'n Nuwe handjie vir Janika
Sy is perfek soos sy is, maar die wete dat sy binnekort al vyf haar vingertjies sal kan gebruik, sorg vir diepe gemoedsrus.
Henriette Lamprecht
Dit is hul grootste wens dat hul dogtertjie haar lewe ten volle kan uitleef en as ouers weet hulle die volle gebruik van die eenjarige Janika Holloway se handjie sal 'n groot bydrae hiertoe lewer.
Klein Janika is op 17 Augustus verlede jaar met 'n gewebde, of Eaton-handjie, gebore. Drie van die vingertjies aan haar linkerhand het nie tydens ontwikkeling in die baarmoeder van mekaar geskei nie. Dit is nie deur enige skandering tydens haar ma, me. Viola Hock, se swangerskap raakgesien nie en is eers met Janika se geboorte opgemerk.
Syndactyly is die proses wat in die baarmoeder plaasvind waartydens een duim en vier aparte vingers ontwikkel.
In die baarmoeder is die nuwe hand spaanvormig en dan verdeel dit in aparte vingers.
Soms skei die vingers egter nie ver genoeg van mekaar nie en dit veroorsaak gewebde vingers.
Volgens Hock se dokter en verskeie ander spesialiste kon die gebrek nie verhoed word nie en is dit as 'n “natuurlike fratsongeluk” beskryf.
“Ek was geweldig hartseer en het dikwels skuldig gevoel omdat my dogtertjie so gebore is. Ek het totaal verantwoordelik gevoel vir die welstand van my prinsessie en wou haar die beste lewe moontlik gee,” vertel Hock.
Sy het begin soek na soortgelyke gevalle in Namibië en tydens haar navorsing het sy dr. Dirk van der Spuyt, 'n ortopediese en handchirurg, ontdek.
Tydens 'n afspraak in Februarie vanjaar het Van der Spuyt verduidelik Janika se handjie kan geopereer word, maar eers wanneer sy 'n jaar oud is.
“Hy was baie tevrede met Janika se hand omdat haar duimpie ten volle ontwikkel het. Volgens hom is die duim die belangrikste vinger van 'n hand en het dit 'n hooffunksie,” sê Hock.
Van der Spuyt het Janika se hand as “baie gesond” beskryf en die groen lig vir die operasie gegee.
“Dr. Van der Spuyt was passievol oor ons dogtertjie en het herhaaldelik gesê hy kan nie wag om die reis saam met ons en haar te begin nie. Hy is ook vol vertroue vir die beste uitkoms vir Janika.”
Janika sal 'n minimum van twee operasies nodig hê om 'n uiteindelik suksesvolle uitkoms te verseker.
Volgens Hock sal die operasies in Kaapstad uitgevoer word. Tydens die eerste operasie sal die handchirurg net een vingertjie op 'n slag skei. Ná die operasie sal Janika se handjie toegedraai bly en eers weer deur dr. Van der Spuyt in Windhoek oopgemaak word, wat die rehabilitasieproses sal begin.
Sowat ses maande later sal die tweede vingertjie van die derde geskei word. Rehabilitasie sal weer volg om Janika te leer hoe om haar handjie met “vyf perfekte vingers” te gebruik.
“Ons dogtertjie is perfek net soos sy is. Om egter te weet dat sy binnekort al vyf haar vingertjies sal kan gebruik, dat sy nie fisiese en emosionele pyn in haar lewe weens dié toestand sal hoef te verduur nie en dat dr. Van der Spuyt soveel vertroue in haar reis vorentoe het, gee ons baie gemoedsrus.”
Die gesin behoort wel aan 'n mediese fonds, maar dit sal egter nie 100% van Janika se mediese onkoste dek nie. Koste wat hulle self sal moet dek, sluit petrol en verblyf in Kaapstad in, asook haar rehabilitasie en maande se fisioterapie.
“As ouers is ons vol vertroue dat die operasies Janika die geleentheid sal bied om haar handjie net soos enige ander kind te kan gebruik. Dit is ons grootste wens dat sy haar lewe ten volle kan uitleef.”
Hock en Janika se pa, mnr. Jan Holloway, het intussen met 'n geldinsameling begin om genoeg geld vir hul dogtertjie se operasies en toekomstige rehabilitasie in te samel. Janika se eerste operasie vind in November plaas, terwyl die tweede operasie vir ses maande later beplan word.
Deel van die geldinsameling is 'n pretdag vir Janika wat môre by die Laerskool Pionierspark in Windhoek sal plaasvind. Die pret begin om 08:00 en sluit boeresport, 'n veiling, springkastele, braaivleis, handgemaakte snuisterye en spookasem in.
Vir meer inligting hieroor kan Hock by 061 275 300 of 081 359 3153 geskakel word.
Dit is hul grootste wens dat hul dogtertjie haar lewe ten volle kan uitleef en as ouers weet hulle die volle gebruik van die eenjarige Janika Holloway se handjie sal 'n groot bydrae hiertoe lewer.
Klein Janika is op 17 Augustus verlede jaar met 'n gewebde, of Eaton-handjie, gebore. Drie van die vingertjies aan haar linkerhand het nie tydens ontwikkeling in die baarmoeder van mekaar geskei nie. Dit is nie deur enige skandering tydens haar ma, me. Viola Hock, se swangerskap raakgesien nie en is eers met Janika se geboorte opgemerk.
Syndactyly is die proses wat in die baarmoeder plaasvind waartydens een duim en vier aparte vingers ontwikkel.
In die baarmoeder is die nuwe hand spaanvormig en dan verdeel dit in aparte vingers.
Soms skei die vingers egter nie ver genoeg van mekaar nie en dit veroorsaak gewebde vingers.
Volgens Hock se dokter en verskeie ander spesialiste kon die gebrek nie verhoed word nie en is dit as 'n “natuurlike fratsongeluk” beskryf.
“Ek was geweldig hartseer en het dikwels skuldig gevoel omdat my dogtertjie so gebore is. Ek het totaal verantwoordelik gevoel vir die welstand van my prinsessie en wou haar die beste lewe moontlik gee,” vertel Hock.
Sy het begin soek na soortgelyke gevalle in Namibië en tydens haar navorsing het sy dr. Dirk van der Spuyt, 'n ortopediese en handchirurg, ontdek.
Tydens 'n afspraak in Februarie vanjaar het Van der Spuyt verduidelik Janika se handjie kan geopereer word, maar eers wanneer sy 'n jaar oud is.
“Hy was baie tevrede met Janika se hand omdat haar duimpie ten volle ontwikkel het. Volgens hom is die duim die belangrikste vinger van 'n hand en het dit 'n hooffunksie,” sê Hock.
Van der Spuyt het Janika se hand as “baie gesond” beskryf en die groen lig vir die operasie gegee.
“Dr. Van der Spuyt was passievol oor ons dogtertjie en het herhaaldelik gesê hy kan nie wag om die reis saam met ons en haar te begin nie. Hy is ook vol vertroue vir die beste uitkoms vir Janika.”
Janika sal 'n minimum van twee operasies nodig hê om 'n uiteindelik suksesvolle uitkoms te verseker.
Volgens Hock sal die operasies in Kaapstad uitgevoer word. Tydens die eerste operasie sal die handchirurg net een vingertjie op 'n slag skei. Ná die operasie sal Janika se handjie toegedraai bly en eers weer deur dr. Van der Spuyt in Windhoek oopgemaak word, wat die rehabilitasieproses sal begin.
Sowat ses maande later sal die tweede vingertjie van die derde geskei word. Rehabilitasie sal weer volg om Janika te leer hoe om haar handjie met “vyf perfekte vingers” te gebruik.
“Ons dogtertjie is perfek net soos sy is. Om egter te weet dat sy binnekort al vyf haar vingertjies sal kan gebruik, dat sy nie fisiese en emosionele pyn in haar lewe weens dié toestand sal hoef te verduur nie en dat dr. Van der Spuyt soveel vertroue in haar reis vorentoe het, gee ons baie gemoedsrus.”
Die gesin behoort wel aan 'n mediese fonds, maar dit sal egter nie 100% van Janika se mediese onkoste dek nie. Koste wat hulle self sal moet dek, sluit petrol en verblyf in Kaapstad in, asook haar rehabilitasie en maande se fisioterapie.
“As ouers is ons vol vertroue dat die operasies Janika die geleentheid sal bied om haar handjie net soos enige ander kind te kan gebruik. Dit is ons grootste wens dat sy haar lewe ten volle kan uitleef.”
Hock en Janika se pa, mnr. Jan Holloway, het intussen met 'n geldinsameling begin om genoeg geld vir hul dogtertjie se operasies en toekomstige rehabilitasie in te samel. Janika se eerste operasie vind in November plaas, terwyl die tweede operasie vir ses maande later beplan word.
Deel van die geldinsameling is 'n pretdag vir Janika wat môre by die Laerskool Pionierspark in Windhoek sal plaasvind. Die pret begin om 08:00 en sluit boeresport, 'n veiling, springkastele, braaivleis, handgemaakte snuisterye en spookasem in.
Vir meer inligting hieroor kan Hock by 061 275 300 of 081 359 3153 geskakel word.
Kommentaar
Republikein
Geen kommentaar is op hierdie artikel gelaat nie