie”, met verwysing na die versuim om die oudsoldate te erken. Ndeun­yema het gesê: “Ons bly vreedsaam, maar daar sal 'n dag kom wat ons gaan sê genoeg is genoeg. Ons is vreedsaam; ons wil steeds by die regering betrokke wees, maar wanneer die tyd kom, sal ons Swapo sonder vrees konfronteer.

“'n Ou leeu kan ook byt. Hulle moenie dit vergeet nie. Hulle moenie Namibië tot stilstand bring omdat hulle ons soos diere behandel nie.”

Soortgelyk

 

Honderde miljoene vir veevoer nodig

18 ure gelede | Landbou

Ronelle Rademeyer - Die 2019 droogte is ‘n omvangryke ramp en ten minste N$170 miljoen is nodig om net 5 persent van die nasionale veekudde...

Min of geen handboeke vir nuwe leerplan

18 ure gelede | Onderwys

Henriette Lamprecht – Óf drupsgewys óf glad nie. Dit is volgens verskeie skole oraloor die land die huidige stand van handboeke vir die nuwe leerplan...

Regional council must account for vandalised buildings

18 ure gelede | Infrastruktuur

AUSSENKEHR – The //Kharas Regional Council must account for government buildings that are vandalised and left to become white elephants, the minister of urban and...

Swapo beslis dorpsraadslede se lot

18 ure gelede | Politiek

Dorpsraadslede van Okahandja en Rundu moes Maandag ure lank by Swapo se hoofkantoor in Windhoek wag om te hoor wat hul lot is. Verskeie nasionale...

Groeiende stad druk rioolstelsel

18 ure gelede | Infrastruktuur

Elvira Hattingh - Die Windhoekse munisipaliteit erken sekere rioolpype in die stad moet opgradeer word om die groeiende getal stadsbewoners te akkommodeer. Terselfdertyd beloof hulle...

Weer vir 19 Februarie 2019

18 ure gelede | Weer

WEERWAAK: Bloedige hittetoestande word vir die res van die week in die binneland verwag.BINNELAND: Mooiweer en bloedig warm in die ||Kharasstreek. Elders sal dit gedeeltelik...

Gammams staan steeds stil

18 ure gelede | Regering

Elvira Hattingh – Windhoek se munisipaliteit (CoW) sê hul Gammams-watersuiweringsaanleg staan steeds stil nadat swaarbrandstofolie meer as twee weke gelede in die stad se rioolstelsel...

‘Vroue is sterk’

18 ure gelede | Maatskaplik

Mariselle Stofberg – TrueKrav Namibia het Donderdag, in samewerking met die Namibiese Vrouevereniging en Kosmos, ’n praatjie oor geslagsgeweld in die hoofstad aangebied.TrueKrav bied...

Namcor wil vry van sekere wette wees

18 ure gelede | Energie

Elvira Hattingh - Namibië se Nasionale Petroleumkorporasie (Namcor) het ‘n aansoek by die Namibiese Kompetisie-kommissie ingedien om vir die volgende 10 jaar vrygestel te wees...