’n Briefie vir Amelie

07 November 2018 | Rubrieke
Elvira Hattingh - Liewe Amelie, jy ken nie my nie, maar ek het die afgelope dae baie van jou gehoor. Ek weet nie eens of dit my plek is om hierdie vir jou te skryf nie, maar ek het gehoor hoe ’n dapper meisie jy was en steeds elke dag is.

My hart gaan uit na jou en ek wens ek kon jou ‘n stywe drukkie gee. Ek is baie jammer om te hoor oor wat jy moes sien en deurmaak. As ‘n mamma is ek só bly dat jou ouma en oupa nou na jou en Snowy, jou katjie, gaan kyk.

Ons weet hulle is baie lief vir jou en jy het ‘n hele familie wat só mooi na jou gaan kyk.

Weet jy wat: Jy is heeltemal reg toe jy vir jou ouma gesê het sy moenie huil nie, want mamma se siel is by Liewe Jesus én by julle. Ek is ook ‘n mamma en ek kan jou een ding vertel: ‘n Mamma vergeet nooit haar kind nie. Nooit, ooit, ooit nie.

Jou mamma sal altyd by jou wees en in jou hartjie woon en elke dag vanuit die hemel na jou kyk. Ek weet sy sal, want dit is wat mammas doen.

Liewe Amelie, daar is nog iets wat ek vir jou moet sê. Ek dink al Namibië se mammas en pappas het jou nou in hul harte aangeneem.

Dit beteken nie net het jy jou mamma nie, maar ‘n hele land vol mammas én pappas!

Ek belowe jou, in almal van ons se harte is jy ook nou óns dogtertjie. Onthou dit as jou hartjie dalk soms seer raak - moet nooit vergeet van almal wat baie lief vir jou is nie. Vertel vir mense as jou hartjie seer is, want dis hoe al die einas sal beter raak.

Maatjies van jou mamma het vir my foto’s van julle twee saam gewys en jinne, jy is ‘n pragtige meisiekind. Ek dink die heel mooiste van jou is dat jy so ’n dapper, wyse en sterk meisie is. Ek ken geen ander sesjarige soos jy nie.

Ek wil hê jy moet altyd so sterk wees soos nou. Pak die lewe voluit aan – ek is seker dit is wat jou mamma sou wou hê. Maak nie saak wat nie, jy hoef vir niks terug te staan nie! Jy is tot alles in staat. Hou altyd jou Skepper se hand vas. Jy kán, ek weet jy kan!

Namibiërs, Amelie en ander kindertjies soos sy se verhale is ‘n aanklag teen ons as volwassenes. Statistieke wys dat die land se vroue en kinders bloei, geslagsgeweld is so algemeen soos tande borsel.

Ek is die bekommerdste oor wat aan onskuldige kinders gedoen word. Statistieke dui aan een uit elke vier skoolgaande kinders in Namibië is slagoffers van onsedelike geweld. In amper die helfte van al die verkragtingsgevalle tussen 2003 en 2012 was kinders die slagoffers.

Ek dink ons as ma's en pa's sidder.

Daar word elke tweede dag optogte gehou, ons trek swart aan, hou kunsuitstallings, politici lewer mooi praatjies, verkragters word net weer en weer op borgtog vrygelaat en die media skryf maar oor net nóg 'n geval.

Ek sien nie hoe dit werklik ‘n impak het op hierdie kindertjies se werklikheid nie, ek sien nie dat geslagsgeweld enigsins verminder nie of dat daar minder kinderslagoffers is nie.

Ek het ook nie die antwoord nie, maar ek glo ‘n verandering sal slegs kom deur indivduele en gemeenskapsbesluite.

Ma’s en pa’s: Dít sluit in om vir jou en jou kinders op te staan, tot om nie molestering-, verkragting- en aanrandingsake terug te trek nie, en dat gemeenskappe nie langer die oortreders moet beskerm en hul sondes toesmeer nie.

Moenie hulle van die tronk probeer beskerm nie, beskerm eerder ons kinders. Dis harde en bitter moeilike besluite, maar solank ons dit nié neem nie, is daar bloed op ons hande – dié van vroue en veral van ons kinders.

Soortgelyk

 

Hepatitis E woed landswyd voort

15 ure gelede | Ministeries

Henriette Lamprecht – Kort duskant ‘n jaar ná ‘n uitbreking van hepatitis E amptelik in Desember 2017 in Windhoek verklaar is, is byna 4...

Nuwe plan teen misdaad onthul

15 ure gelede | Misdaad

Denver KistingRooftogte, veral gewapende rooftogte, het in die afgelope ses jaar met 44% die hoogte in geskiet.Dié syfer is vervat in misdaadstatistieke van die afgelope...

Hittegolf rý Namibië

15 ure gelede | Weer

Ondangwa is vandag die heel warmste plek met ‘n verwagte maksimum temperatuur van 41°C. Boonop word geen verligting van snikhete temperature hierdie naweek verwag nie....

SOE’s: Direksies moet vir mislukkings pa staan

15 ure gelede | Ministeries

Ronelle Rademeyer - Voor staatsondernemings (SOE’s) nie prestasiegedrewe volgens goeie korporatiewe beginsels bestuur word nie, sal die ekonomie nie beter vaar nie.Daarom sal die vergoeding...

Weer, Vrydag 16 November 2018

15 ure gelede | Weer

BINNELAND: Sonnig en bloedig warm in die Suide. Elders sal dit gedeeltelik bewolk en bloedig wees. Enkele donerbuie word in Otjozondjupa, Khomas en Omaheke verwag.KUS:...

Kalender 16 November

15 ure gelede | Kuns en vermaak

Nou aan die gang» Die Nasionale Kunsgalery van Namibië (NAGN) bied met trots die 2018 Unam Visuele Kunste-uitstalling aan, wat tans in die hoofgalery van...

Die misterie van poësie

15 ure gelede | Kuns en vermaak

Lloyd Zandberg Terwyl die meerderheid van die mensdom soggens teen die wekker stoei, kinders vir skool aantrek, die hewige verkeer aandurf en uiteindelik laat vir...

Ons is nie teen gays, sê Sioka

15 ure gelede | Ministeries

Denver Kisting – Die minister van geslagsgelykheid en kinderwelsyn, me. Doreen Sioka, sê die regering het niks teen gay mense nie.Sý veral diskrimineer nie teen...

Mense oor miltsiekte gewaarsku ná 2 uitbrekings

15 ure gelede | Gesondheid

Ronelle Rademeyer - ’n Bewegingsverbod vir diere is by Sesfontein en die Bwabwata Nasionale Park ingestel nadat uitbrekings van miltsiekte op 1 November in dié...