Namibië sê #MeToo

Sowat 200 vroue deel ervarings

07 May 2019 | Misdaad
Tanja Bause - Die #MeToo Namibia-veldtog is gister in Windhoek van stapel gestuur.

Die veldtog beoog om ondersteuning aan oorlewendes van geslags- en seksuele geweld te bied deur toegang tot psigososiale en regshulp.

Hulle bied ook toegang tot inligting oor hoe om die Namibiese polisie te nader om oortredings aan te meld.

#MeToo Namibia is ’n vennootskap tussen Regain Trust, Lifeline/Childline, the Namibian Women Lawyers Association, Nixon Marcus Public Law Firm, Bel Esprit, Slut Shame Walk, UNFPA, die kantoor van die eerste dame, die Namibiese koalisie teen geslagsgeweld, Sister Namibia en die Regshulpsentrum (LAC).

Volgens me. Arlana Shikongo van die Slut Shame Walk, wat ’n maand gelede vir die eerste keer in Namibië plaasgevind het, het talle vroue en mans die afgelope paar dae na vore gekom om hul ervarings met seksuele geweld, seksuele teistering en verkragting te deel.

“Nie net het ons by die ervarings betrokke geraak nie, maar ons het ook groot meegevoel gesien vir hoe moeilik dit is om die waarheid te praat. Aan die een kant het dit duidelik geword baie oortreders is herhaalde oortreders wat by die oorlewendes se stilte baat. Aan die ander kant het ons gesien hoe maklik dit is om dié wat wel praat, te dreig en te intimideer,” het sy gesê.

“Namibië het ’n kultuur van vrees en intimidasie waar vroue byna altyd stemloos is wat hul ervarings met seksuele geweld betref. Dit is dieselfde Namibië waar een uit drie vroue seksueel aangerand word en die saak nie aanmeld nie omdat hulle skaam en bang is hulle word geblameer,” het Shikongo gesê.

“Ons doel is om oorlewendes aan te moedig om te praat en hul ervarings te deel in die wete dat hulle ondersteun en beskerm sal word, terwyl ons daaraan werk om geregtigheid deur die wettige kanale te laat geskied.

“Ons weet dié platform kan misbruik word om wraak te neem, maar ons is vol vertroue sulke valse bewerings sal deur ’n polisieondersoek geïdentifiseer word.”

Volgens me. Alna Dall van #MeToo Namibia word gevra hoekom die veldtog nou eers van stapel gestuur word.

“Ons is in ’n nuwe era van bemagtiging. Sosiale media en toegang daartoe bied oorlewendes veiligheid in getalle. Ons kan mekaar aanmoedig om die skande opsy te sit, die stigma van seksuele geweld te ignoreer en onsself daarteen uit te spreek.

“Vroue het onoorwinbare moed gevind en van hulle is dapper genoeg om hul oortreders te noem. Ons volg in die vroue van oraloor die wêreld se voetspore en sê ‘dis genoeg’,” het Dall gesê.

Volgens dr. Veronika Theron, tegniese direkteur van die kantoor van die eerste dame, het sowat 200 vroue verlede week na vore gekom om hul ervarings van seksuele geweld, seksuele teistering en verkragting te deel. Sowat 40 oortreders is geïdentifiseer.

“Baie van dié gevalle is baie ou sake, maar ons sal elke saak aanhoor en deur die wettige kanale ondersoek. Elke saak sal deeglik ondersoek word,” het sy gesê.

“Valse aantygings is net sowat 1% van die sake wat tot dusver aangemeld is. As iemand vals beskuldig is, is dit sy of haar reg om polisie toe te gaan en ’n saak van laster en naamskending aanhangig te maak. Dit is jou reg om regshulp te kry,” het Theron gesê.

Volgens mr. Salome Kambala, ’n lid van die gemeenskap, het die Kavango-Wes- en Kavango-Oosstreek die meeste gevalle van tienerswangerskappe en het sy ondersoek gaan instel.

“Ek is in die streek gebore en kon dit nie verstaan nie. Ek het agtergekom armoede speel ’n rol, maar manlike oppergesag speel ’n selfs groter rol. Lang afstande wat die meisies skool toe stap, maak hulle kwesbaar vir verkragting, asook kulturele en tradisionele idees dat daar nie oor seks gepraat mag word nie. Ek hoop die veldtog sal ook na ander streke uitgebrei word,” het sy gesê.

“Ons werk met mans en vroue van oraloor die land. Ons het selfs hulp ontvang vir vroulike studente wat in ander lande studeer. Ons werk nou saam met hulle sodat hulle ook hul saak by die polisie kan aanmeld,” het Theron gesê.

Volgens me. Ruth Herunga, van die Namibian Women Lawyers Association, is baie van die sake wat tot dusver aangemeld is baie ou sake.

“Dit maak dit baie moeilik omdat ons op omstandigheidsgetuienis moet staatmaak. Maar, soos ons vir die oorlewendes sê, dit gaan nie oor wen of verloor in die hofsaal nie. Dit gaan daaroor dat ons moet opstaan en begin praat en dat die waarheid uitkom.

“Die boodskap wat ons moet uitstuur, is dat verkragting, seksuele geweld en teistering ’n misdaad is. Ons moet die kultuur van stilbly en geheimhouding begin veroordeel en verander,” het Herunga gesê.

Soortgelyk

 

'n Seder val in Swapo

9 ure gelede | Mense

Ronelle Rademeyer - Huldeblyke stroom sedert vroeg gisteroggend in die sosiale media in nadat dit bekend geword het Namibië se voormalige vise­president (2015 – 2018)...

Duitsland gee ou kruis terug

9 ure gelede | Plaaslik

Ronelle Rademeyer - Een van die belangrikste artefakte uit die glorieryke ontdekkersera van die Portugese seevaarders sal in Augustus deur die Duitse museum vir geskiedenis...

Weer vir 20 Mei 2019

9 ure gelede | Weer

WEERWAAK: Koue en winderige toestande word in die Suide verwag. Die nodige voor­sorgmaatreëls moet getref word. BINNELAND: Gedeeltelik bewolk en warm tot baie warm in...

Namport dank 86 werkers af

9 ure gelede | Plaaslik

Die Namibiese haweowerheid, Namport, het Vrydag aangekondig 86 werkers by die vraghouerterminaal by die Walvisbaaise hawe wat in Augustus aan 'n onwettige staking deelgeneem het,...

Speaker dring aan jeug moet by kiesproses betrek word

9 ure gelede | Politiek

Denver Kisting - Die speaker van die Nasio­nale Vergadering (NV), prof. Peter Katjavivi, sê die jeug moet by die verkiesings­proses betrek word.Die uitvoerende hoof van...

'Sam Nujoma is 'n ikoon'

9 ure gelede | Regering

Stigterspresident Sam Nujoma se 90ste verjaardagvieringe is Saterdag op Etunda in die Omusatistreek gevier en deur verskeie hooggeplaastes bygewoon. President Hage Geingob het Nujoma as...

Water: Hou rekord van elke druppel

9 ure gelede | Regering

Elvira Hattingh - Tot 90% van die water in Windhoek wat onnodig weens lekkasies of buitensporige waterverbruik verlore gaan, sou gespaar kon word indien huishoudings...

Semifinalis onttrek aan Mej. Namibië

9 ure gelede | Gebeure

Tanja Bause - 'n Semifinalis in die Mej. Namibië 2019-kompetisie, ­Michelle Pretorius, het aan die geleentheid onttrek. Volgens haar ma, me. Anke Pretorius, het Michelle...

'Millenniërs werk anders'

9 ure gelede | Ministeries

Augetto Graig - Werkloosheid onder die jeug is 'n nasionale krisis wat op alle vlakke, nie net deur die regering nie, dringend aangespreek moet word....