Republikein Newspaper

Namibiërs staan in 2021 voor die uitdaging om almal saam te werk aan die herstel wat nodig is ná die ekonomiese ramp wat die Covid-19-pandemie veroorsaak het.

Pres. Hage Geingob het vanjaar tematies tot een van veerkragtigheid verklaar in sy Nuwejaarsrede wat Donderdagaand gebeeldsend is. Kragdadigheid of vastrap is volgens die staatshoof nodig, eerder as net vasbyt.

Verlede jaar was die jaar van introspeksie.

Die staatshoof het gesê die tweede hoofstuk van die Harambee-welvaartsplan sal in Februarie bekendgestel word. Die plan sal volgens Geingob herlewing in sleutelsektore uitstippel.

Soos sedert Maart verlede jaar is onortodokse oplossings volgens die staatshoof nodig. Herlewingsprojekte in Harambee 2 sal dringend en met groot deursigtigheid deurgevoer word, het Geingob onderneem.

’n Wegbreekberaad van die kabinet in Desember het volgens Geingob landbou, onderwys en gesondheid as belangrike prioriteite uitgesonder, naas bestaande uitdagings soos werkskepping, behuising en die stryd teen geslagsgeweld.

Namibië sal volgens Geingob veel harder moet werk om beleggers te lok. Hy het ongegronde kritiek teen buitelandse beleggers deur die media en gemeenskappe as ’n hindernis uitgesonder.

Die president sal in Januarie lede aanwys van die nuwe raad vir die bevordering van beleggings en ontwikkeling.

Hoewel Namibië gedurende 2020 volgens Geingob op die rand van ’n afgrond gehuiwer het, het die land se gees van dapperheid en deurdruk nie gebreek nie. Namibiërs moet 2021 as ’n jaar van hoop en hernuwing beskou, het Geingob gesê.

Werksverliese en die sluiting van besighede het volgens Geingob groot ellende vir vele mense veroorsaak. Behalwe vir ekonomiese en maatskaplike letsels is mense se geestesgesondheid volgens die staatshoof ook beproef.

Almal se samewerking, eenheid en versoening is volgens hom nou nog belangriker as ooit.