Myle se kookavontuur

Sjef David Higgs is ’n gebore Namibiër en gaan binnekort sy eerste kookboek, Mile 8, bekend stel.

Namibië se kus is vol mylmerkers van Swakopmund se poskantoor af verder Noord vir 108 myl.

Die verweerde, genommerde klippe het al hul eie legendariese status verwerf en is al deel van die plekke wat hulle aandui.

Dit is langs hierdie kus waar David, Marble-restaurant se mede-eienaar, gevierde sjef en mede-aanbieder van My Kitchen Rules, grootgeword het.

Vir hom is Myl 8 ’n spesiale baken omdat dit is waar hy sy eerste vis gevang het en waar sy kosreis afgeskop het.

Mile 8 is sy verhaal, wat op die klein kusdorpie Walvisbaai begin, en verder afspeel teen die agtergrond van Kaapstad se cowboy-kombuise in die 90’s, die hart van Suid-Afrika se wynplase, en dan ’n hoogtepunt by Marble bereik.

Dis ’n kulinêre tour de force in die hartjie van Johannesburg.

Met meer as 90 disse en 150 resepte wat deur Higgs se reis beïnvloed is, is Mile 8 ’n kulinêre avontuur wat Suid-Afrika se unieke en interessante geure byeenbring.

Impala en Tartaarsous, snoek en appelkoos, amadumbe en chakalaka, asook sy weergawe van die klassieke malvapoeding is maar enkele van die vreugdes wat in sy wonderlik geïllustreerde boek te vinde is.

Mile 8 sal van Oktober af by vooraanstaande boekwinkels beskikbaar wees en sal sowat R550 kos.

Voorafbestellings van minstens 10 kopieë kan by www.marble.restaurant teen sowat R450 per boek gedoen word.

Kontak Tessa Graham by [email protected] of +27 765 868 313 vir meer inligting.