Mr. Tekkie: ‘Ons is ook Steinhoff-slagoffers’

13 September 2018 | Sakenuus
Hanlie Stadler – Mr. Tekkie is van die min goeie nuus wat uit die Steinhoff-debakel voortvloei en die stigters van dié klere- en skoenwinkel gaan met alle mag baklei vir “sy bestaansreg” en “ons wetlike reg om ’n nuwe sakeonderneming te begin”.

Bernard Mostert, voormalige uitvoerende hoof van Tekkie Town en een van die stigters van Mr. Tekkie, het Dinsdag in ’n strydlustige verklaring gesê hulle gaan Pepkor se hofaansoek om Mr. Tekkie te probeer stuit, beslis teenstaan.

Pepkor is die eienaar van Tekkie Town.

Mostert sê die hofaansoek het hulle nie verras nie.

“Ons sal dit teenstaan en nougeset die ooglopend valse bewerings, halwe waarhede en spekulatiewe aard van die Pepkor-aansoek uitwys.”

Dit kom nadat Pepkor Maandagmiddag laat ’n dringende hofaansoek gebring het.

Pepkor wil handelsbeperkings opdwing teen Braam van Huyssteen, stigter van Tekkie Town, Mostert en nog drie individue wat tot onlangs by Pepkor gewerk het. Volgens Pepkor bepaal die indiensnemingskontrakte dat hulle vir drie jaar ná hul bedanking nie vir ’n regstreekse mededinger mag werk nie.

Die vyf het tot Vrydag om 16:00 om die hof in kennis te stel dat hulle die dringende hofaansoek gaan teenstaan. Hulle moet hul teenargumente teen 21 September indien.

Volgens Mr. Tekkie se verklaring open die eerste winkel in dié groep einde Oktober, waarna “verskeie ander winkels” in November landwyd sal open.

“Mr. Tekkie is gestig deur ’n groep voormalige Tekkie Town-werknemers wat in Junie by Pepkor bedank het weens ’n konflik oor waardes, etiek en benaderings tot sake doen.”

Mr. Tekkie se stigters sê hulle het regsadvies ingewin oor die beweerde handelsbeperkings en ander regsprobleme voordat hulle meer as R500 miljoen in die nuwe onderneming belê het.

“Soos baie ander Suid-Afrikaners kan ons as ‘Steinhoff-slagoffers’ geklassifiseer word, en ons kon gekies het om niks meer te doen as fokus op ons regstryde om ons eienaarskap van Tekkie Town te laat herstel nie.

Soos baie ander Suid-Afrikaners kan ons as ‘Steinhoff-slagoffers’ geklassifiseer word, en ons kon gekies het om niks meer te doen as fokus op ons regstryde om ons eienaarskap van Tekkie Town te laat herstel nie.

Bernard Mostert

“Pleks daarvan het ons gekies om ’n innoverende storie met ware Suid-Afrikaanse veerkragtigheid mark toe te bring. Ons is trots daarop en is verras dat ’n reus so groot soos Pepkor ontsteld is oor ons idee.”

Volgens Mostert gaan hulle wel voort met hul onderskeie hofsake omdat hulle glo hulle is in die Steinhoff-sage bedrieg. Hulle begin Mr. Tekkie egter om ’n “positiewe bydrae tot Suid-Afrika te lewer”.

Mostert sê hulle kry ontsaglik baie steun van lede van die publiek.

“Ons kry boodskappe van steun, mense wat ons sterkte toewens en mense wat belowe om ons te ondersteun of met ons saam te werk – elke dag. Uit wat ons sien, hoor en beleef, wil Suid-Afrika hê Mr. Tekkie moet slaag.

“Ons sal baklei vir sy bestaansreg en die geleentheid om ’n unieke kleinhandelservaring na Suid-Afrikaners te bring, sowel as vir ons wetlike reg om ’n nuwe sakeonderneming te begin.”

In sy hofstukke beskryf Pepkor die Mr. Tekkie-bemarking onder meer as “vermetel”.

Pepkor se hofaansoek is gebring nadat die maatskappy daarin kon slaag om e-posse te herwin wat Van Huyssteen betrek by ’n beweerde komplot om Pepkor se aandeelprys af te druk. Die e-posse is uitgewis, maar met die hulp van IT-spesialiste herwin, sê Pepkor in hofstukke.

Tekkie Town is in September 2016 deur Steinhoff gekoop en toe weer deur Steinhoff Africa Retail (Star), wat verlede maand sy naam na Pepkor, een van sy filiale, verander het.

Van Huyssteen het sy aandele in Tekkie Town vir Steinhoff-aandele verruil en het dus miljoene verloor toe Steinhoff se aandeelprys in Desember verlede jaar in duie gestort het weens beweerde boekhou-ongerymdhede, wat steeds ondersoek word.

Van Huyssteen is bevriend met Markus Jooste, voormalige uitvoerende hoof van Steinhoff. Albei besit ook resiesperde.

Luidens Pepkor se hofstukke het Van Huyssteen en Mostert in Mei e-posse gestuur wat verband hou met ’n beweerde komplot om Pepkor se aandeelprys af te dwing sodat die stigters Tekkie Town kon terugkoop. Pepkor voer aan hulle het art. 76(2) en (3) en art. 77 van die Maatskappywet oortree.

Pepkor se hofstukke verwys ook weer na die beweerde komplot om Tekkie Town se verkoopstelsel te verlam deur met die rekenaarstelsels te peuter. Dié beweerde komplot, wat glo op 1 Julie uitgevoer sou word, is gestuit toe Werner de Bruin, ’n IT-spesialis van die groep, daaroor gebieg het.? – Netwerk24

Soortgelyk

 

Regering staan bakhand vir 2% van Namibiërs se jáárlikse...

23 ure gelede | Regering

Denver Kisting – Die verwarring oor of die regering Namibiërs vra om 2% van een maand of een jaar se basiese salaris te skenk, is...

Making employees feel at home at Plastic Packaging

1 dag gelede | Mense

JONELL MALAN Human resource management is a function in organisations designed to maximise employee performance in the service of an employer’s strategic objectives. One empowers...

Duisende registreer vir e-taks

1 dag gelede | Ministeries

Elvira Hattingh - Altesaam 192 225 belastingopgawes is teen Dinsdag via die ministerie van finansies se nuwe aanlyn belastingdiens, die geïntegreerde belastingadministrasiestelsel (Itas), ontvang.Mnr. Tonateni...

Apollo 11-euforie só onthou

1 dag gelede | Tegnologie

Ronelle Rademeyer - Namibië se eie ruimteman, dr. Japie van Zyl, sê ’n getekende foto van die drie Apollo 11-ruimtevaarders, Neil Armstrong, Buzz Aldrin en...

Kalender 12 Julie

1 dag gelede | Kuns en vermaak

Nou aan die gang» Bottomless Coffee Band is ’n instrumentele, alternatiewe duo wat bestaan uit die getroude paartjie Lourens en Esté Rabé van Kaapstad, Suid-Afrika....

Weer vir 19 Julie 2019

1 dag gelede | Weer

BINNELAND: Sonnig en warm tot baie warm in die Noorde.KUS: Sonnig en matig tot warm.GETYE BY WALVISBAAI: H 04:47 L 10:41...

Nuwe begin vir vier wildehonde

1 dag gelede | Omgewing

Francoise Steynberg - Ná die tragiese skietvoorval in Februarie waarin drie wildehonde van die N/a’an ku sê-stigting en -wildreservaat glo deur personeel van die...

Just a click away

1 dag gelede | Gesondheid

Michelline Nawatises Organic Box is an online grocery shop specialising in selling organic vegetables, meat and dairy products, farm produce, and speciality homemade products.It was...

Rundu surveys new extensions

1 dag gelede | Plaaslik

The Rundu town council plans to survey two new extensions in the Tuhingireni informal settlement for N$ 1 million, according to the head of town...